ວັນທີ 21 ມິຖຸນານີ້, ທ່ານສີຈິ້ນຜິງ ປະທານປະເທດຈີນໄດ້ຕອບຈົດໝາຍໃຫ້ກັບນັກສຶກສາຕ່າງປະເທດທີ່ຮຽນຢູ່ມະຫາວິທະຍາໄລປັກກິ່ງ ໂດຍທ່ານໄດ້ສົ່ງເສີມໃຫ້ເຂົາເຈົ້າຮັບຮູ້ປະເທດຈີນຢ່າງແທ້ຈິງແລະເລິກເຊິ່ງໃຫ້ຫຼາຍກວ່າເກົ່າ, ແນະນຳຄວາມຄິດເຫັນແລະຄວາມຮູ້ສຶກຂອງຕົນໃຫ້ຫຼາຍຄົນໄດ້ຮັບຮູ້ ເພື່ອເສີມຂະຫຍາຍບົດບາດອັນຕັ້ງໜ້າເຂົ້າໃນການຊຸກຍູ້ການເຊື່ອມສານສາຍພົວພັນທາງຈິດໃຈລະຫວ່າງປະຊາຊົນບັນດາປະເທດ.
ໃນຈົດໝາຍຂອງທ່ານສີຈິ້ນຜິງລະບຸວ່າ: ພວກລູກຫຼານໄດ້ເປັນເຈົ້າການຊອກຮູ້ສະພາບຕົວຈິງຂອງປະເທດຈີນແລະປະຫວັດສາດຂອງພັກກອມມູນິດຈີນ, ສິ່ງນີ້ມີປະໂຫຍດຫຼາຍໃນການຮັບຮູ້ອະດີດ, ປັດຈຸບັນແລະອະນາຄົດຂອງຈີນ. ການຮັບຮູ້ປະເທດຈີນໃນມື້ນີ້ໃຫ້ດີ ກໍຄວນຮັບຮູ້ພັກກອມມູນິດຈີນໃຫ້ດີ. ພວກລູກຫຼານໄດ້ເວົ້າວ່າ: ພັກກອມມູນິດຈີນໄດ້ສຸມກຳລັງເຂົ້າໃນການພັດທະນາເສດຖະກິດ, ການລຶບລ້າງຄວາມທຸກຍາກ ແລະຊ່ວຍເຫຼືອປະເທດອື່ນຕ້ານກັບສະພາບພະຍາດໂຄວິດ-19 ຢ່າງຕັ້ງໜ້າ. ພັກກອມມູນິດຈີນເອົາໃຈໃສ່ເຮັດວຽກເຫຼົ່ານີ້, ກໍ່ຍ້ອນວ່າພັກກອມມູນິດຈີນແມ່ນພັກການເມືອງທີ່ສ້າງຄວາມສຸກໃຫ້ແກ່ປະຊາຊົນຈີນ ທັງແມ່ນພັກການເມືອງທີ່ບຸກບືນສູ້ຊົນເພື່ອຊຸກຍູ້ພາລະກິດຄວາມກ້າວໜ້າຂອງມວນມະນຸດ.
ໃນຈົດໝາຍສະບັບນີ້ຍັງລະບຸວ່າ: ຈີນມີຄຳສຸພາສິດທີ່ວ່າ: ສິບປາກເວົ້າບໍ່ທໍ່ຕາເຫັນ. ຍິນດີຕ້ອນຮັບພວກລູກຫຼານໄປທ່ຽວຊົມແຫ່ງຕ່າງໆພາຍໃນປະເທດຈີນໃຫ້ຫຼາຍ ກວ່າເກົ່າ, ຮັບຮູ້ປະເທດຈີນທີ່ແທ້ຈິງແລະເລິກເຊິ່ງກວ່າເກົ່າ, ແນະນຳຄວາມຄິດເຫັນແລະຄວາມຮູ້ສຶກຂອງຕົນໃຫ້ຫຼາຍຄົນໄດ້ຮັບຮູ້ ເພື່ອເສີມຂະຫຍາຍບົດບາດອັນຕັ້ງໜ້າເຂົ້າໃນການຊຸກຍູ້ການເຊື່ອມສານສາຍພົວພັນທາງຈິດໃຈລະຫວ່າງປະຊາຊົນບັນດາປະເທດ.
ຫວ່າງມໍ່ໆມານີ້, ຜູ້ຕາງໜ້ານັກສຶກສາຕ່າງປະເທດທີ່ຮຽນຢູ່ມະຫາວິທະຍາໄລປັກກິ່ງ 45 ຄົນທີ່ມາຈາກ 32 ປະເທດໄດ້ຂຽນຈົດໝາຍເຖິງທ່ານປະທານສີຈິ້ນຜິງ ໂດຍໄດ້ສົ່ງຄວາມອວຍພອນອັນປະເສີດໃຫ້ກັບການສ້າງຕັ້ງພັກກອມມູນິດຈີນຄົບຮອບ 100 ປີ. ຜ່ານທາງຈົດໝາຍ, ນັກສຶກສາໄດ້ເວົ້າເຖິງຄວາມຮູ້ສຶກຂອງຕົນທີ່ໄດ້ຮ່ຳຮຽນແລະໃຊ້ຊີວິດຢູ່ຈີນ ທັງໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດອັນຍິ່ງໃຫຍ່ຂອງຈີນພາຍໃຕ້ການນຳພາຂອງພັກກອມມູນິດຈີນ ແລະສະແດງຄວາມເຫັນດີຢ່າງສູງຕໍ່ແນວຄວາມຄິດການພັດທະນາທີ່ຖືປະຊາຊົນເປັນໃຈກາງຂອງພັກກອມມູນິດຈີນ.