ຕາມຂ່າວແຈ້ງວ່າ: ທ່ານຄຣິສໂຕເຟີ ຟອດ ອະດີດຜູ້ຊ່ວຍລັດຖະມົນຕີກະຊວງການຕ່າງປະເທດອາເມຣິກາເຄີຍມີຈົດໝາຍເປີດຜະໜຶກສະບັບໜຶ່ງ ໂດຍໄດ້ເຜີຍແບຂະບວນການທີ່ຄົນຈຳນວນໜຶ່ງຂອງກະຊວງການຕ່າງປະເທດອາເມຣິກາມັກສ້າງຂ່າວລືກ່ຽວກັບເຊື້ອພະຍາດໂຄວິດ-19 ຮົ່ວອອກຈາກຫ້ອງທົດລອງ. ວັນທີ 30 ສິງຫານີ້, ທ່ານວ່າງເວີນປິ່ນ ໂຄສົກກະຊວງການຕ່າງປະເທດຈີນໄດ້ຕອບຄຳຖາມທີ່ກ່ຽວຂ້ອງວ່າ: ນີ້ເປັນການຢັ້ງຢືນໃຫ້ເຫັນເຖິງການໃສ່ຮ້າຍປ້າຍສີຈີນອີກຄັ້ງໜຶ່ງໃນການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ຂອງອາເມຣິກາ.
ທ່ານວ່າງເວີນປິ່ນກ່າວວ່າ: ອີງຕາມຈົດໝາຍທີ່ທ່ານຟອດເປີດເຜີຍໃນເດືອນມິຖຸນາຜ່ານມານີ້, ແຕ່ເດືອນທັນວາປີ 2020 ຫາຕົ້ນເດືອນມັງກອນປີ 2021, ພາຍໃຕ້ການມອບໝາຍຈາກທ່ານໄມ ພົມເພວ ອະດີດລັດຖະມົນຕີກະຊວງການຕ່າງປະເທດອາເມຣິກາ, ທ່ານຢີມ້າວຊຸ່ນ ເຈົ້າໜ້າທີ່ຫ້ອງການວາງນະໂຍບາຍກະຊວງການຕ່າງປະເທດອາເມຣິກາໄດ້ຊີ້ນຳໃຫ້ທ່ານໂທມັສ ດີນານໂນ ຜູ້ຊ່ວຍວຽກງານຂອງຜູ້ຊ່ວຍລັດຖະມົນຕີກະຊວງການຕ່າງປະເທດທີ່ຮັບຜິດຊອບອົງການຄຸ້ມຄອງແລະກວດກາຍຸດໂທປະກອນກະຊວງການຕ່າງປະເທດອາເມຣິກາ ແລະທ່ານເດວິດ ແອດເຊີ ທີ່ປຶກສາຂອງອົງການດັ່ງກ່າວ ຂ້າມໜ້າໂດຍບໍ່ປຶກສາກັບຜູ້ຊ່ຽວຊານຊີວະວິທະຍາ ແລະອາວຸດຊີວະພາບ, ໄດ້ປ່າວປະກາດຖ້ອຍຄວາມທີ່ບໍ່ແມ່ນຄວາມຈິງຕ່າງໆໃຫ້ພາກສ່ວນຕ່າງໆຂອງກະຊວງການຕ່າງປະເທດອາເມຣິກາຮັບຊາບ ເປັນຕົ້ນ: ໄວຣັດໂຄວິດ-19 ແມ່ນອາວຸດຊີວະພາບທີ່ລັດຖະບານຈີນຕັ້ງໃຈໃຫ້ຮົ່ວອອກມາ.
ທ່ານວາງເວີນປິ່ນກ່າວວ່າ: ຈາກຈຸດນີ້ຈິ່ງສະຫຼຸບໄດ້ວ່າ: ນັກການເມືອງອາເມຣິກາຈຳນວນໜຶ່ງບໍ່ເອົາຫົວຊານຳຫຼັກຖານທາງວິທະຍາສາດແລະພື້ນຖານຄວາມເປັນຈິງ, ໄດ້ຫັນການສຳຫຼວດຫາແຫຼ່ງກຳເນີດຂອງເຊື້ອພະຍາດໂຄວິດ-19 ເປັນບັນຫາການເມືອງ. ຈຸດປະສົງທີ່ແທ້ຈິງຂອງເຂົາເຈົ້າກໍຄື: ຖິ້ມໂທດໃສ່ຈີນດ້ວຍທຸກວິທີທາງ. ການກະທຳແບບນີ້ຂາດຄຸນສົມບັດພື້ນຖານ, ມີຜູ້ມີຄວາມຮູ້ນັບມື້ນັບຫຼາຍ ໄດ້ສັງເກດເຫັນຢ່າງຈະແຈ້ງກ່ຽວກັບເລື່ອງນີ້ ແລະຈະຖືກປະຊາຄົມໂລກຄັດຄ້ານຢ່າງແຂງແຮງກວ່າເກົ່າ.