ວັນທີ 9 ກັນຍານີ້, ທ່ານສີຈີ້ນຜີງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ສົ່ງສານໄປຍັງທ່ານກິມເຈິງອຸນ ເລຂາທິການໃຫຍ່ພັກແຮງງານເກົາຫຼີ ປະທານຄະນະກຳມະການແຫ່ງລັດສປປເກົາຫຼີເພື່ອສະແດງຄວາມອວຍພອນເນື່ອງໃນໂອກາດວັນຊາດສປປເກົາຫຼີຄົບຮອບ 73 ປີ.
ໃນສານອວຍພອນຂອງທ່ານສີຈີ້ນຜີງລະບຸວ່າ, ນັບແຕ່ສາທາປະຊາທິປະໄຕເກົາຫຼີສ້າງຕັ້ງຂຶ້ນເປັນເວລາ 73 ປີມານີ້, ພັກແຮງງານເກົາຫຼີໄດ້ເຕົ້າໂຮມຄວາມສາມັກຄີ ແລະ ນຳພາປະຊາຊົນເກົາຫຼີສຸມຄວາມພະຍາຍາມຢ່າງບໍ່ລົດລະ, ຊຸກຍູ້ພາລະກິດສັງຄົມນິຍົມໄດ້ຮັບໝາກຜົນຢ່າງຫຼວງຫຼາຍ. ໃນຖານະທີ່ເປັນສະຫາຍ ແລະ ເພື່ອນມິດ, ພວກຂ້າພະເຈົ້າຮູ້ສຶກປະຕິຊົມຊື່ນຕໍ່ຜົນງານດັ່ງກ່າວ. ປັດຈຸບັນ, ປະຊາຊົນສປປເກົາຫຼີພວມຈັດຕັ້ງປະຕິບັດມະຕິຕົກລົງ ແລະ ແຜນການທີ່ໄດ້ຮັບຮອງເອົາໃນກອງປະຊຸມໃຫຍ່ຜູ້ແທນພັກແຮງງານເກົາຫຼີຄັ້ງທີ 8, ໄດ້ອອກແຮງຢ່າງສຸດຂີດເພື່ອຊຸກຍູ້ໃຫ້ເສດຖະກິດສັງຄົມໄດ້ຮັບການພັດທະນາ. ເຊື່ອວ່າ ພາຍໃຕ້ການນຳພາອັນເຂັ້ມແຂງຂອງສູນກາງພັກແຮງງານເກົາຫຼີທີ່ມີສະຫາຍເລຂາທິການໃຫຍ່ເປັນແກນນຳ, ປະຊາຊົນສປປເກົາຫຼີທີ່ສາມາຄີ ແລະ ສູ້ຊົນຮ່ວມກັນ, ຍ່ອມຈະສ້າງປະເທດໃຫ້ຈະເລີນຮຸ່ງເຮືອງໄດ້.
ທ່ານສີຈີ້ນຜີງກ່າວເນັ້ນໜັກວ່າ, ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ການຂະຫຍາຍສາຍພົວພັນຈີນ-ສປປເກົາຫຼີ, ຍິນດີສຸມຄວາມພະຍາຍາມຮ່ວມກັນກັບສະຫາຍເລຂາທິການໃຫຍ່, ຊຸກຍູ້ໃຫ້ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດຂະຫຍາຍຕົວຢ່າງໝັ້ນຄົງ ເພື່ອສ້າງຄວາມສຸກໃຫ້ແກ່ສອງຊາດ ແລະ ປະຊາຊົນສອງປະເທດຫຼາຍກວ່າເກົ່າ.