ວັນທີ 29 ສິງຫານີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ສົນທະນາຜ່ານທາງໂທລະສັບກັບທ່ານອັນໂຕນີ ບລິນເກນ ລັດຖະມົນຕີກະຊວງການຕ່າງປະເທດອາເມຣິກາ ເຊິ່ງສອງຝ່າຍໄດ້ແລກປ່ຽນຄວາມຄິດເຫັນກ່ຽວກັບສະຖານະການຢູ່ອັຟການິສະຖານ ແລະສາຍພົວພັນຈີນ-ອາເມຣິກາ.
ທ່ານບລິນເກນກ່າວວ່າ: ໃນຈຸດເວລາທີ່ສຳຄັນທີ່ອາເມຣິກາຖອນທະຫານ ແລະຍົກຍ້າຍຊາວອາເມຣິກາອອກຈາກອັຟການິສະຖານໃກ້ຈະສຳເລັດແລ້ວ, ສະພາຄວາມໝັ້ນຄົງຂອງອົງການສະຫະປະຊາຊາດຄວນຮ່ວມກັນອອກສຽງຢ່າງຈະແຈ້ງ, ສະແດງໃຫ້ເຫັນວ່າ: ປະຊາຄົມໂລກຄາດຫວັງວ່າກຸ່ມຕາລີບັນຈະຮັບປະກັນການຍົກຍ້າຍພົນລະເມືອງຕ່າງປະເທດຢ່າງປອດໄພ, ຮັບປະກັນໃຫ້ປະຊາຊົນອັຟການິສະຖານສາມາດໄດ້ຮັບການຊ່ວຍເຫຼືອມະນຸດສະທຳ, ຮັບປະກັນໃຫ້ຜືນແຜ່ນດິນອັຟການິສະຖານບໍ່ກາຍເປັນແຫຼ່ງສະສົມການໂຈມຕີແບບກໍ່ການຮ້າຍ, ແລະບໍ່ກາຍເປັນແດນສະຫວັນທີ່ປອດໄພສຳລັບລັດທິກໍ່ການຮ້າຍ.
ທ່ານຫວາງຢີ້ກ່າວວ່າ: ສະຖານະການພາຍໃນອັຟການິສະຖານພວມຢູ່ໃນໄລຍະປ່ຽນແປງໂດຍພື້ນຖານ, ມີຄວາມຈຳເປັນທີ່ໃຫ້ບັນດາຝ່າຍຕ້ອງມີການພົວພັນກັບກຸ່ມຕາລີບັນ ແລະຊີ້ນຳຢ່າງຕັ້ງໜ້າ. ໂດຍສະເພາະແມ່ນອາເມຣິກາ, ຄວນຮ່ວມກັບປະຊາຄົມໂລກໃຫ້ການຊ່ວຍເຫຼືອດ້ານເສດຖະກິດ, ຊີວິດການເປັນຢູ່ຂອງປະຊາຊົນ ແລະການຊ່ວຍເຫຼືອດ້ານມະນຸດສະທຳແກ່ອັຟການິສະຖານ, ຊ່ວຍເຫຼືອອັຟການິສະຖານສ້າງໂຄງປະກອບທາງການເມືອງໃໝ່ເພື່ອຮັບປະກັນໃຫ້ອົງການປົກຄອງຂອງລັດປະຕິບັດງານໄດ້ຕາມປົກກະຕິ, ຮັກສາຄວາມໝັ້ນຄົງໃນສັງຄົມ, ແກ້ໄຂໄພເງິນເຟີ້ຄ່າເງິນອ່ອນຄ່າໃນປະຈຸບັນ ແລະລາຄາສິນຄ້າເພີ່ມຂຶ້ນ, ໃຫ້ການສະໜັບສະໜູນເສັ້ໜທາງການສ້າງສາອັຟການິສະຖານຄືນໃໝ່ໂດຍສັນຕິແຕ່ຫົວທີ. ອາເມຣິກາຄວນເຄົາລົບອະທິປະໄຕ ແລະຄວາມເປັນເອກະລາດຂອງອັຟການິສະຖານ, ເອົາໃຈໃສ່ປະຕິບັດງານຕົວຈິງ, ຊ່ວຍເຫຼືອອັຟການິສະຖານຕໍ່ສູ້ກັບລັດທິກໍ່ການຮ້າຍ, ບໍ່ຄວນໃຊ້ສອງມາດຕະຖານ ຫຼືຕ້ານການກໍ່ການຮ້າຍແບບເລືອກຝ່າຍ.
ກ່ຽວກັບສາຍພົວພັນຈີນ-ອາເມຣິກາ, ທ່ານຫວາງຢີ້ກ່າວວ່າ: ເມື່ອບໍ່ດົນມານີ້, ຈີນ ແລະອາເມຣິກາໄດ້ດຳເນີນການແລກປ່ຽນຄວາມຄິດເຫັນກ່ຽວກັບສະຖານະກນຢູ່ອັຟການິສະຖານ, ການປ່ຽນແປງຂອງດິນຟ້າອາກາດ ແລະບັນຫາອື່ນໆ, ການປຶກສາຫາລືກັນດີກວ່າການເປັນປໍລະປັກກັນ, ການຮ່ວມມືກັນດີກວ່າການປະທະກັນ. ຈີນຈະພົວພັນກັບອາເມຣິກາບົນພື້ນຖານທ່າທີອາເມຣິກາທີ່ມີຕໍ່ຈີນ.