ຕອນບ່າຍຂອງວັນທີ 25 ມິຖຸນານີ້, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນພ້ອມດ້ວຍບັນດາສະຫາຍໃນກົມການເມືອງສູນກາງພັກກອມມູນິດຈີນໄດ້ໄປຢ້ຽມຊົມບ່ອນຢູ່ອາໄສໃນອະດີດຂອງທ່ານເໝົາເຈີຕຸ່ງທີ່ຕັ້ງຢູ່ສວນເຟິ່ງເຈີທຳນຽບຈົ່ງນານໄຫນະຄອນຫຼວງປັກກິ່ງ.
ສວນເຟິ່ງເຈີແມ່ນບ່ອນຢູ່ອາໄສໃນອະດີດຂອງທ່ານເໝົາເຈີຕຸ່ງ, ທ່ານໄດ້ເຮັດວຽກ ແລະອາໄສຢູ່ທີ່ນີ້ເປັນເວລາ 17 ປີນັບແຕ່ວັນທີ 21 ກັນຍາປີ 1949, ທ່ານໄດ້ວາງຍຸດທະສາດການເມືອງຢ່າງເປັນລະບົບເພື່ອສະຖາປະນາ ແລະສ້າງສາພັດທະນາສປ ຈີນ.
ທ່ານສີຈິ້ນຜິງໄດ້ເບິ່ງເອກະສານສຳຄັນ, ປຶ້ມ, ເຄື່ອງນຸ່ງ, ເຄື່ອງໃຊ້ໃນຊີວິດປະຈຳວັນ, ຈົດໝາຍ, ເຈ້ຍລ່າມ, ຮູບພາບ ແລະອື່ນໆຂອງທ່ານເໝົາເຈີຕຸ່ງ, ເພື່ອທົບທວນຄືນຄຸນງາມຄວາມດີ ແລະແບບຢ່າງອັນສູງສົ່ງຂອງທ່ານເໝົາເຈີຕຸ່ງ.
ຫຼັງຈາກສິ້ນສຸດການຢ້ຽມຊົມ, ທ່ານສີຈິ້ນຜິງໄດ້ກ່າວເນັ້ນຢູ່ຫ້ອງຮວຍເຣີນຖັງທຳນຽບຈົ່ງນານໄຫວ່າ: ແຕ່ລະເຫດການທາງປະຫວັດສາດ, ວິລະຊົນປະຕິວັດແຕ່ລະທ່ານ, ຈິດໃຈປະຕິວັດທຸກຢ່າງ ແລະວັດຖຸເກົ່າຂອງການປະຕິວັດແຕ່ລະອັນໄດ້ເປັນຕົວແທນໃຫ້ແກ່ຂະບວນວິວັດປະຫວັດສາດທີ່ສະຫງ່າລາສີ ແລະຜົນສຳເລັດອັນຍິ່ງໃຫຍ່ຂອງພັກກອມມູນິດຈີນ, ທັງໄດ້ສະແດງໃຫ້ເຫັນເຖິງຄວາມໃຝ່ຝັນການສະແຫວງຫາ, ຈິດໃຈ ແລະຄວາມຮັບຜິດຊອບ, ການເສຍສະຫຼະ ແລະການອຸທິດຕົນຂອງຊາວພັກກອມມູນິດຈີນ ເຊິ່ງໄດ້ກາຍເປັນສາຍເລືອດປະຕິວັດຂອງພັກກອມມູນິດຈີນ. ສີແດງແມ່ນສີພື້ນຖານທີ່ສົດໃສທີ່ສຸດຂອງພັກກອມມູນິດຈີນ ແລະສປ ຈີນ.
ທ່ານສີຈິ້ນຜິງກ່າວເນັ້ນອີກຄັ້ງໃໝ່່ວ່າ: ປະເທດຊາດກໍແມ່ນປະຊາຊົນ, ປະຊາຊົນກໍແມ່ນປະເທດຊາດ, ການສ້າງຕັ້ງປະເທດ, ປົກປ້ອງປະເທດ ກໍແມ່ນປົກປ້ອງຈິດໃຈຂອງປະຊາຊົນ. ທ່ານສີຈິ້ນຜິງຍັງເວົ້າເຖິງການປະຕິວັດຕົນເອງອີກຄັ້ງໜຶ່ງ. ທ່ານກ່າວວ່າ: ຈິດໃຈປະຕິວັດຕົນເອງແມ່ນເສົາຄ້ຳທີ່ເຂັ້ມແຂງໃນດ້ານຄວາມສາມາດປົກຄອງປະເທດຂອງພັກ. ການນຳພາການປະຕິວັດສັງຄົມໃໝ່ດ້ວຍການປະຕິວັດຕົນເອງຂອງພັກໃນຍຸກໃໝ່ກໍແມ່ນໜ້າທີ່ຄວາມຮັບຜິດຊອບຂອງຊາວພັກກອມມູນິດຈີນໃນຍຸກປັດຈຸບັນນີ້.