ວັນທີ 18 ສິງຫານີ້, ທ່ານຈ້າວລີຈ່ຽນ ໂຄສົກກະຊວງການຕ່າງປະເທດຈີນໄດ້ຕອບຄຳຖາມກ່ຽວກັບສະຖານະການໃນອັຟການີສະຖານໃນກອງປະຊຸມຖະແຫຼງຂ່າວວ່າ: ຈີນຫວັງວ່າກຸ່ມຕາລີບັນຂອງອັຟການີສະຖານຈະສົນທະນາແລະປຶກສາຫາລືກັບຝ່າຍຕ່າງໆ ເພື່ອຈັດຕັ້ງລັດຖະບານແບບເປີດປະຕູທີ່ປະກອບດ້ວຍຫຼາຍຝ່າຍ.
ກ່ອນໜ້ານີ້, ໂຄສົກກຸ່ມຕາລີບັນຂອງອັຟການີສະຖານໄດ້ກ່າວໃນກອງປະຊຸມຖະແຫຼງຂ່າວວ່າ: ກຸ່ມຕາລີບັນບໍ່ຢາກເຮັດສົງຄາມກັບຝ່າຍໃດໆ ແລະກໍບໍ່ຢາກເປັນສັດຕູກັບໃຜທັງພາຍໃນແລະຕ່າງປະເທດ, ກຸ່ມຕາລີບັນຈະເຄົາລົບສິດແມ່ຍິງຕາມຂອບສາສະໜາອິສລາມ, ສະແຫວງຫາການສ້າງສາຍພົວພັນທີ່ດີງາມກັບປະເທດອື່ນ ແລະມີແຜນການຈະສ້າງຕັ້ງລັດຖະບານທີ່ປະກອບດ້ວຍຫຼາຍຝ່າຍຢູ່ອັຟການີສະຖານ.
ໃນເວລາຕອບຄຳຖາມກ່ຽວກັບເລື່ອງນີ້, ທ່ານຈ້າວລີ້ຈ່ຽນກ່າວວ່າ: ຈີນໄດ້ເອົາໃຈໃສ່ຕິດຕາມຄວາມເຫັນທີ່ກ່ຽວຂ້ອງຂອງກຸ່ມຕາລີບັນຂອງອັຟການີສະຖານ, ພວກເຮົາກໍຫວັງວ່າ ກຸ່ມຕາລີບັນຈະໂຈມຕີລັດທິກໍ່ການຮ້ານທຸກຮູບແບບຢ່າງເດັດດ່ຽວ, ປະຕິບັດຕາມຄຳໝັ້ນສັນຍາຂອງຕົນ ທີ່ບໍ່ອະນຸຍາດໃຫ້ອິດທິກຳລັງໃດໆໃຊ້ດິນແດນອັຟການີສະຖານເພື່ອສ້າງໄພຂົ່ມຂູ່ຕໍ່ຄວາມໝັ້ນຄົງຂອງປະເທດໃກ້ຄຽງໄດ້ຢ່າງແທ້ຈິງ. ຈີນຈະສືບຕໍ່ຮ່ວມກັບປະຊາຄົມໂລກ, ສະໜັບສະໜູນການສ້າງສາອັຟການີສະຖານຄືນໃໝ່ໂດຍສັນຕິ, ຊ່ວຍເຫຼືອອັຟການີສະຖານບັນລຸສັນຕິພາບແລະສະຖຽນລະພາບຖາວອນ.