ຂ່າວແຈ້ງວ່າ, ວັນທີ 13 ກັນຍານີ້, ທ່ານ ຊູເຮນ ຊາຮີນ ໂຄສົກລັດຖະບານຊົ່ວຄາວຂອງອັຟການິສະຖານກ່າວວ່າ, ອາເມຣິກາຄວນຍົກເລີກການອະຍັດຊັບສິນຂອງອັຟການິສະຖານ, ເພາະຊັບສິນເຫຼົ່ານີ້ແມ່ນຂອງປະຊາຊົນອັຟການິສະຖານ. ປັດຈຸບັນ, ສະຖານະການດ້ານເສດຖະກິດຂອງອັຟການິສະຖານຫຍຸ້ງຍາກຫຼາຍ, ການກະທຳຂອງອາເມຣິກາແມ່ນສົ່ງຜົນກະທົບຕໍ່ປະຊາຊົນອັຟການິສະຖານ. ລັດຖະບານຊົ່ວຄາວອັຟການິສະຖານຈະໃຊ້ມາດຕະການທາງກົດໝາຍທຸກຮູບແບບ ເພື່ອບັງຄັບໃຫ້ອາເມຣິກາຍົກເລີກການອະຍັດຊັບສິນຂອງອັຟການິສະຖານ.
ວັນທີ 15 ກັນຍານີ້, ໃນເວລາຕອບຄຳຖາມທີ່ກ່ຽວຂ້ອງໃນກອງປະຊຸມຂ່າວປະຈຳ, ທ່ານຈ້າວລີ້ຈ່ຽນ, ໂຄສົກກະຊວງການຕ່າງປະເທດຈີນກ່າວວ່າ: “ຄວາມເວົ້າຂອງທ່ານຊາຮີນຖືກຕ້ອງແລ້ວ, ຊັບສິນເຫຼົ່ານີ້ເປັນຂອງອັຟການິສະຖານ, ຄວນໃຫ້ປະຊາຊົນອັຟການິສະຖານນຳໃຊ້, ອາເມຣິກາບໍ່ຄວນອະຍັດດ້ວຍຂໍ້ອ້າງໃດໆ. ອາເມຣິກາຄວນພິຈາລະນາຄວາມຮຽກຮ້ອງຕ້ອງການຢ່າງເປັນທຳຂອງອັຟການິສະຖານ, ປະຖິ້ມພຶດຕິກຳໃຊ້ແຮງກົດດັນແລະຂວ້ຳບາດ, ບໍ່ຄວນສ້າງສິ່ງກີດຂວາງຕໍ່ການພັດທະນາເສດຖະກິດ ຊີວິດການເປັນຢູ່ຂອງປະຊາຊົນແລະການສ້າງບ້ານແປງເມືອງຄືນໃໝ່ໂດຍສັນຕິຂອງອັຟການິສະຖານ.”