ຕາມຂ່າວCRI：ວັນທີ 18 ສິງຫານີ້, ທ່ານສີຈິ້ນຜີງ, ປະທານປະເທດຈີນໄດ້ສົນທະນາທາງໂທລະສັບກັບທ່ານບາຮາມ ອາເມັດ ຊາລີ, ປະທານາທິບໍດີອີຣັກ.
ທ່ານສີຈິ້ນຜີງກ່າວເນັ້ນວ່າ, ຈີນເດັດດ່ຽວສະໜັບສະໜູນອີຣັກໃນການປົກປ້ອງອະທິປະໄຕ, ເອກະລາດແລະຜືນແຜ່ນດິນອັນຄົບຖ້ວນຂອງຊາດຕົນ, ສະໜັບສະໜູນ ອີຣັກໃນການຕໍ່ຕ້ານລັດທິກໍ່ການຮ້າຍ, ປົກປັກຮັກສາຄວາມໝັ້ນຄົງແລະສະຖຽນລະພາບຂອງຊາດ, ສະໜັບສະໜູນປະຊາຊົນອີຣັກເລືອກເສັ້ນທາງການພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ, ຄັດຄ້ານອິດທິກຳລັງພາຍນອກໃດໆທີ່ຢາກແຊກແຊງເຂົ້າໃນວຽກງານພາຍໃນອີຣັກ. ຫວັງວ່າພັກການເມືອງຕ່າງໆຂອງອີຣັກຈະເພີ່ມທະວີຄວາມສາມັກຄີກັນ, ຊຸກຍູ້ໃຫ້ຂະບວນການທາງການເມືອງພາຍໃນປະເທດໄດ້ຮັບຄວາມຄືບໜ້າໃໝ່, ບັນລຸຄວາມໝັ້ນຄົງຖາວອນແລະການພັດທະນາຄວາມຈະເລີນຮຸ່ງເຮືອງ. ຈີນຍິນດີຮ່ວມກັນກັບປະເທດເພື່ອນມິດລວມທັງອີຣັກ, ຊຸກຍູ້ສັນຕິພາບແລະການພັດທະນາຮ່ວມກັນ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ທ່ານບາຮາມ ອາເມັດ ຊາລີກ່າວວ່າ, ອີຣັກເຂົ້າໃຈຝ່າຍຈີນທີ່ໄດ້ນຳໃຊ້ມາດຕະການເພື່ອປົກປ້ອງອະທິປະໄຕແຫ່ງຊາດ, ຄວາມໝັ້ນຄົງແລະຜືນແຜ່ນດິນອັນຄົບຖ້ວນ, ເດັດດ່ຽວຍຶດໝັ້ນໃນນະໂຍບາຍປະເທດຈີນດຽວ. ອີຣັກຍິນດີເພີ່ມທະວີການແລກປ່ຽນທາງດ້ານຍຸດທະສາດຢ່າງແໜ້ນແຟ້ນກັບຈີນ, ຮ່ວມກັນຮັບມືກັບການປ່ຽນແປງທີ່ເກີດຂຶ້ນຢ່າງວ່ອງໄວກ່ຽວກັບສະຖານະການສາກົນແລະພາກພື້ນ, ຮ່ວມມືກັນຕໍ່ຕ້ານລັດທິການກໍ່ການຮ້າຍ, ປົກປັກຮັກສາສັນຕິພາບແລະສະຖຽນລະພາບຂອງພາກພື້ນກໍ່ຄືຂອງໂລກ.