ການນຳພາຂອງພັກກອມມູນິດຈີນ ບົດຮຽນສໍາຄັນທີ່ຄວນເອົາເປັນແບບຢ່າງ
ນັບແຕ່ນັ້ນມາ ພາຍໃຕ້ການນໍາພາທີ່ສະຫຼາດສ່ອງໃສ ແລະ ເດັດດ່ຽວໜຽວແໜ້ນຂອງພັກກອມມູນິດຈີນ, ປະຊາຊົນຈີນ ໄດ້ຜ່ານຜ່າຄວາມຫຍຸ້ງຍາກນາໆ ປະການ, ຍາດໄດ້ຜົນສໍາເລັດອັນໃຫຍ່ຫລວງ, ຮອບດ້ານ ແລະ ໜັກແໜ້ນໃນການສ້າງສັງຄົມນິຍົມທີ່ມີສີສັນພິເສດຂອງຈີນ.
ປະເທດຈີນໄດ້ຮັບຜົນສຳເລັດອັນຍິ່ງໃຫຍ່ໃນດ້ານການຫຼຸດຜ່ອນ ແລະ ບັ້ນລຶບລ້າງຄວາມທຸກຍາກ. ມີເມືອງ 832 ເມືອງ, 128.000 ບ້ານ ແລະ ປະຊາຊົນທີ່ຢູ່ໃນມາດຖານຜູ້ທຸກຍາກໃນຊົນນະບົດ 98,99 ລ້ານຄົນ ໄດ້ຫຼຸດພົ້ນອອກຈາກຄວາມທຸກຍາກ ເຮັດໃຫ້ ສປຈີນ ສາມາດແກ້ໄຂບັນຫາຄວາມທຸກຍາກໃນເຂດແຄວ້ນໄດ້ໝົດແລ້ວ.
ພາຍໃຕ້ນະໂຍບາຍການຕ່າງປະເທດອັນຖືກ ຕ້ອງຂອງພັກກອມູນິດຈີນ ໄດ້ເຮັດການພົວພັນຮ່ວມມືລະຫວ່າງ ສປ ຈີນ ກັບຕ່າງປະເທດ ທັງຮູບແບບການຮ່ວມມືສອງຝ່າຍ ແລະ ຫຼາຍຝ່າຍ ນັບມື້ກວ້າງຂວາງ ແລະ ເລິກເຊິ່ງ. ນອກຈາກນີ້ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ພວມໄດ້ຮັບການສະໜັບສະໜູນຢ່າງກວ້າງຂວາງຈາກວົງຄະນາຍາດສາກົນ.
ທາງດ້ານການພົວພັັນຮ່ວມມືກັບຕ່າງປະເທດ ໂດຍສະເພາະການຮ່ວມມືລະຫວ່າງລາວ ແລະ ຈີນ ໄດ້ນຳຜົນປະໂຫຍດມາຍັງປະຊາຊົນສອງປະເທດ. ປັດຈຸບັນ ສປ ຈີນ ເປັນປະເທດທີ່ເຂົ້າມາລົງທຶນຫຼາຍເປັນອັນດັບທີ 1 ຂອງການລົງທຶນຕ່າງປະເທດຢູ່ລາວ. ຂະນະດຽວກັນ ສປຈີນ ເປັນຕະຫລາດສົ່ງອອກສິນຄ້າທີ່ສຳຄັນອັນດັບໜຶ່ງຂອງລາວ. ສ່ວນການເຊື່ອມໂຍງເຂົ້າກັນທາງດ້ານຄົມມະນາຄົມ ແລະ ການຄ້າ ໄດ້ຮັບການພັດທະນາຢ່າງກ້າວກະໂດດ. ໃນນີ້ ທາງດ່ວນສາຍທໍາອິດຂອງລາວໄດ້ເປີດນໍາໃຊ້ຢ່າງເປັນທາງການແລ້ວໃນທ້າຍ ປີ 2020 ຜ່ານມາ, ສ່ວນໂຄງການກໍ່ສ້າງທາງລົດໄຟ ລາວ-ຈີນ ເຊິ່ງເປັນໂຄງການໃຫຍ່ທີ່ສອງລັດຖະບານລາວ ແລະ ຈີນ ຮ່ວມກັນລົງທຶນ ຈະສ້າງສໍາເລັດໃນທ້າຍປີ 2021 ນີ້ ແລະ ຈະປະກອບສ່ວນສໍາຄັນເຮັດໃຫ້ຍຸດທະສາດຂອງລັດຖະບານລາວໃນການຫັນຈາກປະເທດທີ່ບໍ່ມີຊາຍແດນຕິດກັບທະເລ ກາຍເປັນປະເທດເຊື່ອມໂຍງ-ເຊື່ອມຈອດປະກົດຜົນເປັນຈິງ, ທັງຈະປະກອບສ່ວນສໍາຄັນເຂົ້າຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ.
ສາມາດເວົ້າໄດ້ວ່າ: ຜົນສໍາເລັດແບບກ້າວກະໂດດໃນການພັດທະນາປະເທດຊາດຂອງ ສປ ຈີນ ພາຍໃຕ້ການນໍາພາຂອງພັກກອມມູນິດຈີນ ທີ່ເປັນພັກກໍາອໍານາດນັ້ນ ຕະຫລອດ 1 ສັດຕະວັດ ຜ່ານມາ ໄດ້ກາຍເປັນບົດຮຽນ ແລະ ເປັນແບບຢາງທີ່ດີ ເຊິ່ງບໍ່ສະເພາະແຕ່ບັນດາປະເທດທີ່ຢຶດໝັ້ນອຸດົມການເດີນຕາມເສັ້ນທາງສັງຄົມນິຍົມ ກໍ່ຄື ຊາວກອມມູນິດ ແລະ ຊາວຜູ້ອອກແຮງງານ ເທົ່ານັ້ນ, ແຕ່ຍັງລວມເຖີງບັນດາປະເທດໃນໂລກຕື່ມອີກ.
ໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 100 ປີ, ໃນນາມສ່ວນຕົວ ຂ້າພະເຈົ້າ ຂໍສະແດງຄວາມຊົມ ເຊີຍຢ່າງສຸດອົກສຸດໃຈຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານ ທີ່ພັກ, ລັດຖະບານ ແລະ ປະຊາຊົນຈີນຍາດມາໄດ້ຕະຫຼອດໄລຍະທີ່ຜ່ານມາ,ຂໍຫວັງວ່າ ສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ທີ່ມີມາແຕ່ດົນນານນັ້ນ ນັບມື້ນັບໄດ້ຮັບການເສີມຂະຫຍາຍຢ່າງແໜ້ນແຟ້ນຂຶ້ນ.
ຂຽນໂດຍ: ສະຫາຍ ໂພສີ ແກ້ວມະນີວົງ, ຄະນະປະຈໍາພັກກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ເລຂາຄະນະພັກຮາກຖານ, ຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວ