ທ່ານສີຈິ້ນຜິງ ແລະ ພໍ່: ການສືບທອດຄືກັບ“ການແລ່ນຕໍ່ໄມ້” ລະຫວ່າງຊາວພັກກອມມູນິດຈີນສອງລຸ້ນ
ທ່ານສີຈິ້ນຜິງ ແລະ ທ່ານສີຈົ້ງຊຸ່ນພໍ່ຂອງທ່ານສີຈິ້ນຜິງ, ລ້ວນແຕ່ແມ່ນສະມາຊິກພັກກອມມູນິດຈີນທີ່ມີຄວາມເຊື່ອຖືຢ່າງເດັດດ່ຽວໜຽວແໜ້ນ.
ໃນສາຍຕາຂອງປະຊາຊົນ, ທ່ານສີຈົ້ງຊຸ່ນແມ່ນ “ຜູ້ນຳທີ່ມາຈາກປະຊາຊົນ”, ຢູ່ຮ່ວມກັນກັບປະຊາຊົນຕະຫຼອດການ. ໃນຕະຫຼອດຊີວິດຂອງທ່ານສີຈົ້ງຊຸ່ນໄດ້ຮັບໃຊ້ປະຊາຊົນຢ່າງສຸດອົກສຸດໃຈ.
ທ່ານສີຈິ້ນຜິງຮູ້ສຶກພາກພູມໃຈຕໍ່ການກະທຳຂອງພໍ່, ຈຶ່ງໄດ້ສືບທອດຄຸນທາດທີ່ສູງສົ່ງ ແລະລໍ້າຄ່າຫຼາຍຢ່າງຈາກພໍ່.
ຮ່ວມຈິດຮ່ວມໃຈກັບປະຊາຊົນ
ຈາກພູພຽງດິນເຫຼືອງຈົນຮອດສຳນັກງານສູນກາງພັກ, ໃນຫຼາຍສິບປີຜ່ານມາ, ທ່ານສີຈິ້ນຜິງໄດ້ລົງຮາກຖານ ຍ່າງເຂົ້າໄປເຮືອນເພື່ອຢ້ຽມຢາມປະຊາຊົນ, ຖາມກ່ຽວກັບຊີວິດປະຈຳວັນຂອງປະຊາຊົນ, ເຊິ່ງເຮັດໃຫ້ຄົນເຫັນແລ້ວປະທັບໃຈຫຼາຍ. ທ່ານສີຈິ້ນຜິງກໍຄືກັນກັບພໍ່, ຍຶດໝັ້ນໃນແນວທາງປະຊາຊົນທີ່ “ເຮັດວຽກທຸກຢ່າງເພື່ອປະຊາຊົນ, ອາໄສປະຊາຊົນ, ມາຈາກປະຊາຊົນ, ເຂົ້າຫາປະຊາຊົນ”ຢ່າງສະເໝີຕົ້ນສະເໝີປາຍ.
ທ່ານສີຈົ້ງຊຸ່ນເຫັນວ່າ: “ພະນັກງານການນຳ ແລະ ປະຊາຊົນສະເໝີພາບກັນ, ບໍ່ມີອັນທີ່ວ່າສູງສົ່ງ ຫຼື ຕໍ່າຕ້ອຍ, ຕ້ອງຢູ່ທ່າມກາງປະຊາຊົນສະເໝີ.”
ທ່ານສີຈິ້ນຜິງໄດ້ສືບທອດແບບແຜນຂອງພໍ່. ທ່ານກ່າວວ່າ: “ສະມາຊິກພັກ ແລະພະນັກງານທຸກຄົນ, ມີແຕ່ຄວາມຮັບຜິດຊອບ ແລະ ພັນທະທີ່ຮັບໃຊ້ປະຊາຊົນເທົ່ານັ້ນ, ບໍ່ມີສິດເປັນເຈົ້ານາຍອາດຍາ.”
ໃນໄລຍະທີ່ລົງຮາກຖານເພື່ອດຳລົງຊີວິດ ແລະ ອອກແຮງງານຢູ່ບ້ານຫຼຽງເຈ່ຍເຫີ, ທ່ານສີຈິ້ນຜິງໄດ້ເປີດຫ້ອງຮຽນສອນໜັງສືໃຫ້ພີ່ນ້ອງປະຊາຊົນ; ໃນໄລຍະທີ່ເຮັດວຽກການປົກຄອງຢູ່ນະຄອນຟູໂຈ່, ທ່ານໄດ້ຊຸກຍູ້ການເຄື່ອນໄຫວຄື “ເຂົ້າໄປເຮືອນທຸກຄອບຄົວ, ເພື່ອຊອກຮູ້ສະພາບຂອງທຸກຄອບຄົວ, ແກ້ໄຂຄວາມກັງວົນໃຈຂອງທຸກຄອບຄົວ ແລະ ເຮັດວຽກຊ່ວຍເຫຼືອທຸກຄອບຄົວ”; ຫຼັງຈາກກາຍເປັນຜູ້ນຳສູງສຸດຂອງພັກ ແລະລັດຖະບານແລ້ວ, ທ່ານໄດ້ແນະນຳຕົວເອງວ່າ:ທ່ານເປັນ “ຜູ້ຮັບໃຊ້ປະຊາຊົນ”.
ໃຫ້ຄວາມສຳຄັນກັບການສຳຫຼວດຄົ້ນຄວ້າ
ທ່ານສີຈົ້ງຊຸ່ນໃຫ້ຄວາມສຳຄັນຢ່າງສູງຕໍ່ການສຳຫຼວດຄົ້ນຄວ້າຢ່າງສະເໝີຕົ້ນສະເໝີປາຍ, ທ່ານມີທັດສະນະຄືໃຫ້ໝັ່ນອອກຈາກ “ສຳນັກງານອົງການປົກຄອງ”, ເຂົ້າຫາປະຊາຊົນ, ລົງເລິກເພື່ອເກັບກຳສະພາບຄວາມເປັນຈິງ, ຕິດແທດກັບປະຊາຊົນເພື່ອຊອກຫາວິທີແກ້ໄຂທີ່ເໝາະສົມທີ່ສຸດ ຕົວຈິງທີ່ສຸດ ແລະ ຖືກຕ້ອງທີ່ສຸດ. ວິທີການເຮັດວຽກແບບນີ້,ໄດ້ສົ່ງອິດທິພົນໃຫ້ກັບທ່ານສີຈິ້ນຜິງຢ່າງເລິກເຊິ່ງ.
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ,ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ຂັ້ນຮາກຖານເລື້ອຍໆ, ເຊັ່ນ: ໄປຢ້ຽມຢາມປະຊາຊົນຜູ້ທຸກຍາກຢູ່ເຂດພູດອຍ, ເດີນທາງໄປເຂດດິນດຳເພື່ອກວດເບິ່ງສະພາບການຜະລິດສະບຽງອາຫານ, ກວດເບິ່ງສະພາບການຜະລິດຢູ່ໂຮງຈັກໂຮງງານ, ຊອກຮູ້ສະພາບການຟື້ນຟູການຜະລິດ ແລະ ການດຳລົງຊີວິດຂອງປະຊາຊົນຢູ່ສະຖານທີ່ຈັດສັນຜູ້ປະສົບໄພທຳມະຊາດ ແລະອື່ນໆອີກ. ທ່ານສີຈິ້ນ ຜິງໄດ້ໃຊ້ການກະທຳຕົວຈິງ ຊຸກຍູ້ການສ້າງບັນຍາກາດໃຫ້ທົ່ວພັກດຳເນີນການສຳຫຼວດຄົ້ນຄວ້າຕົວຈິງ.
ປະຢັດມັດທະຍັດ
ການປະຢັດມັດທະຍັດ,ກໍແມ່ນຄຸນສົມບັດອັນສຳຄັນຢ່າງໜຶ່ງທີ່ທ່ານສີຈິ້ນຜິງ ຮຽນເອົາແບບຢ່າງຂອງພໍ່.
ທ່ານສີຈົ້ງຊຸ່ນດຳລົງຊີວິດປະຢັດມັດທະຍັດຢ່າງເຄັ່ງຄັດ, ທ່ານ ແລະ ທ່ານນາງສີຊິ່ນພັນລະຍາຂອງຕົນກໍມີຄວາມເຂັ້ມງວດຫຼາຍໃນການສອນລູກ. ໃນເວລາກິນເຂົ້າ, ຖ້າມີເມັດເຂົ້າຕົກຢູ່ໜ້າໂຕະ, ທ່ານສີຈົ້ງຊຸ່ນກໍຈະຈັບຂຶ້ນມາກິນ ໂດຍບໍ່ໃຫ້ຕົກເຮ່ຍແມ່ນແຕ່ໜ້ອຍດຽວ.
ພາຍໃຕ້ການສັ່ງສອນຂອງພໍ່, ທ່ານສີຈິ້ນຜິງໄດ້ສ້າງຄວາມຊິນເຄີຍໃນການປະຢັດມັດທະຍັດມາຕັ້ງແຕ່ຍາມນ້ອຍ.
ໃນຊຸມປີມໍ່ໆມານີ້, ທ່ານສີຈິ້ນຜິງໄດ້ເດີນທາງໄປສຳຫຼວດກວດກາວຽກງານຢູ່ທ້ອງຖິ່ນຕ່າງໆ, ເພື່ອປະຢັດຄ່າໃຊ້ຈ່າຍຂອງງົບປະມານທ້ອງຖິ່ນ, ທ່ານໄດ້ພັກຜ່ອນ ແລະນອນຄ້າງຄືນຢູ່ເທິງລົດໄຟເລີຍ; ສຳລັບການເດີນທາງໄປຢ້ຽມຢາມຕ່າງປະເທດ, ທ່ານກໍໃຫ້ທິດຊີ້ນຳຫຼາຍເທື່ອແລ້ວວ່າ: ຢ່າໃຊ້ຈ່າຍຟຸມເຟືອຍ, ໂຮງແຮມບໍ່ຕ້ອງຫຼູຫຼາ, ຂໍແຕ່ສະອາດ ແລະ ຢູ່ສະບາຍກໍພໍແລ້ວ.
“ປະຢັດ ແລະ ລຽບງ່າຍ, ສະກັດກັ້ນການສິ້ນເປືອງຟຸມເຟືອຍ, ນີ້ແມ່ນມໍ ລະດົກທີ່ສືບທອດກັນມາໃນທຸກເຊັ່ນຄົນຂອງພັກເຮົາ. ປະຈຸບັນ, ເງື່ອນໄຂການດຳລົງຊີວິດຂອງພວກເຮົາດີຂຶ້ນຫລາຍແລ້ວ, ແຕ່ຈິດໃຈສູ້ຊົນຢ່າງທໍລະຫົດອົດທົນບໍ່ໃຫ້ລົດລະແມ່ນແຕ່ໜ້ອຍດຽວ, ຕ້ອງຍຶດໝັ້ນການສ້າງຄຸນສົມບັດໃຫ້ກັບຕົນເອງ ແລະສ້າງພາລະກິດດ້ວຍການປະຢັດມັດທະຍັດ, ຍຶດໝັ້ນການເຮັດວຽກທຸກຢ່າງດ້ວຍຄວາມດຸໝັ່ນ ແລະ ປະຢັດມັດທະຍັດ.”
ແບບຢ່າງທີ່ີດີມີບົດບາດທີ່ສຳຄັນຢ່າງຍິ່ງ. ຄວາມເວົ້າ ແລະການປະພຶດ ຂອງພໍ່, ໄດ້ສອນທ່ານສີຈິ້ນຜິງໃຫ້ຮູ້ວ່າ: ຄວນເຮັດແນວໃດຈຶ່ງຈະສາມາດກາຍເປັນຄົນທີ່ບໍລິສຸດ ແລະ ສ້າງປະໂຫຍດໃຫ້ກັບປະຊາຊົນໄດ້. ແນວທາງປະຊາຊົນເຊັ່ນ:ການສຳຫຼວດຄົ້ນຄວ້າ ແລະການປະຢັດມັດທະຍັດ, ມໍລະດົກທີ່ສືບທອດກັນມາທຸກເຊັ່ນຄົນຢູ່ໃນພັກໃຫຍ່ທີ່ມີປະຫວັດສາດເປັນຮ້ອຍປີນີ້, ກໍແມ່ນຄຸນສົມບັດທີ່ລໍ້າຄ່າທີ່ໄດ້ສືບທອດ ແລະ ເສີມຂະຫຍາຍເລື້ອຍມາລະຫວ່າງທ່ານສີຈົ້ງຊຸ່ນ ແລະທ່ານສີຈິ້ນຜິງທີ່ເປັນຊາວພັກກອມມູນິດຈີນສອງເຊັ່ນຄົນ.