ກະຊວງການຕ່າງປະເທດຈີນຫວັງໃຫ້ນັກບິນອະວະກາດຈີນ ແລະ ຕ່າງປະເທດສາມາດທ່ຽວ “ຫໍຜາສາດເທິງສະຫວັນ” ນຳກັນ
ເວລາ 9 ໂມງ 22 ນາທີຂອງວັນທີ 17 ມິຖຸນານີ້, ຈີນໄດ້ສົ່ງຍານອະວະກາດບັນທຸກຄົນ “ເຊີນໂຈ່ວ 12” ຂຶ້ນສູ່ອະວະກາດຢ່າງສຳເລັດຜົນ, ຫຼັງຈາກນັ້ນຍານອະວະກາດໄດ້ເຊື່ອມຕໍ່ກັບຫ້ອງແກນກາງທ່ຽນເຮີຢ່າງສຳເລັດຜົນເຊິ່ງເປັນການເປີດຍຸກສະໄໝທີ່ນັກບິນອະວະກາດຂອງຈີນເດີນທາງໄປປະຈຳການຢູ່ອະວະກາດຢ່າງສຳເລັດຜົນ. ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວວ່າ, ແຕລະບາດກ້າວຂອງໂຄງການການບິນອະວະກາດບັນທຸກຄົນຂອງຈີນໄດ້ປະກອບສ່ວນທາງສະຕິປັນຍາ ແລະ ກຳລັງແຮງຂອງຈີນເພື່ອມວນມະນຸດເພື່ອນຳໃຊ້ອະວະກາດໃນທາງສັນຕິ, ຈີນຫວັງເປັນຢ່າງຍິ່ງວ່າໃນອະນາຄົດອັນບໍ່ດົນນີ້, ນັກບິນອະວະກາດຈີນ ແລະ ນັກບິນອະວະກາດຕ່າງປະເທດຈະສາມາດທ່ຽວສະຖານີອະວະກາດຂອງຈີນທີ່ຖືກເອີ້ນວ່າ “ຫໍ້ຜາສາດເທິງສະຫວັນ” ຮ່ວມກັນ.
ທ່ານຈ້າວລີ້ຈ່ຽນກ່າວວ່າ, ນັບແຕ່ຍານອະວະກາດ “ເຊີນໂຈ່ວເລກ 5” ໄດ້ປະຕິບັດໜ້າທີ່ການບິນອະວະກາດບັນທຸກຄົນເປັນເທື່ອທຳອິດໃນປີ 2003 ເປັນຕົ້ນມາ, ໃນໄລຍະ 18 ປີມານີ້, ໂຄງການການບິນອະວະກາດບັນທຸກຄົນຂອງຈີນສາມາດບຸກທະລຸຂອດຫຍຸ້ງຍາກໄດ້ຢ່າງບໍ່ຢຸດຢັ້ງ ຄື: ຈາກນັກບິນອະວະກາດຄົນດຽວ ແລະ ຢູ່ພຽງວັນດຽວ ຈົນຮອດນັກບິນອະວະກາດຫຼາຍຄົນ ແລະ ຢູ່ຫຼາຍວັນ, ຈາກການປະຕິບັດໜ້າທີ່ໃນສະຖານີໃນຫ້ອງອະວະກາດ ຈົນຮອດການອອກນອກສະຖານີອະວະກາດ, ຈາກການປະຈຳການເປັນໄລຍະເວລາສັ້ນ ຈົນຮອດ ປະຈຳການໄລຍະປານກາງ, ທັງໝົດແມ່ນການປະກອບສ່ວນສະຕິປັນຍາ ແລະ ກຳລັງແຮງຂອງຈີນເພື່ອມວນມະນຸດເພື່ອນຳໃຊ້ອະວະກາດໃນທາງສັນຕິ. ທ່ານກ່າວເນັ້ນວ່າ, ການຄົ້ນຫາຈັກກະວານແມ່ນຄວາມໃຝ່ຝັນຮ່ວມຂອງມວນມະນຸດທັງໝົດ.
“ຕະຫຼອດໄລຍະເວລາທີ່ຜ່ານມາລັດຖະບານຈີນກໍ່ໄດ້ສຸມກຳລັງເຂົ້າໃນການນຳໃຊ້ອະວະກາດໃນທາງສັນຕິ, ດຳເນີນການແລກປ່ຽນ ແລະ ການຮ່ວມມືໃນດ້ານການບິນອະວະກາດບັນທຸກຄົນກັບປະເທດທີ່ກ່ຽວຂ້ອງຢ່າງກວ້າງຂວາງໂດຍອີງຕາມຫຼັກການນຳໃຊ້ອະວະກາດໃນທາງສັນຕິ, ສະເໝີພາລບກັນ ແລະ ຕ່າງຝ່າຍຕ່າງມີຜົນປະໂຫຍດ ແລະ ພ້ອມກັນພັດທະນາໄປຕະຫຼອດ. ເມື່ອເຂົ້າສູ່ໄລຍະການສ້າງສະຖານີອະວະກາດສຳເລັດແລ້ວ, ຈີນຈະສືບຕໍ່ເພິ່ມທະວີການແລກປ່ຽນ ແລະ ການຮ່ວມມືສາກົນຢ່າງເລິກເຊິ່ງກວ່າເກົ່າ ແລະ ກວ້າງຂວາງກວ່າເກົ່າ, ເຮັດໃຫ້ສະຖານີອະວະກາດຂອງຈີນກາຍເປັນຫ້ອງທົດລອງອະວະກາດທີ່ສ້າງຄວາມສຸກໃຫ້ແກ່ມວນມະນຸດ.”