ວັນທີ 21 ມິຖຸນານີ້, ທ່ານສີຈີ້ນຜິງ ປະທານປະເທດຈີນໄດ້ສົ່ງສານໄປຍັງທ່ານອິບຣາຮິມ ຣາຍຊີ ເພື່ອສະແດງຄວາມຊົມເຊີຍທີ່ທ່ານໄດ້ຮັບເລືອກຕັ້ງເປັນປະທານາທິບໍດີຂອງສາທາລະນະລັດອິສຣາມອີຣານ.
ໃນສານຊົມເຊີຍຂອງທ່ານສີຈີ້ນຜິງໄດ້ລະບຸວ່າ, ຈີນ ກັບ ອີຣານແມ່ນຄູ່ຮ່ວມຍຸດທະຍາດຮອບດ້ານ, ປີນີ້ແມ່ນປີທີ່ສອງປະເທດສ້າງຕັ້ງສາຍພົວພັນທາງການທູດຄົບຮອບ 50 ປີ. ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ການຂະຫຍາຍສາຍພົວພັນຈີນ-ອີຣານ, ຂ້າພະເຈົ້າມີຄວາມປາຖະໜາຈະຮ່ວມມືກັບທ່ານປະທານາທິບໍດີຣາຍຊີ, ເພິ່ມທະວີການແລກປ່ຽນດ້ານຍຸດທະສາດລະຫວ່າງສອງປະເທດ, ສ້າງຄວາມໄວ້ເນື້ອເຊື່ອໃຈກັນທາງການເມືອງລະຫວ່າງສອງຝ່າຍໃຫ້ໜັກແໜ້ນກວ່າເກົ່າ, ເປີດກວ້າງ ແລະ ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆລະຫວ່າງຈີນ ກັບ ອີຣານ, ເພື່ອສ້າງຄວາມສຸກໃຫ້ແກ່ສອງລັດ ແລະ ປະຊາຊົນສອງປະເທດ.
ມື້ດຽວກັນ, ໃນກອງປະຊຸມຂ່າວເທື່ອທຳອິດພາຍຫຼັງໄດ້ຮັບເລືອກຕັ້ງທີ່ຈັດຂຶ້ນຢູ່ນະຄອນຫຼວງເຕເຮຣານ, ທ່ານປະທານາທິບໍດີຣາຍຊີໄດ້ສະແດງຄວາມຄິດຄວາມເຫັນຕໍ່ບັນຫານິວເຄຼຍອີຣານ, ການພົວພັນອີຣານ-ອາເມຣິກາ, ການພົວພັນອີຣານ-ຈີນ ພ້ອມທັງບັນຫາຈຸດພົ້ນເດັ່ນໃນພາກພື້ນອື່ນໆ. ທ່ານຣາຍຊີກ່າວວ່າ, ທ່ານສະໜັບສະໜູນການເຈລະຈາກຽນກ່ຽວກັບສັນຍານິວເຄຼຍອີຣານທີ່ພວມດຳເນີນຢູ່ນະຄອນຫຼວງວຽນປະເທດໂອຕຼິສ, ແຕ່ກໍ່ກ່າວເນັ້ນວ່າ, ອາເມຣິກາຕ້ອງຍົກເລີກມາດຕະການຂວ້ຳບາດແບບບັງຄັບຕໍ່ອີຣານທັງໝົດ.