ວັນທີ 26 ກໍລະກົດນີ້, ຢູ່ນະຄອນທ່ຽນສິນປະເທດຈີນ, ໃນເວລາທ່ານວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງເວນດີ ເຊີແມນ ຮອງລັດຖະມົນຕີກະຊວງການຕ່າງປະເທດອາເມຣິກາ, ທ່ານມີຂໍ້ສະເໜີ 3 ຂໍ້ ແລະ ກຳນົດເສັ້ນຕ່ຳສຸດ 3 ເສັ້ນຢ່າງຈະແຈ້ງຂອງການພົວພັນຈີນ-ອາເມຣິກາ ເພື່ອຄຸ້ມຄອງແລະຄວບຄຸມຄວາມຂັດແຍ້ງໃຫ້ບັງເກີດຜົນ ແລະ ປ້ອງກັນບໍ່ໃຫ້ການພົວພັນຈີນ-ອາເມຣິກາຢູ່ນອກການຄວບຄຸມ ຄື:
-
ອາເມຣິກາບໍ່ຄວນທ້າທາຍເກາະຜິດ, ກ່າວໂຈມຕີ ຈົນເຖິງຂັ້ນມີເຈດຕະນາຫວັງໂຄ່ນລົ້ມເສັ້ນທາງແລະລະບອບສັງຄົມນິຍົມທີ່ມີສີສັນພິເສດຂອງຈີນ. ເສັ້ນທາງແລະລະບອບການເມືອງຂອງຈີນເປັນການເລືອກເຟັ້ນຂອງປະຫວັດສາດ, ແມ່ນຜົນປະໂຫຍດແກນກາງທີ່ຈີນຕ້ອງສືບຕໍ່ຍຶດໝັ້ນ.
-
ອາເມຣິກາບໍ່ຄວນສະກັດກັ້ນ ຫຼື ຂັດຂວາງຂະບວນການພັດທະນາຂອງຈີນ. ຈີນທວງໃຫ້ອາເມຣິກາຄວນຍົກເລີກການຂວ້ຳບາດແຕ່ຝ່າຍດຽວ, ຍົກເລີກການຂຶ້ນພາສີຢ່າງສູງ, ຢຸດເຊົາພຶດຕິກຳຍື່ນມືເຂົ້າມາແຊກແຊງ ແລະ ຍົກເລີກການອັດຕັນທາງວິທະຍາສາດເຕັກນິກໝົດທຸກດ້ານຂອງຈີນ.
-
ອາເມຣິກາບໍ່ຄວນລ່ວງລ້ຳອະທິປະໄຕແຫ່ງຊາດຂອງຈີນ, ຍິ່ງກວ່ານັ້ນກໍບໍ່ຄວນທຳລາຍຜືນແຜ່ນດິນອັນຄົບຖ້ວນຂອງຈີນ. ບັນຫາທີ່ກ່ຽວຂ້ອງກັບຊິນຈ່ຽງ, ບັນຫາພົວພັນກັບຕິເບດ ແລະ ບັນຫາທີ່ກ່ຽວຂ້ອງກັບຮົງກົງ ລ້ວນແຕ່ແມ່ນບັນຫາໃຫຍ່ທີ່ພົວພັນເຖິງກຸ່ມຕໍ່ຕ້ານ ຄື: “ອິດທິກຳລັງແບ່ງແຍກຊິນຈ່ຽງເປັນເອກະລາດ”, “ອິດທິກຳລັງແບ່ງແຍກຕິເບດເປັນເອກະລາດ” ແລະ “ອິດທິກຳລັງແບ່ງແຍກຮົງກົງເປັນເອກະລາດ, ປະເທດໃດໆກໍຕາມລ້ວນແຕ່ຈະບໍ່ອະນຸຍາດໃຫ້ຄວາມໝັ້ນຄົງ ແລະ ອະທິປະໄຕແຫ່ງຊາດຕົນຖືກທຳລາຍ.