ນັບມາຮອດຕອນເຊົ້າຂອງວັນທີ 22 ກໍລະກົດນີ້, ຊາວເນັດຈີນຫຼາຍກວ່າ 5 ລ້ານ 5 ແສນຄົນໄດ້ລົງນາມໃນຈົດໝາຍເປີດຜະໜຶກທີ່ປະຊາຊົນຈີນສົ່ງໃຫ້ອົງການອະນາໄມໂລກຫຼື WHO, ໂດຍຮຽກຮ້ອງໃຫ້ WHO ສືບສວນຫ້ອງທົດລອງຊີວະພາບຟອດເດຕຣິກໃນວຽກງານການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ໃນໄລຍະຕໍ່ໄປ, ການເຄື່ອນໄຫວຮ່ວມລົງນາມທາງອິນເຕີເນັດທີ່ລິເລີ່ມໂດຍຊາວເນັດຈີນກໍໄດ້ຮັບຄວາມສົນໃຈຢ່າງກວ້າງຂວາງຈາກສື່ມວນຊົນຕ່າງປະເທດ.
ວັນທີ 21 ກໍລະກົດນີ້ຕາມເວລາທ້ອງຖິ່ນ, ໜັງສືພິມ Russia Today ໄດ້ລາຍງານການເຄື່ອນໄຫວຮ່ວມລົງນາມດັ່ງກ່າວແລະລາຍງານວ່າ: ປີ 2019, ສູນປ້ອງກັນແລະຄວບຄຸມພະຍາດແຫ່ງຊາດອາເມຣິກາຫຼື CDC ເຄີຍຮຽກຮ້ອງໃຫ້ຫ້ອງທົດລອງຊີວະພາບຟອດເດຕຣິກຢຸດຕິການປະຕິບັດງານເປັນການຊົ່ວຄາວຍ້ອນມີ “ຄວາມສ່ຽງດ້ານຄວາມປອດໄພ”. ໃນປີດຽວກັນ, ລັດວິສຄອນຊີນ (Wisconsin)ຂອງອາເມຣິກາກໍເກີດມີ “ພະຍາດອັກເສບປອດຍ້ອນຢາສູບໄຟຟ້າ” ຢ່າງຂະໜາດໃຫຍ່.
ກ່ອນໜ້ານີ້, ຫ້ອງທົດລອງຊີວະພາບຟອດເດຕຣິກແມ່ນສູນຄົ້ນຄວ້າອາວຸດຊີວະພາບຂອງອາເມຣິກາ, ປັດຈຸບັນແມ່ນສະຖາບັນຄົ້ນຄວ້າການແພດພະຍາດຕິດແປດຂອງອາເມຣິກາ, ຢູ່ຫ້ອງທົດລອງດັ່ງກ່າວ, ໄດ້ສະສົມເຊື້ອພະຍາດທີ່ເປັນອັນຕະລາຍຕໍ່ຊີວິດແລະມີລັກສະນະຕິດແປດຮ້າຍແຮງທີ່ສຸດໃນໂລກ. ເດືອນພຶດສະພາປີ 2019, ຫ້ອງທົດລອງຟອດເດຕຣິກຂອງອາເມຣິກາໄດ້ເກີດເຫດການຮົ່ວໄຫຼ. ເດືອນກໍລະກົດປີ 2019, ຫ້ອງທົດລອງຊີວະພາບດັ່ງກ່າວຖືກ CDC ສັ່ງໃຫ້ຢຸດຕິການປະຕິບັດງານ, ແຕ່ວ່າຫຼັງຈາກນັ້ນພຽງ 3 ເດືອນ, ຫ້ອງທົດລອງດັ່ງກ່າວກໍຟື້ນຟູການເຮັດວຽກຄືນໃໝ່ເທື່ອລະກ້າວ. ສິ່ງທີ່ໜ້າສົນໃຈນັ້ນກໍຄື: ໃນໄລຍະປິດການປະຕິບັດງານ, ຢູ່ອາເມຣິກາໄດ້ເກີດມີການແຜ່ລະບາດຂອງພະຍາດລະບົບຫາຍໃຈໂດຍບໍ່ຮູ້ສາເຫດ, ແລະ “ພະຍາດປອດອັກເສບຈາກຢາສູບໄຟຟ້າ” ໄດ້ແຜ່ລະບາດຢ່າງຂະໜາດໃຫຍ່ຢູ່ລັດວິສຄອນຊີນ.
ຫຼັງຈາກນັ້ນ, ພະຍາດໂຄວິດ-19 ເລີ່ມແຜ່ລະບາດຢ່າງຮ້າຍແຮງ, ເດືອນມີນາປີ 2020, ລັດຖະບານອາເມຣິກາໄດ້ລຶບຂ່າວກ່ຽວກັບການປິດຫ້ອງທົດລອງຊີວະພາບຟອດເດຕຣິກທີ່ມີການລາຍງານຂ່າຢ່າງຫຼວງຫຼາຍ. ສິ່ງທີ່ໜ້າສົງໄສກໍຄື: ແຕ່ເດືອນມັງກອນຫາເດືອນຕຸລາປີ 2019, ອາເມຣິກາໄດ້ຈັດການຝຶກຊ້ອມຫຼາຍເທື່ອທີ່ກ່ຽວຂ້ອງກັບ “ເຊື້ອພະຍາດໂຄວິດ” ກ່ອນການແຜ່ລະບາດຂອງພະຍາດໂຄວິດ-19 ເຊິ່ງຄືວ່າເປັນການກະທຳທີ່ຮູ້ລ່ວງໜ້າ, ຫຼັກຖານຕ່າງໆລ້ວນແຕ່ກ່ຽວພັນກັບອາເມຣິກາ, ສະນັ້ນ, ການພົວພັນລະຫວ່າງເຊື້ອພະຍາດໂຄວິດ-19 ແລະຫ້ອງທົດລອງຊີວະພາບຟອດເດຕຣິກຈຶ່ງເຮັດໃຫ້ຄົນທັງຫຼາຍມີຄວາມສົງໄສທີ່ສຸດ.
ຄວາມຈິງຂອງຫ້ອງທົດລອງຊີວະພາບຟອດເດຕຣິກມີຫຍັງຊ້ອນຢູ່, ຄວາມຈິງກ່ຽວກັບເຊື້ອພະຍາດໂຄວິດ-19 ມາຈາກໃສ, ປະຊາຊົນບັນດາປະເທດໃນໂລກມີສິດຮູ້ຄວາມຈິງ. ການສືບສວນຫ້ອງທົດລອງຊີວະພາບຟອດເດເຕຣິກແມ່ນຄວາມຮຽກຮ້ອງຂອງປະຊາຊົນປະເທດຕ່າງໆລວມທັງປະຊາຊົນຈີນ, ແມ່ນບັນຫາທີ່ອາເມຣິກາຕ້ອງໃຫ້ຄຳຕອບໃນບການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19. ອາເມຣິກາຄວນໃຫ້ຄຳຕອບຕາມຄວາມຮຽກຮ້ອງຂອງປະຊາຄົມໂລກ, ແລະອະນຸຍາດໃຫ້ WHO ເຂົ້າໄປສຳຫຼວດໂດຍໄວ, ສືບສວນຫ້ອງທົດລອງຊີວະພາບຟອດເດຕຣິກແລະຫ້ອງທົດລອງຊີວະພາບ 200 ກວ່າແຫ່ງຂອງອາເມຣິກາທີ່ຢັ່ງຢາຍຢູ່ທົ່ວໂລກຢ່າງເຖິງຖອງ, ເພື່ອໃຫ້ຄຳຕອບທີ່ເປັນຈິງກັບປະຊາຄົມໂລກກໍຄືປະຊາຊົນບັນດາປະເທດໃນໂລກ.