ວັນທີ 8 ສິງຫານີ້ແມ່ນ “ວັນອອກກຳລັງກາຍທົ່ວປວງຊົນ” ຄັ້ງທີ 13 ຂອງຈີນ, ງານກິລາໂອລິມປິກໂຕກຽວກໍໄດ້ສິ້ນສຸດລົງໃນມື້ດຽວກັນ.
ຕະຫຼອດໄລຍະ 16 ວັນຂອງງານກິລາໂອລິມປິກໂຕກຽວ, ນັກກິລາຈີນໄດ້ສູ້ຊົນຜ່ານຜ່າໃນການແຂ່ງຂັນກິລາລະດັບໂລກ ເຊິ່ງສາມາດຊີງໄດ້ຫຼຽນຄຳ 38 ຫຼຽນ, ຫຼຽນເງິນ 32 ຫຼຽນ ແລະ ຫຼຽນທອງ 18 ຫຼຽນ ເຊິ່ງຢູ່ອັນດັບສອງຂອງປະເທດທີ່ໄດ້ຫຼຽນຄຳ ແລະ ເປັນອັນດັບສອງຂອງປະເທດທີ່ໄດ້ຮັບຫຼຽນທັງໝົດ. ສິ່ງທີ່ໜ້າຊົມເຊີຍຍິນດີນັ້ນກໍຄື: ນັກກິລາຈີນມີຄວາມໂດດເດັ່ນຂຶ້ນໃນລາຍການທີ່ເຄີຍເຮັດບໍ່ໄດ້ດີຈຳນວນໜຶ່ງໃນເມື່ອກ່ອນ.
ຄຽງຄູ່ກັບງານກິລາໂອລິມປິກໂຕກຽວສິ້ນສຸດລົງ, ນັກກິລາຈີນທີ່ສູ້ຊົນຜ່ານຜ່າໃນງານກິລາໂອລິມປິກຄັ້ງນີ້ກໍໄດ້ເຮັດສຳເລັດໜ້າທີ່ຂອງຕົນຢ່າງສະຫງ່າງາມ, ຍິ່ງເປັນການກະຕຸ້ນຄວາມກະຕືລືລົ້ນໃນການສະໜັບສະໜູນກິລາໂອລິມປິກ ແລະ ການເຂົ້າຮ່ວມການອອກກຳລັງກາຍຂອງປະຊາຊົນຈີນໃຫ້ສູງຂຶ້ນເລື້ອຍໆ, ອີກດ້ານໜຶ່ງກໍຍ້ອນວ່າ, ວັນທີ 8 ສິງຫານີ້ກໍແມ່ນ “ວັນອອກກຳລັງກາຍທົ່ວປວງຊົນຂອງຈີນ” ໄດ້ໝູນວຽນມາເຖິງອີກຄັ້ງໜຶ່ງ.
ຖ້າເວົ້າວ່າງານກິລາໂອລິມປິກ 4 ປີໃດກໍຈັດຂຶ້ນຄັ້ງໜຶ່ງ ແລະ ຖືເປັນ “ງານມະໂຫລານທີ່ສາຍຕາຊາວໂລກຂາດບໍ່ໄດ້”, ຄັນຊັ້ນ, ການອອກກຳລັງກາຍທົ່ວປວງຊົນກໍ່ເປັນສິ່ງທີ່ປະຊາຊົນສາມັນທຳມະດາທຸກຄົນຂາດບໍ່ໄດ້ໃນຊີວິດປະຈຳວັນເຊັ່ນກັນ, ມັນສຳຄັນແທ້ໆ. ຫົວຂໍ້ຂອງ “ວັນອອກກຳລັງກາຍ” ປີນີ້ແມ່ນ: ການອອກກຳລັງກາຍທົ່ວປວງຊົນຄູ່ຂະໜານກັບງານກິລາໂອລິມປິກ. ເມື່ອນັກກິລາທັງຫຼາຍສູ້ຊົນຜ່ານຜ່າໃນງານກິລາໂອລິມປິກໂຕກຽວ, ຄົນທັງຫຼາຍກໍໃຫ້ກຳລັງໃຈແກ່ນັກກິລາດ້ວຍວິທີທີ່ແຕກຕ່າງກັນ, ເຊັ່ນ: “ທີມບານສົ່ງຍິງຈີນ, ສູູ້ສູ້”, “ບໍ່ວ່າຜົນງານຈະເປັນຈັ່ງໃດ, ພວກເຈົ້າລ້ວນແຕ່ເປັນນັກກິລາດີເດັ່ນຂອງຈີນ” ເຫຼົ່ານີ້ເປັນຕົ້ນ ເຊິ່ງໄດ້ພົບເຫັນເລື້ອຍໆຢູ່ຕາມສື່ສັງຄົມອອນລາຍ.
ເນື່ອງໃນໂອກາດວັນອອກກຳລັງກາຍທົ່ວປວງຊົນໝູນວຽນມາເຖິງອີກຄັ້ງໜຶ່ງ, ຄົນທັງຫຼາຍກໍໄດ້ຫັນຄວາມສົນໃຈແລະສະໜັບສະໜູນງານກິລາໂອລິມປິກມາສູ່ການອອກກຳລັງກາຍທົ່ວປວງຊົນ, ເຮັດໃຫ້ການອອກກຳລັງກາຍທົ່ວປວງຊົນເຊື່ອມໂຍງເຂົ້າກັບສຸຂະພາບທົ່ວປວງຊົນໄດ້ຢ່າງເລິກເຊິ່ງ, ຈັດຕັ້ງຜັນຂະຫຍາຍແບບແຜນດຳລົງຊີວິດແລະແບບແຜນເຮັດວຽກທີ່ຕັ້ງໜ້າ, ການເຂົ້າຮ່ວມການອອກກຳລັງກາຍທົ່ວປວງຊົນດ້ວຍການກະທຳຕົວຈິງ.
ຢູ່ແຄມຄອງນ້ຳໃຫຍ່ຮວຍອ່ານແຂວງຈ່ຽງຊູ່ຈີນ, ນັກກິລາສະໝັກຫຼິ້ນ 1.300 ກວ່າຄົນໄດ້ແຂ່ງຂັນກັນຍ່າງທ່າມກາງຝົນລິນ, ເປັນພຽງການສ້າງບັນຍາກາດມ່ວນຊື່ນໃນການອອກກຳລັງກາຍ; ຢູ່ໃນກິດຈະກຳສະແດງຄວາມສາມາດດ້ານກິລາທີ່ມີຫົວຂໍ້ວ່າ “ຂ້ອຍຢາກເຂົ້າຮ່ວມງານກິລາທົ່ວປະເທດ” ທີ່ຈັດຂຶ້ນຢູ່ແຂວງສ້ານຊີຈີນ, ມີ 2.000 ກວ່າຄົນໄດ້ເຂົ້າຮ່ວມການຫຼິ້ນກິລາຟັນດາບ, ການເຕັ້ນເຊືອກ, ມວຍອູຊູ້ ແລະ ອື່ນໆ ເພື່ອຕ້ອນຮັບງານກິລາທົ່ວປະເທດຈີນທີ່ຈະຈັດຂຶ້ນໃນປີໜ້າ; ຢູ່ນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີ, ມີສະໜາມກິລາ ແລະ ສະໜາມກິລາໃນຫົ່ມຫຼາຍແຫ່ງໄດ້ເປີດບໍລິການໂດຍບໍ່ເກັບຄ່າ ເພື່ອດຶງດູດປະຊາຊົນເຂົ້າຮ່ວມການອອກກຳລັງກາຍທົ່ວປວງຊົນ. ສ່ວນສະຫະພັນສະກີຈີນໄດ້ຈັດກິດຈະກຳຫຼິ້ນກິລາຫິມະແລະນ້ຳກ້ອນ ໃນວັນອອກກຳລັງກາຍທົ່ວປວງຊົນ ເພື່ອຕ້ອນຮັບງານກິລາໂອລິມປິກລະດູໜາວປັກກິ່ງ ທີ່ຈະຈັດຂຶ້ນໃນປີ 2022.
ລະດັບການພັດທະນາກິລາ ຈະເປັນການສ່ອງແສງໃຫ້ເຫັນເຖິງລະດັບການພັດທະນາສັງຄົມຂອງປະເທດໃດໜຶ່ງໃນລະດັບໃດໜຶ່ງ. ກິລາແມ່ນຄວາມໃຝ່ຝັນຂອງຈີນໃນການສ້າງຄວາມເຂັ້ມແຂງໃຫ້ກັບປະເທດຊາດ ແລະ ຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ, ສຸຂະພາບຈະພົວພັນເຖິງຄວາມສຸກຂອງທຸກຄອບຄົວ ແລະ ພົວພັນເຖິງອະນາຄົດຂອງປະເທດຊາດ ແລະ ຊົນຊາດຈີນ. ອາດເວົ້າໄດ້ວ່າ: ການອອກກຳລັງກາຍທົ່ວປວງຊົນໄດ້ຕິດພັນກັບຊີວິດປະຈຳວັນຂອງໝົດທຸກຄົນຢ່າງແໜ້ນແຟ້ນ. ຍ້ອນງານກິລາໂອລິມປິກ, ເຮັດໃຫ້ຄົນຈີນນັບມື້ນັບຫຼາຍມີສະຕິແລະມີຄວາມກະຕືລືລົ້ນໃນການອອກກຳລັງກາຍ, ຈີນໄດ້ຢ່ວງບາດກ້າວໃໝ່ໄປສູ່ເປົ້າໝາຍສ້າງປະເທດໃຫ້ເປັນປະເທດທີ່ເຂັ້ມແຂງດ້ານກິລາຢ່າງບໍ່ຢຸດຢັ້ງ.