ວັນທີ 23 ມິຖຸນານີ້, ກອງປະຊຸມລະດັບສູງວ່າດ້ວຍການຮ່ວມມືສາກົນຂອງພາກພື້ນອາຊີປາຊີຟິກ “ໜຶ່ງແລວໜຶ່ງເສັ້ນທາງ” ໄດ້ຈັດຂຶ້ນຜ່ານທາງວິດີໂອ. ຝ່າຍຕ່າງໆທີ່ເຂົ້າຮ່ວມປະຊຸມສະໜັບສະໜູນຈີນເປັນປະທານຈັດກອງປະຊຸມຄັ້ງນີ້, ແລະເຫັນວ່າການຈັດກອງປະຊຸມຄັ້ງນີ້ມີຄວາມສຳຄັນແລະທ່ວງທັນກັບເວລາ, ມີຜົນດີຕໍ່ຫຼາຍຝ່າຍໃນການລົງເລິກການຮ່ວມມືໃນດ້ານການຮັບມືກັບການແຜ່ລະບາດຂອງພະຍາດໂຄວິດ-19, ການຟື້ນຟູເສດຖະກິດຄືນໃໝ່, ການຮັບມືກັບການປ່ຽນແປງຂອງດິນຟ້າອາກາດແລະບັນຫາອື່ນໆຂອງໂລກ, ທັງມີຜົນດີຕໍ່ການຊຸກຍູ້ການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ໃຫ້ມີຄວາມຄືບໜ້າຄັ້ງໃໝ່.
ເປັນຫຍັງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ຮັບຄວາມນິຍົມຢ່າງກວ້າງຂວາງ, ຕົວເລກດັ່ງລຸ່ມນີ້ສະມາດຕອບຄຳຖາມດັ່ງກ່າວໄດ້.
ເລີ່ມແຕ່ທ່ານສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເມື່ອປີ 2013 ເປັນຕົ້ນມາ, ປະເທດທີ່ເຊັນສັນຍາຮ່ວມມື “ໜຶ່ງແລວໜຶ່ງເສັ້ນທາງ” ກັບຈີນໄດ້ມີເຖິງ 140 ປະເທດ. ໃນໄລຍະ 8 ປີຜ່ານມາ, ມູນຄ່າການຄ້າລະຫວ່າງຈີນກັບປະເທດຄູ່ຮ່ວມມື “ໜຶ່ງແລວໜຶ່ງເສັ້ນທາງ” ບັນລຸຫຼາຍກວ່າ 9.200 ຕື້ໂດລາສະຫະລັດ, ວິສາສະກິດຈີນໄດ້ລົງທຶນໂດຍກົງຢູ່ປະເທດລຽບຕາມ “ໜຶ່ງແລວໜຶ່ງເສັ້ນທາງ” ຫຼາຍກວ່າ 130 ຕື້ກວ່າໂດລາສະຫະລັດ. ພາຍຫຼັງເກີດມີການແຜ່ລະບາດຂອງພະຍາດໂຄວິດ -19 ເປັນຕົ້ນມາ, ນັບມາຮອດກາງເດືອນມິຖຸນາປີນີ້, ຈີນໄດ້ສະໜອງຜ້າປິດປາກ 290 ຕື້ກວ່າອັນ, ຊຸດປ້ອງກັນພະຍາດ 3,5 ຕື້ກວ່າຊຸດ, ຢາກວດຫາເຊື້ອພະຍາດ 4,5 ຕື້ກວ່າຊຸດໃຫ້ແກ່ປະເທດຕ່າງໆໃນໂລກ, ໄດ້ຊ່ວຍເຫຼືອຫຼາຍປະເທດສ້າງຫ້ອງທົດລອງເພື່ອກວດຫາເຊື້ອພະຍາດໂຄວິດ-19. ນອກຈາກນັ້ນ, ຈີນຍັງໄດ້ສະໜອງວັກຊີນແລະວັດຖຸຜະລິດວັກຊີນພະຍາດໂຄວິດ-19 ຫຼາຍກວ່າ 400 ລ້ານຫຼອດໃຫ້ແກ່ 90 ກວ່າປະເທດໃນໂລກ, ໃນນັ້ນສ່ວນຫຼາຍແມ່ນປະເທດຄູ່ຮ່ວມມື “ໜຶ່ງແລວໜຶ່ງເສັ້ນທາງ”.
ໃນໄລຍະ 8 ປີຜ່ານມາ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຈາກແຜນແມ່ບົດສູ່ການຈັດຕັ້ງປະຕິບັດໃຫ້ບັນລຸຜົນເປັນຈິງ, ໄດ້ສ້າງໂອກາດແລະຜົນປະໂຫຍດຢ່າງໃຫຍ່ຫຼວງໃຫ້ແກ່ປະເທດຕ່າງໆໃນໂລກ. ພ້ອມກັນນັ້ນ, ຈີນຍິນດີຮ່ວມມືກັບຝ່າຍຕ່າງໆ, ສືບຕໍ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ. ຄືດັ່ງຄຳປາໄສທີ່ເປັນລາຍລັກອັກສອນຂອງທ່ານສີຈິ້ນຜິງ ກ່າວຕໍ່ກອງປະຊຸມລະດັບສູງວ່າດ້ວຍກອງປະຊຸມລະດັບສູງວ່າດ້ວຍການຮ່ວມມືສາກົນຂອງພາກພື້ນອາຊີປາຊີຟິກ “ໜຶ່ງແລວໜຶ່ງເສັ້ນທາງ” ວ່າ: “ຈີນຍິນດີຮ່ວມກັບຝ່າຍຕ່າງໆ, ສ້າງສາຍພົວພັນຄູ່ຮ່ວມມື ‘ໜຶ່ງແລວໜຶ່ງເສັ້ນທາງ’ ທີ່ໃກ້ຊິດກວ່າເກົ່າ, ຍຶດໝັ້ນການເດີນຕາມເສັ້ນທາງທີ່ສາມັກຄີແລະຮ່ວມກັນ, ເຊື່ອມຈອດກັນແລະພັດທະນາຮ່ວມກັນ, ທັງຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.”
ຄຳປາໄສທີ່ເປັນລາຍລັກອັກສອນຂອງທ່ານສີຈິ້ນຜິງ ໃນກອງປະຊຸມຄັ້ງນີ້ກໍໄດ້ຮັບການຕີລາຄາຢ່າງສູງຈາກບຸກຄົນຂອງປະເທດຕ່າງໆໃນພາກພື້ນອາຊີປາຊີຟິກ. ທ່ານນາງ ວາລີ ເວດສະພົງ ຄະນະຊ່ວຍວຽກນາຍົກລັດຖະມົນຕີລາວທັງເປັນຮອງປະທານສະພາອຸດສາຫະກຳການຄ້າລາວໄດ້ເຫັນດີນຳທັດສະນະຂອງທ່ານສີຈິ້ນຜິງ ກ່ຽວກັບການຍຶດໝັ້ນສືບຕໍ່ເດີນຕາມເສັ້ນທາງທີ່ສາມັກຄີແລະຮ່ວມມືກັນ, ເຊື່ອມຈອດກັນແລະພັດທະນາຮ່ວມກັນ. ທ່ານນາງ ວາລີ ເວດສະພົງ ກ່າວວ່າ: ພາຍຫຼັງທາງລົດໄຟລາວ-ຈີນເຊິ່ງເປັນໂຄງການເຊື່ອມຕໍ່ລະຫວ່າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນກັບຍຸດທະສາດ “ຫັນປະເທດທີ່ບໍ່ມີທາງອອກສູ່ທະເລເປັນປະເທດທີ່ເຊື່ອມໂຍງເຊື່ອມຈອດ” ຂອງລາວສ້າງສຳເລັດແລ້ວ, ແລະມີຜົນດີຕໍ່ປະເທດລາວໃນການເຊື່ອມໂຍງກັບຕ່ອງໂສ້ອຸດສາຫະກຳຂອງພາກພື້ນກໍຄືຂອງໂລກ, ຍັງຈະຊຸກຍູ້ການພັດທະນາເສດຖະກິດຂອງພາກພື້ນອີກ. ທ່ານຮາບິດ ຣກາຮະມັນ ຫົວໜ້າສະຖານບັນຄົ້ນຄວ້ານະໂຍບາຍອິສລາມາບັດ ຂອງປາກີສະຖານກ່າວວ່າ: ຂໍ້ລິ່ເລີ່ມ “ໜຶ່ງແລວໜຶ່ງເສັ້ນທາງ” ໄດ້ສ້າງໂອກາດສ້າງວຽກເຮັດງານທຳໃຫ້ກັບປະຊາຊົນປະເທດຕ່າງໆຢ່າງຫຼວງຫຼາຍໂດຍຜ່ານການກໍ່ສ້າງພື້ນຖານໂຄງລ່າງແລະໂຄງການລົງທຶນຂະໜາດໃຫຍ່, ເຮັດໃຫ້ການເຊື່ອມຈອດກັນ ບັນລຸຜົນເປັນຈິງ.
ໃນຄອບຄົວໃຫຍ່ທີ່ຮ່ວມກັນສ້າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ບໍ່ວ່າເປັນປະເທດກຸ່ມເສດຖະກິດໃຫຍ່ຫຼືນ້ອຍ, ປະເທດຄູ່ຮ່ວມມືໃດໆລ້ວນແຕ່ສະເໝີພາບກັນ. ໂຄງການຮ່ວມມືຕ່າງໆທີ່ໄດ້ຈັດຕັ້ງປະຕິບັດນັ້ນ, ລ້ວນແຕ່ບໍ່ມີເງື່ອນໄຂການເມືອງແອບແຟງ. ດັ່ງນັ້ນ, ພວກເຮົາຈຶ່ງເຊື່ອວ່າ, ການສ້າງ “ໜຶ່ງແລວໜຶ່ງເສັ້ນທາງ” ຫຼັກການຂອງການຮ່ວມມືທີ່ປຶກສາຫາລືຮ່ວມກັນ, ກໍ່ສ້າງຮ່ວມກັນແລະແບ່ງປັນຜົນປະໂຫຍດຮ່ວມກັນນັ້ນ, ຈະສາມາດສະໜອງແຜນການແກ້ໄຂບັນຫາການຕ້ານກັບການແຜ່ລະບາດຂອງພະຍາດໂຄວິດ-19 ຂອງພາກພື້ນອາຊີປາຊີຟິກໃຫ້ກັບໂລກ, ທັງເປັນການເພີ່ມພະລັງແຮງຂອງພາກພື້ນອາຊີປາຊີຟິກໃນການເຊື່ອມຈອດກັນກັບໂລກ, ທັງຈະຊ່ວຍເພີ່ມຄວາມໝັ້ນໃຈໃຫ້ກັບການຟື້ນຟູເສດຖະກິດຂອງໂລກໄດ້ຢ່າງຕໍ່ເນື່ອງກໍຄືການປະກອບສ່ວນອັນໃຫຍ່ຫຼວງກວ່າເກົ່າໃນການສ້າງປະຊາຄົມຮ່ວມຊາຕາກຳອາຊີປາຊີຟິກແລະປະຊາຄົມຮ່ວມຊາຕາກຳຂອງມວນມະນຸດ.