ຕອນຄ່ຳວັນທີ 10 ກັນຍານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາທາງໂທລະສັບກັບທ່ານນາງແອັນເຈີລາ ເມີເຄວ ນາຍົກລັດຖະມົນຕີເຢຍລະມັນ.
ທ່ານສີຈິ້ນຜິງກ່າວເນັ້ນວ່າ: ໃນຊຸມປີຜ່ານມາ, ສາຍພົວພັນຈີນ-ເຢຍລະມັນໄດ້ຮັກສາທ່ວງທ່າຂະຫຍາຍຕົວໄປດ້ວຍດີໂດຍລວມ, ການຮ່ວມມືໃນທຸກຂົງເຂດມີຄວາມເຂັ້ມແຂງຢ່າງໃຫຍ່ຫຼວງພາຍໃຕ້ສະພາບການແຜ່ລະບາດຂອງພະຍາດໂຄວິດ-19. ຈີນ-ເຢຍລະມັນໄດ້ຊຸກຍູ້ຈີນ-ສະຫະພາບເອີຣົບດຳເນີນການເຈລະຈາສັນຍາການລົງທຶນໃຫ້ສຳເລັດຕາມເວລາກຳນົດ, ຮ່ວມກັນສົ່ງເສີມລັດທິຫຼາຍຝ່າຍ, ຕັ້ງໜ້າຮັບມືກັບການປ່ຽນແປງຂອງດິນຟ້າອາກາດ, ຮ່ວມມືກັນປະກອບສ່ວນອັນຕັ້ງໜ້າເຂົ້າໃນການປົກປັກຮັກສາສັນຕິພາບແລະສະຖຽນລະພາບຂອງໂລກ. ຫວັງວ່າ ເຢຍລະມັນຈະຊຸກຍູ້ສະຫະພາບເອີຣົບຍຶດໝັ້ນໃນນະໂຍບາຍອັນຖືກຕ້ອງທີ່ມີຕໍ່ປະເທດຈີນ, ປະຕິບັດຕໍ່ຄວາມແຕກຕ່າງກັນລະຫວ່າງສອງຝ່າຍຢ່າງພາວະວິໄສ, ແກ້ໄຂຄວາມເຫັນທີ່ຂັດແຍ້ງກັນຢ່າງສົມເຫດສົມຜົນ, ຊຸກຍູ້ສາຍພົວພັນຈີນ-ສະຫະພາບເອີຣົບໃຫ້ຂະຫຍາຍຕົວຢ່າງປອດໃສແລະຕໍ່ເນື່ອງ.
ທ່ານນາງເມີເຄວຢືນຢັນວ່າ: ການຂະຫຍາຍຕົວຂອງສາຍພົວພັນເຢຍລະມັນ-ຈີນແລະສາຍພົວພັນສະຫະພາບເອີຣົບ-ຈີນໃນຊຸມປີຜ່ານມາມີຫຼາຍສິ່ງທີ່ເປັນໜ້າຖອດຖອນເປັນບົດຮຽນ, ຂ້າພະເຈົ້າຍິນດີຮ່ວມກັນກັບຝ່າຍຈີນຮັກສາການແລກປ່ຽນຄວາມເຫັນຢ່າງໃກ້ຊິດ, ສຸມຄວາມພະຍາຍາມຮ່ວມກັນເພື່ອຊຸກຍູ້ສອງຝ່າຍເຢຍລະມັນ-ຈີນ, ສະຫະພາບເອີຣົບ-ຈີນສຸມກຳລົງເຂົ້າໃນການແກ້ໄຂຄວາມແຕກຕ່າງກັນດ້ວຍການສົນທະນາກັນ, ແກ້ໄຂຄວາມເຫັນທີ່ຂັດແຍ້ງກັນໃຫ້ເໝາະສົມ. ສັນຍາການລົງທຶນສະຫະພາບເອີຣົບ-ຈີນເວົ້າສຳລັບທັງສອງຝ່າຍສະຫະພາບເອີຣົບ-ຈີນແລ້ວເປັນສັນຍາແບບຕ່າງຝ່າຍຕ່າງມີຜົນປະໂຫຍດ, ຫວັງວ່າສັນຍາສະບັບນີ້ຈະໄດ້ຮັບການອະນຸມັດໃຫ້ເກີດມີຜົນສັກສິດໂດຍໄວ.