ເນື່ອງໃນໂອກາດວັນສ້າງຕັ້ງພັກກອມມູນິດຈີນຄົບຮອບ 100 ປີໃກ້ຈະໝູນວຽນມາເຖິງ, ຄະນະກຳມະການສູນກາງພັກກອມມູນິດຈີນໄດ້ປະດັບຫຼຽນໄຊ 1 ກໍລະກົດ ເຊິ່ງເປັນຫຼຽນກຽດຕິຍົດສູງສຸດພາຍໃນພັກໃຫ້ສະມາຊິກພັກເປັນຄັ້ງທຳອິດ. ພິທີປະດັບຫຼຽນໄດ້ຈັດຂຶ້ນຢູ່ຫໍສະພາປະຊາຊົນແຫ່ງຊາດຈີນໃນວັນທີ 29 ມິຖຸນານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ໃຫ້ກຽດປະດັບຫຼຽນໄຊດ້ວຍຕົນເອງ ແລະ ກ່າວຄຳປາໄສສຳຄັນ.
ຫຼຽນໄຊ 1 ກໍລະກົດມີຈຸດປະສົງຍ້ອງຍໍສັນລະເສີນສະມາຊິກພັກກອມມູນິດຈີນ ທີ່ໄດ້ປະກອບສ່ວນຢ່າງພົ້ນເດັ່ນເຂົ້າໃນວຽກງານຂອງພັກແລະປະຊາຊົນ ແລະ ໄດ້ສ້າງຊັບສົມບັດທາງດ້ານຈິດໃຈທີ່ລ້ຳຄ່າ. ຜູ້ໄດ້ຮັບຫຼຽນໄຊງວດທຳອິດມີທັງໝົດ 29 ທ່ານ, ເຂົາເຈົ້າມາຈາກຂະແໜງການຕ່າງໆຂອງຈີນ, ໃນນັ້ນ, ມີວິລະຊົນຜູ້ໄດ້ສ້າງຄຸນງາມຄວາມດີຊັ້ນພິເສດໂດຍສູ້ຊົນຢ່າງເອົາເປັນເອົາຕາຍເພື່ອປະເທດຊາດໃນສະໄໝສົງຄາມ ແຕ່ພັດປິດບັງຊື່ສຽງຮຽງນາມຂອງຕົນໃນສະໄໝທີ່ມີສັນຕິພາບ; ມີ “ຜູ້ອຳນວຍການໂຮງຮຽນໃນເຂດພູດອຍ” ທີ່ໄປປະຈຳການຢູ່ເຂດພູດອຍທີ່ຫ່າງໄກສອກຫຼີກເປັນເວລາ 40 ກວ່າປີ ແລະ ໄດ້ອຸທິດທຸກສິ່ງທຸກຢ່າງເພື່ອພາລະກິດການສຶກສາ, ມີຜູ້ຕາງໜ້າພິເສດຂອງລັດຖະບານຈີນກ່ຽວກັບວຽກງານອາຟຣິກາຜູ້ທຳອິດ ທີ່ມີອາຍຸຫຼາຍກວ່າ 60 ປີແລ້ວແຕ່ຍັງເສີມຂະຫຍາຍບົດບາດຂອງຕົນເພື່ອລົງເລິກການຮ່ວມມືລະຫວ່າງຈີນແລະອາຟຣິກາ.