ທ່ານຈົ່ງນານສ່ານເຄີຍເຂົ້າຮ່ວມງານກິລາແຫ່ງຊາດຈີນຫວາ? ແມ່ນແລ້ວ! ຍັງເຄີຍສ້າງສະຖິຕິໃໝ່!
ວັນທີ 13 ກັນຍາ 1959, ນັກກິລາໄດ້ເດີນເຂົ້າສະໜາມໃນພິທີໄຂງານກິລາແຫ່ງຊາດຈີນຄັ້ງທຳອິດທີ່ຈັດຂຶ້ນຢູ່ນະຄອນຫລວງປັກກິ່ງ
ຕອນຄ່ຳວັນທີ 15 ກັນຍານີ້, ງານມະຫະກຳກິລາແຫ່ງຊາດທີ່ຈັດຂຶ້ນ 4 ປີເທື່ອໜຶ່ງຈະໄຂຂຶ້ນຢູ່ນະຄອນສີ່ອ່ານ ເຊິ່ງເປັນເມືອງບູຮານຂອງຈີນ, ປີນີ້ແມ່ນງານກິລາຄັ້ງທີ 14.
62 ປີກ່ອນ, ມີຄົນຜູ້ໜຶ່ງໄດ້ທຳລາຍສະຖິຕິໃນການລາຍການແລ່ນຂ້າມຮົ້ວ 400 ແມັດໃນງານກິລາແຫ່ງຊາດຈີນຄັ້ງທຳອິດ. ປັດຈຸບັນ, ນັກກິລາເກັ່ງຜູ້ນີ້ໄດ້ກາຍເປັນຜູ້ຊ່ຽວຊານພະແນກພາຍໃນດ້ານລະບົບຫາຍໃຈຂອງຈີນ, ທັງເປັນບັນດິດຂອງສະຖາບັນວິທະຍາສາດຈີນ ພ້ອມທັງເປັນຜູ້ນຳໜ້າຕໍ່ຕ້ານພະຍາດ SARS ແລະ ພະຍາດໂຄວິດ-19 ຂອງຈີນ. ເພິ່ນຜູ້ນີ້ກໍ່ແມ່ນທ່ານຈົ່ງນານສ່ານ.
ປີ 1955, ທ່ານຈົ່ງນານສ່ານໄດ້ສອບເຂົ້າວິທະຍາໄລການແພດປັກກິ່ງ, ກໍ່ຄືວິທະຍາໄລແພດສາດຂອງມະຫາວິທະຍາໄລປັກກິ່ງໃນປັດຈຸບັນ. ຍ້ອນຄະແນນດີເດັ່ນໃນດ້ານກິລາ, ທ່ານຈົ່ງນານສ່ານຖືກ ສົ່ງໄປທີມເຝິກກິລານະຄອນຫຼວງປັກກິ່ງໃນປີ 1958 ເພື່ອກະກຽມງານກິລາແຫ່ງຊາດຈີນຄັ້ງທຳອິດ. ຫຼັງຈາກນັ້ນ 1 ປີ, ໃນການແຂ່ງຂັນແລ່ນຂ້າມຮົ້ວ 400 ແມັດເພດຊາຍຮອບຄັດເລືອກຂອງງານກິລາແຫ່ງຊາດຈີນຄັ້ງທຳອິດ, ທ່ານຈົ່ງນານສ່ານເຖິງຈະບໍ່ແມ່ນນັກກິລາມີອາຊີບ, ພັດສ້າງໄດ້ທຳລາຍສະຖິຕິລະດັບຊາດໃນລາຍການແລ່ນຂ້າມຮົ້ວ 400 ແມັດດ້ວຍຄະແນນ 54 ວິນາທີ 2 ລິບດາ. ຈົນຮອດປັດຈຸບັນ, ຢູ່ວິທະຍາໄລແພດສາດຂອງມະຫາວິທະຍາໄລປັກກິ່ງຍັງມີສະຖິຕິດ້ານກິລາຫຼາຍລາຍການທີ່ທ່ານຈົ່ງນານສ່ານສ້າງຂຶ້ນນັ້ນ ຍັງບໍ່ທັນໄດ້ຖືກທຳລາຍເທື່ອ.
ທ່ານຈົ່ງນານຊ່ານໄດ້ທຳລາຍສະຖິຕິແລ່ນຂ້າມຮົ້ວ 400 ແມັດທົ່ວປະເທດຈີນ
“ຄວາມໄວສູງສຸດໃນການແລ່ນ 100 ແມ່ນຂອງຂ້າພະເຈົ້າແມ່ນ 11 ວິນາທີ 2 ລິບດາ, ໃນປີ 1959.” ທ່ານຈົ່ງນານສ່ານບອກໃຫ້ຮູ້ວ່າ, ນ້ຳໜັກໃຫຍ່ທີ່ສຸດທີ່ເພິ່ນເຄີຍຍົກຂຶ້ນມາແມ່ນ 100 ກິໂລ, ສ່ວນນ້ຳໜັກການນອນຍົກແມ່ນ 70 ກິໂລ. “ບໍ່ເຄີຍທົດລອງວ່ານ້ຳໜັກທີ່ສາມາດຍົກຂຶ້ນໄດ້ນັ້ນສູງສຸດມີເທົ່າໃດ ເພາະໃນເວລານັ້ນ ການເຝິກຍົກນ້ຳໜັກຕົ້ນຕໍກໍ່ເພື່ອເພີ່ມກຳລັງແຮງເພື່ອເຂົ້າຮ່ວມກິລາປະເພດແລ່ນ ແລະ ລານ.”
ພາຍຫລັງງານກິລາແຫ່ງຊາດສິ້ນສຸດລົງ, ທ່ານຈົ່ງນານສ່ານໄດ້ມີໂອກາດກາຍເປັນນັກກິລາມືອາຊີບ, ແຕ່ຫລັງຈາກການພິຈາລະນາເທື່ອແລ້ວເທື່ອອີກ, ເພິ່ນໄດ້ເລືອກກັບຄືນສູ່ຂົງເຂດການແພດ, ທ່ານເວົ້າວ່າ: ຂ້າພະເຈົ້າຮູ້ສຶກວ່າຫຸ່ນຕົນເອງບໍ່ດີພໍ, ສຸຂະພາບກໍບໍ່ປານໃດ, ຢ່າງເກັ່ງກໍຮອດແຕ່ລະດັບອາຊີເທົ່ານັ້ນ, ຍັງບໍ່ທັນຮອດລະດັບໂລກ, ເປັນນັກກິລາມືອາຊີບຈະບໍ່ມີອະນາຄົດ. ເຖິງວ່າບໍ່ໄດ້ເປັນນັກກິລາມືອາຊີບ, ແຕ່ການຫລິ້ນກິລາໄດ້ນຳເອົາຜົນປະໂຫຍດ ແລະການປ່ຽນແປງໃຫ້ກັບທ່ານຈົ່ງນານສ່ານ ແລະໄດ້ຢູ່ກັບເພິ່ນຕະຫລອດຊີວິດ.
ທ່ານກ່າວວ່າ: ເພື່ອນຮ່ວມຮຽນຂອງຂ້ອຍມີຫລາຍຄົນຍັງບໍ່ຮອດອາຍຸສ່ຳຂ້າພະເຈົ້າໃນປັດຈຸບັນ, ຈົນເຖິງ 10 ປີກ່ອນ, ສຸຂະພາບກໍອ່ອນເພຍແລ້ວ. ເຂົາເຈົ້າບໍ່ຄືຂ້າພະເຈົ້າ, ຖືເອົາການອອກກຳລັງກາຍເປັນສ່ວນໜຶ່ງຂອງຊີວິດ, ເໝືອນດັ່ງການກິນເຂົ້າ ແລະການນອນ. ການທີ່ຍຶດໝັ້ນການອອກກຳລັງກາຍເປັນເວລາຫລາຍສິບປີເຮັດໃຫ້ທ່ານຈົ່ງນານສ່ານມີໜ້າຕາຕ່ຳກວ່າອາຍຸຕົວຈິງຫລາຍ, ກໍບໍ່ໄດ້ມີບັນຫາທີ່ຜູ້ອາຍຸສູງມັກຈະເປັນ, ເຊັ່ນ: ການເບິ່ງການຟັງມີບັນຫາ, ຄວາມພິບໄຫວຊັກຊ້າລົງ, ຄວາມຊົງຈຳເສື່ອມ, ເຈັບແອວເຈັບຂາ ແລະອື່ນໆ. ຫຸ່ນຂອງເພິ່ນຍັງມີກ້າມອີກ ເຊິ່ງເຮັດໃຫ້ຜູ້ໜຸ່ມທັງຫລາຍກໍຍອມແພ້.
ທ່ານຈົ່ງນານສ່ານ ຜູ້ໄດ້ມີອາຍຸ 80 ກວ່າປີຍັງຍຶດໝັ້ນອອກກຳລັງກາຍ
ການກິລາເຂັ້ມແຂງ, ປະເທດກໍເຂັ້ມແຂງໄປນຳ. ປະເທດມີຄວາມຈະເລີນ, ການກິລາກໍມີຄວາມຈະເລີນໄປພ້ອມ. ງານກິລາແຫ່ງຊາດຈີນຄັ້ງທີ 14 ໃກ້ຈະໄຂຂຶ້ນ. ຈາກການເປັນສະໜາມຝຶກຊ້ອມຂອງງານກິລາໂອລິມປິກເຖິງງານກິລາແຫ່ງຊາດທີ່ທົ່ວປວງຊົນມີສ່ວນຮ່ວມ, ງານກິລາແຫ່ງຊາດຈີນໃນປັດຈຸບັນ, ບໍ່ພຽງແຕ່ເປັນເວທີຂອງຜູ້ດີເດັ່ນດ້ານການກິລາເທົ່ານັ້ນ, ຍັງເປັນງານມະໂຫລານດ້ານກິລາຂອງປະຊາຊົນ. ຫລາຍປີມໍ່ໆມານີ້, ແນວຄິດທີ່ປະຊາຊົນທົ່ວປະເທດຮ່ວມກັນອອກກຳລັງກາຍໄດ້ເຊື່ອມໂຍງເຂົ້າກັບຊີວິດການເປັນຢູ່ຂອງມວນຊົນຢ່າງເລິກເຊິ່ງ. ທ່ານສາມາດເຫັນໄດ້ວ່າ: ມີມວນຊົນນັບມື້ນັບຫລາຍຂຶ້ນໄດ້ແບ່ງປັນຮູບພາບອອກກຳລັງກາຍຜ່ານທາງວິແຊັດ ແລະສື່ສັງຄົມອອນລາຍອື່ນໆ, ແລ່ນ 3-4 ກິໂລແມັດໃນແຕ່ລະມື້ໄດ້ກາຍເປັນຊີວິດປະຈຳວັນຂອງຄົຫລວງຫລາຍ. ສາມາດເວົ້າໄດ້ວ່າ: ບໍ່ອອກກຳລັງກາຍ, ຊີວິດການເປັນຢູ່ກໍຂາດລົດຊາດ, ມັກອອກກຳລັງກາຍ, ຮັກຫອມຊີວິດການເປັນຢູ່.
ປະຊາຊົນໄດ້ອອກກຳລັງກາຍໃນຕອນເຊົ້າ