ວັນທີ 14 ກໍລະກົດນີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຂ່າວປະຈຳວ່າ, ໃນກອງປະຊຸມສະພາສິດທິມະນຸດອົງການສະຫະປະຊາຊາດຄັ້ງທີ 47 ທີ່ຫາກໍ່ປິດລົງໃນມື້ດຽວກັນ, ຈຳນວນປະເທດທີ່ໄດ້ລົງລາຍເຊັນໃນຄຳປາໄສຮ່ວມເພື່ອສະໜັບສະໜູນປະເທດຈີນໄດ້ເພີ່ມຂຶ້ນຮອດ 68 ປະເທດ.
ທ່ານຈ້າວລີ້ຈ່ຽນໄດ້ແຈ້ງໃຫ້ຮູ້ວ່າ, ຫວ່າງມໍ່ໆມານີ້, ປະເທດນີເຊລີໄດ້ລົງລາຍເຊັນໃນຄຳປາໄສຮ່ວມເພື່ອສະໜັບສະໜູນຈີນ ໃນກອງປະຊຸມສະພາສິດທິມະນຸດອົງການສະຫະປະຊາຊາດຄັ້ງທີ 47, ຝ່າຍຈີນສະແດງຄວາມຍິນດີຕ້ອນຮັບນີເຊລີທີ່ມີຈຸດຢືນຍຸດຕິທຳນີ້. ນອກນີ້ ຍັງມີຫຼາຍປະເທດທີ່ໄດ້ສະໜັບສະໜູນຈີນດ້ວຍຮູບແບບຕ່າງໆ, ເຊັ່ນ: ການກ່າວຄຳປາໄສຝ່າຍດຽວ, ການສົ່ງຈົດໝາຍຮ່ວມເພື່ອສະໜັບສະໜູນແລະອື່ນໆ, ລວມທັງໝົດແລ້ວມີຫຼາຍກວ່າ 90 ປະເທດໄດ້ອອກສຽງທີ່ເປັນທຳໃນສະພາສິດທິມະນຸດອົງການສະຫະປະຊາຊາດ. ເຂົາເຈົ້າກ່າວເນັ້ນວ່າ, ວຽກງານກ່ຽວກັບເຂດຮົງກົງ, ຊິ່ນຈ່ຽງແລະຕິເບດ ແມ່ນວຽກງານພາຍໃນຂອງຈີນ, ຄັດຄ້ານການຫັນບັນຫາສິດທິມະນຸດເປັນບັນຫາການເມືອງແລະການໃຊ້ສອງມາດຖານ.