ວັນທີ 22 ກໍລະກົດນີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວວ່າ: ປັດຈຸບັນ, ມີ 100 ກວ່າປະເທດໄດ້ອະນຸຍາດໃຫ້ນຳໃຊ້ວັກຊີນໂຄວິດ-19ຂອງຈີນ, ມີຜູ້ນຳຂອງ30 ກວ່າປະເທດໄດ້ສັກວັກຊີນຈີນຢ່າງເປີດເຜີຍ. ບຸກຄົນສຳຄັນດ້ານການເມືອງຂອງຫລາຍປະເທດໄດ້ຕີລາຄາສູງຕໍ່ວັກຊີນຈີນທີ່ໄດ້ປະກອບສ່ວນອັນສຳຄັນເຂົ້າໃນວຽກງານຕ້ານກັບພະຍາດໃນປະເທດຕົນ, ປະຊາຊົນບັນດາປະເທດທີ່ໄດ້ສັກວັກຊີນຈີນກໍໄດ້ຍ້ອງຍໍຊົມເຊີຍວັກຊີນຈີນເຊັ່ນກັນ.
ຕາມການລາຍງານຂ່າວ, ວັນທີ 20 ກໍລະກົດນີ້, ມະຫາວິທະຍາໄລສລີຈາຢາວາເດນາພູລາປະເທດສີລັງກາໄດ້ເປີດເຜີຍບົດລາຍງານຜົນງານຄົ້ນຄວ້າກ່ຽວກັບປະສິດທິຜົນຂອງວັກຊີນໂຄວິດ-19ຊີໂນຟາມຈີນ, ເຊິ່ງສະແດງໃຫ້ເຫັນວ່າ, 95% ຂອງຜູ້ທີ່ໄດ້ສັກວັກຊີນໂຄວິດ-19ຊີໂນຟາມສອງເຂັ້ມແລ້ວ ສາມາດມີພູມຕ້ານທານໄດ້. ຜົນການຄົ້ນຄວ້າຍັງກວດພົບວ່າ, ວັກຊີນຊີໂນຟາມມີປະສິດທິຜົນຫລາຍໃນການຕ້ານໄວຣັດກາຍພັນ “ເດວຕາ”.
ໃນເວລາຕອບຄຳຖາມທີ່ກ່ຽວຂ້ອງ, ທ່ານຈ້າວລີ້ຈ່ຽນກ່າວວ່າ: ມີຫາງສຽງທີ່ມີສະຕິສຳປະຊັນຍະ ແລະຕາມວິທະຍາສາດນັບມື້ນັບຫລາຍຂຶ້ນໄດ້ຢືນຢັນປະສິດທິຜົນຂອງວັກຊີນຈີນ, ເຊິ່ງສະແດງໃຫ້ເຫັນຢ່າງເຕັມທີ່ວ່າ: ວັກຊີນຈີນແມ່ນມີປະສິດທິຜົນ ແລະມີຄວາມປອດໄພ.
ທ່ານຈ້າວລີ້ຈ່ຽນກ່າວເນັ້ນວ່າ: ຈີນມີຈຸດຢືນຢາກລົງເລິກການຮ່ວມມືສາກົນດ້ານວັກຊີນຢ່າງສະເໝີຕົ້ນສະເໝີປາຍ, ຮັບປະກັນມຫເວັກຊີນສາມາດສົ່ງໄປເຖິງປະເທດພວມພັດທະນາ ແລະໃຫ້ປະເທດພວມພັດທະນາສາມາດຊື້ໄດ້, ເຮັດໃຫ້ວັກຊີນກາຍເປັນຜະລິດຕະພັນສາທາລະນະຂອງໂລກ. ມາຮອດປັດຈຸບັນ, ຈີນໄດ້ສະໜອງວັກຊີນ 500 ກວ່າລ້ານຫລອດໃຫ້ແກ່ 100 ກວ່າປະເທດ ແລະອົງການຈັດຕັ້ງສາກົນ.