ວັນທີ 4 ກັນຍານີ້, ເວທີປຶກສາຫາລືການຮ່ວມມືດ້ານການຄ້າການບໍລິການ“ໜຶ່ງແລວໜຶ່ງເສັ້ນທາງ”ຄັ້ງທີ 4 ໄດ້ປະກາດ“ບົດລາຍງານການຄົ້ນຄວ້າດ້ານການພັດທະນາການຄ້າການບໍລິການຈີນ 2020”.
ບົດລາຍງານໄດ້ລະບຸວ່າ: ການຄ້າການບໍລິການໄດ້ກາຍເປັນກຳລັງຂັບເຄື່ອນອັນໃໝ່ໃນການຊຸກຍູ້ການຄ້າແລະເສດຖະກິດທົ່ວໂລກໃຫ້ເຕີບໂຕ, ການຫັນປ່ຽນການເປີດປະຕູສູ່ພາຍນອກຂອງຈີນທີ່ປ່ຽນການຖືເອົາການຄ້າສິນຄ້າເປັນຫຼັກໃຫ້ກາຍເປັນການຖືເອົາການຄ້າການບໍລິການເປັນຈຸດໜັກນັ້ນໄດ້ເປັນທ່ວງທ່າພື້ນຖານ, ການປະດິດສ້າງດ້ານເຕັກນິກດີຈີຕອນໄດ້ຊຸກຍູ້ການຄ້າການບໍລິການໃຫ້ມີການປ່ຽນແປງໃໝ່.
ບົດລາຍງານຍັງຊີ້ໃຫ້ເຫັນວ່າ: ໃນໄລຍະປະຕິບັດແຜນການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 13, ຂະແໜງການບໍລິການແລະການຄ້າການບໍລິການຂອງຈີນໄດ້ຮັບຜົນສຳເລັດອັນພົ້ນເດັ່ນ, ຍອດມູນຄ່າໄດ້ເພີ່ມຂຶ້ນຢ່າງບໍ່ຢຸດຢັ້ງ, ໂຄງປະກອບໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ, ໂດຍສະເພາະແມ່ນປີ 2019 ແລະ 2020, ມູນຄ່າການຄ້າການບໍລິການທີ່ເນັ້ນໃສ່ຄວາມຮູ້ຕ່າງໄດ້ກວມຍອດມູນຄ່າການຄ້າການບໍລິການຂອງຈີນ 34,7% ແລະ 44,5%, ເຊິ່ງໄດ້ກາຍເປັນກຳລັງຂັບເຄື່ອນທີ່ສຳຄັນຂອງການເຕີບໂຕດ້ານການຄ້າການບໍລິການ.
ບົດລາຍງານດັ່ງກ່າວຍັງຄາດຄະເນວ່າ: ເມື່ອຮອດປີ 2025, ມູນຄ່າເພີ່ມຂອງຂະແໜງການບໍລິການຂອງຈີນຈະກວມ 60% ໃນ GDP ຂອງຈີນ, ການພັດທະນາດ້ານຂະແໜງການບໍລິການຂອງຈີນມີກຳລັງບົ່ມຊ້ອນທີ່ມະຫາສານ.