ຕອນຄ່ຳວັນທີ 2 ກັນຍານີ້, ກອງປະຊຸມສຸດຍອດການຄ້າການບໍລິການໂລກຂອງງານຕະຫຼາດນັດການຄ້າການບໍລິການສາກົນຈີນໄດ້ຈັດຂຶ້ນຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ປະກາດມາດຕະການສຳຄັນໃນການເປີດປະຕູສູ່ພາຍນອກຕໍ່ກອງປະຊຸມດັ່ງກ່າວ, ປະຊາຄົມໂລກໄດ້ຕີລາຄາສູງ ແລະຫວັງຢາກເພີ່ມທະວີການຮ່ວມມືສາກົນດ້ານການຄ້າການບໍລິການ.
ງານຕະຫຼາດນັດການຄ້າການບໍລິການສາກົນຈີນປີ 2021 ໄດ້ຈັດຂຶ້ນຢູ່ນະຄອນຫຼວງປັກກິ່ງແຕ່ວັນທີ 2 ຫາວັນທີ 7 ກັນຍານີ້ ພາຍໃຕ້ຫົວຂໍ້ “ເປີດອະນາຄົດດ້ວຍດີຈີຕອນ, ການບໍລິການຊຸກຍູ້ການພັດທະນາ”. ປະເທດອຽກລັງແມ່ນປະເທດກິດຕິມະສັກໃນງານຕະຫຼາດນັດຄັ້ງນີ້. ທ່ານມີແຊວ ມາຕີນ ນາຍົກລັດຖະມົນຕີອຽກລັງກ່າວໃນກອງປະຊຸມສຸດຍອດວ່າ: ອຽກລັງຫວັງຢາກເພີ່ມທະວີການຮ່ວມມືກັບຈີນໃນຂົງເຂດໃໝ່ໂດຍຜ່ານງານຄັ້ງນີ້.
ທ່ານນາງອານແບນ ກົງຊາເລສ ຮອງຜູ້ອຳນວຍການໃຫຍ່ອົງການການຄ້າໂລກກ່າວວ່າ: ມູນຄ່າດ້ານການຄ້າການບໍລິການໄດ້ກວມມູນຄ່າການຄ້າໂລກເພີ່ມຂຶ້ນຈາກ 9% ໃນປີ 1970 ເປັນຫຼາຍກວ່າ 20% ໃນປັດຈຸບັນນີ້ ແລະຄາດວ່າເມື່ອຮອດປີ 2040 ຈະບັນລຸເຖິງ 1 ສ່ວນ 3. ທ່ານກ່າວຕື່ມວ່າ: ບາງປະເທດສະມາຊິກຂອງອົງການການຄ້າໂລກພວມເຈລະຈາກົດລະບຽບ, ທ່ານຫວັງໃຫ້ລັດຖະບານບັນດາປະເທດສະມາຊິກນຳໃຊ້ການເຄື່ອນໄຫວ ເພື່ອຍົກສູງຄວາມໂປ່ງໃສ ແລະປະສິດທິພາບ.
ທ່ານອັນໂດ ອັນວາຣີສ ເອກອັກຄະລັດຖະທູດເອວຊັນວາດໍປະຈຳປະເທດຈີນກ່າວວ່າ: ຈີນໄດ້ປະກາດສ້າງຕະຫຼາດຫຼັກຊັບໃໝ່ໄດ້ເຮັດໃຫ້ທ່ານເອງຮູ້ສຶກປະທັບໃຈຫຼາຍ ເຊິ່ງຈະກາຍເປັນກຳລັງຊຸກດັນໃໝ່ໃຫ້ກັບການພັດທະນາໂລກ.