ວັນທີ 8 ກໍລະກົດນີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍກອງທຶນຊ່ວຍເຫຼືອການຮ່ວມມືໃຕ້ໃຕ້ ແລະ ສະຖາບັນການຮ່ວມມື ແລະການພັດທະນາໃຕ້ໃຕ້ທີ່ສ້າງຕັ້ງຂຶ້ນຄົບຮອບ 5 ປີ.
ທ່ານສີຈິ້ນຜິງຊີ້ອອກວ່າ, ໃນໄລຍະ 5 ປີທີ່ຜ່ານມາ, ກອງທຶນຊ່ວຍເຫຼືອການຮ່ວມມືໃຕ້ໃຕ້ໄດ້ຕັ້ງໜ້າສະໜັບສະໜູນປະເທດພວມພັດທະນາຈັດຕັ້ງປະຕິບັດວາລະການພັດທະນາແບບຍືນຍົງຮອດ 2030ຂອງສປຊ, ການຮັບມືກັບວິກິດການດ້ານມະນຸດສະທຳ, ບັນລຸເປົ້າໝາຍດ້ານການຫຼຸດຜ່ອນຄວາມທຸກຍາກ ແລະ ການພັດທະນາ, ສະຖາບັນການຮ່ວມມື ແລະການພັດທະນາໃຕ້ໃຕ້ໄດ້ສຸມໃສ່ການແບ່ງປັນບົດຮຽນດ້ານການປົກຄອງ ແລະ ບໍລິຫານປະເທດຂອງຈີນ ແລະ ປະເທດພວມພັດທະນາ, ໄດ້ບຳລຸງພະນັກງານບໍລິຫານລະດັບສູງໃຫ້ປະເທດພວມພັດທະນາ. ກອງທຶນ ແລະ ສະຖາບັນດັ່ງກ່າວໄດ້ເສີມຂະຫຍາຍບົດບາດທີ່ສຳຄັນໃນການຊຸກຍູ້ການຮ່ວມມືໃຕ້ໃຕ້.
ທ່ານສີຈິ້ນຜິງກ່າວເນັ້ນວ່າ, ຈີນຍິນດີຮ່ວມກັບປະເທດພວມພັດທະນາອັນໄພສານ, ຂຸດຄົ້ນກຳລັງແຮງບົ່ມຊ້ອນຂອງການຮ່ວມມືໃຕ້ໃຕ້ຕື່ມອີກ, ແບ່ງປັນໂອກາດການພັດທະນາຮ່ວມກັນ. ຫວັງວ່າ ກອງທຶນຊ່ວຍເຫຼືອການຮ່ວມມືໃຕ້ໃຕ້ຈະສືບຕໍ່ຊ່ວຍເຫຼືອປະເທດພວມພັດທະນາໃຫ້ບັນລຸເປົ້າໝາຍການພັດທະນາແບບຍືນຍົງ, ສະຖາບັນການຮ່ວມມື ແລະການພັດທະນາໃຕ້ໃຕ້ຈະສືບຕໍ່ສ້າງຖານບຳລຸງສ້າງຜູ້ມີຄວາມຮູ້ຄວາມສາມາດລະດັບສູງ ແລະ ສ້າງເວທີຄົ້ນຄວ້າ ແລະການແລກປ່ຽນສຳລັບປະເທດພວມພັດທະນາໃຫ້ໄດ້ດີ, ປະກອບສ່ວນຫຼາຍກວ່າເກົ່າເຂົ້າໃນການສ້າງປະຊາຄົມຮ່ວມຊາຕາກຳຂອງມວນມະນຸດ.