ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 12 ກໍລະກົດນີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວວ່າ: ມາຮອດປັດຈຸບັນນີ້, ຈີນໄດ້ສະໜອງວັກຊິນ ແລະ ວັດຖຸດິບຜະລິດວັກຊິນໂຄວິດ-19 ລວມທັງໝົດ 500 ລ້ານກວ່າຫຼອດໃຫ້ແກ່ 100 ກວ່າປະເທດ ແລະ ອົງການຈັດຕັ້ງສາກົນ ເຊິ່ງເທົ່າກັບ 1 ສ່ວນ 6 ຂອງຍອດການຜະລິດວັກຊິນໂຄວິດ-19 ຂອງທົ່ວໂລກໃນປັດຈຸບັນ.
ທ່ານກ່າວຕື່ມວ່າ: ຈີນໄດ້ຕັ້ງໜ້າຈັດຕັ້ງປະຕິບັດຕາມຄຳປາໄສສຳຄັນຂອງທ່ານປະທານສີຈິ້ນຜິງ ກ່ຽວກັບການຖືເອົາວັກຊິນເປັນຜະລິດຕະພັນສາທາລະນະຂອງທົ່ວໂລກ ຢ່າງສະເໝີຕົ້ນສະເໝີປາຍ ເພື່ອສະໜອງວັກຊິນໃຫ້ແກ່ຕ່າງປະເທດ. ຈີນແມ່ນປະເທດທີ່ໄດ້ສະໜອງວັກຊິນໂຄວິດ-19 ໃຫ້ປະເທດພວມພັດທະນາຫຼາຍທີ່ສຸດໃນໂລກ, ຄູ່ຮ່ວມມືດ້ານວັກຊິນຂອງຈີນມີຢູ່ໃນຂອບເຂດທົ່ວໂລກ.
ຈີນໄດ້ສະໜັບສະໜູນໃຫ້ວິສາຫະກິດຜະລິດວັກຊິນປະເທດຕົນໂອນເຕັກນິກໃຫ້ແກ່ປະເທດພວມພັດທະນາ ແລະ ດຳເນີນການຮ່ວມມືດ້ານການຜະລິດ. ພາຍໃຕ້ການສະໜັບສະໜູນຂອງລັດຖະບານຈີນ, ວິສາຫະກິດວັກຊິນຈີນໄດ້ເລີ່ມການຮ່ວມມືຜະລິດວັກຊິນຢູ່ສະຫະລັດອາຣັບເອມີເຣດ, ອິນໂດເນເຊຍ, ມາເລເຊຍ, ເອຢິບ, ບຣາຊິນ, ຕວກກີ, ປາກິດສະຖານ ແລະ ແມັກຊິກ ເຊິ່ງມີຈຳນວນການຜະລິດທັງໝົດຫຼາຍກວ່າ 200 ລ້ານຫຼອດ.