ໂດຍແນໃສ່ຕໍ່ກໍລະນີທີ່ອົງການຂ່າວລັບອາເມຣິກາຈະປະກາດບົດລາຍງານຜົນການສືບສວນແລະວິເຄາະແຫຼ່ງກຳເນີດຂອງເຊື້ອພະຍາດໂຄວິດ-19, ທ່ານວ່າງເຫວີນປິ່ນ ໂຄສົກກະຊວງການຕ່າງປະເທດຈີນ ໄດ້ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 24 ສິງຫານີ້ວ່າ: ການຄົ້ນຫາແຫຼ່ງກຳເນີດຂອງເຊື້ອພະຍາດໂຄວິດ-19 ເປັນເລື່ອງທີ່ຕ້ອງການຄວາມສາມັກຄີ ຫາກບໍ່ແມ່ນອາຄາດມາດຮ້າຍ.
ຂ່າວລາຍງານວ່າ: ທ່ານນາງເຈນ ປະຊາກີ ໂຄສົກທຳນຽມຂາວອາເມຣິກາ ໄດ້ກ່າວໃນວັນທີ 23 ສິງຫານີ້ວ່າ: ທ່ານໂຈ ໄບເດັນ ປະທານາທິບໍດີອາເມຣິກາ ໄດ້ສັ່ງໃຫ້ອົງການຂ່າວລັບສືບສວນແລະເຮັດບົດລາຍງານຜົນການສືບສວນແລະວິເຄາະແຫຼ່ງກຳເນີດຂອງເຊື້ອພະຍາດໂຄວິດ-19 ເຊິ່ງບົດລາຍງານນີ້ຄາດວ່າຈະເຮັດສຳເລັດພາຍໃນວັນທີ 24 ສິງຫານີ້ ແຕ່ຍັງຕ້ອງການເວລາຫຼາຍມື້ຈຶ່ງຈະສາມາດເຮັດສະບັບທີ່ສາມາດເປີດເຜີຍຕໍ່ພາຍນອກໄດ້ສຳເລັດ.
ຕໍ່ກັບກໍລະນີດັ່ງກ່າວ, ທ່ານວ່າງເຫວີນປິ່ນ ໄດ້ຕອບຄຳຖາມຂອງນັກຂ່າວ ໂດຍຊີ້ໃຫ້ເຫັນວ່າ: ການຄົ້ນຫາແຫຼ່ງກຳເນີດຂອງເຊື້ອພະຍາດໂຄວິດ-19 ຕ້ອງການຄວາມຮູ້ທາງວິທະຍາສາດ ຫາກບໍ່ແມ່ນຂ່າວລັບ, ການໃຫ້ອົງການຂ່າວລັບໄປດຳເນີນການຄົ້ນຫາແຫຼ່ງກຳເນີດຂອງເຊື້ອພະຍາດໂຄວິດ-19 ກໍເປັນການກະທຳທີ່ຝືນກັບຫຼັກວິທະຍາສາດຢູ່ແລ້ວ. ຕັ້ງແຕ່ໃດມາ, ອົງການຂ່າວລັບຂອງອາເມຣິກາກໍມີການກະທຳທີ່ຊົ່ວຮ້າຍຕະຫຼອດ, ອັນທີ່ວ່າບົດລາຍງານການຄົ້ນຫາແຫຼ່ງກຳເນີດຂອງເຊື້ອພະຍາດໂຄວິດ-19 ຂອງເຂົາ ຍິ່ງບໍ່ອາດຈະເຮັດຂຶ້ນບົນພື້ນຖານຄວາມເປັນຈິງ. ເພື່ອຈຸດປະສົງທາງການເມືອງຂອງຕົນທີ່ບໍ່ສາມາດບອກໃຫ້ຜູ້ອື່ນຮູ້, ສະນັ້ນໃນບັນຫາການຄົ້ນຫາແຫຼ່ງກຳເນີດຂອງເຊື້ອພະຍາດໂຄວິດ-19, ອາເມຣິກາຈຶ່ງໃຫ້ອົງການຂ່າວລັບປະເທດຕົນໄປດຳເນີນການສືບສວນ ເຊິ່ງເປັນການທຳລາຍການຮ່ວມມືສາກົນເພື່ອຄົ້ນຫາແຫຼ່ງກຳເນີດຂອງເຊື້ອພະຍາດ ແລະ ຖືກສົງໄສແລະຄັດຄ້ານໂດຍທົ່ວໄປຈາກສາກົນ.