ກະຊວງການຄ້າຈີນໄດ້ເຜີຍແຜ່ຕົວເລກສະຖິຕິໃນວັນທີ 16 ສິງຫານີ້ວ່າ: 7 ເດືອນຕົ້ນປີ 2021 ນີ້, ທົ່ວປະເທດຈີນສາມາດດຶງດູດການລົງທຶນຕົວຈິງຂອງຕ່າງປະເທດໄດ້ 672,19 ຕື້ຢວນ, ເພີ່ມຂຶ້ນ 25,5% ເມື່ອທຽບໃສ່ 7 ເດືອນຕົ້ນປີ 2020, ເພີ່ມຂຶ້ນ 26,1% ເມື່ອທຽບໃສ່ 7 ເດືອນຕົ້ນປີ 2019.
ເມື່ອເບິ່ງຈາກຂະແໜງການແລ້ວເຫັນວ່າ, ຂະແໜງການບໍລິການສາມາດດຶງດູດການລົງທຶນຂອງຕ່າງປະເທດໄດ້ 535,57 ຕື້ຢວນ, ໄດ້ເພີ່ມຂຶ້ນ 29,2% ເມື່ອທຽບໃສ່ໄລຍະດຽວກັນຂອງປີ 2020,ເຊິ່ງກວມ 79,7% ຂອງການດຶງດູດການລົງທຶນຕົວຈິງຂອງຕ່າງປະເທດທັງໝົດ. ໃນນັ້ນ, ຂະແໜງການຂາຍຍ່ອຍແລະ ຂາຍຍົກ, ຂະແໜງການການຄົ້ນຄວ້າດ້ານວິທະຍາສາດແລະການບໍລິການດ້ານ ເຕັກໂນໂລຊີ, ຂະແໜງການຊອຟແວການແລກປ່ຽນຂໍ້ມູນຂ່າວສານແລະ ການບໍລິການດ້ານເຕັກໂນໂລຊີຂໍ້ມູນຂ່າວສານໄດ້ເພີ່ມຂຶ້ນຢ່າງວ່ອງໄວ.
ມູນຄ່າການດຶງດູດການລົງທຶນຕົວຈິງຂອງຕ່າງປະເທດໃນຂະແໜງການເຕັກໂນ ໂລຊີຊັ້ນສູງໄດ້ເພີ່ມຂຶ້ນ 34,1%, ໃນນັ້ນຂະແໜງການຜະລິດດ້ານເຕັກໂນໂລຊີ ຊັ້ນສູງ, ຂະແໜງການການບໍລິການທີ່ນຳໃຊ້ເຕັກໂນໂລຊີຊັ້ນສູງໄດ້ເພີ່ມຂຶ້ນ ໄວສົມຄວນ.
ເມື່ອເບິ່ງຈາກແຫຼ່ງທຶນ, ທຶນຈາກປະເທດທີ່ຢູ່ລຽບຕາມ “ໜຶ່ງແລວໜຶ່ງເສັ້ນທາງ” ເພີ່ມຂຶ້ນ 46,3%, ທຶນຈາກປະເທດອາຊຽນເພີ່ມຂຶ້ນ 46,3%.