ພະນັກງານສະຖານທູດລາວທັດສະນະສຶກສາຖານທີ່ໝັ້ນຂອງການປະຕິວັດພູຊຽງຊານ ແລະ ໂຮງຮຽນ 81
ໃນວັນທີ 15 ກັນຍາ 2021 ນີ້, ທ່ານ ນາງ ຄຳເພົາ ເອີນທາວັນ ເອກອັກຄະລັດຖະທູດ ສປປ ລາວປະຈຳ ສປ ຈີນ ໄດ້ນຳພາພະນັກງານສະຖານທູດລາວເດີນທາງໄປທັດສະນະສຶກສາຖານທີ່ໝັ້ນ ຂອງການປະຕິວັດຢູ່ພູຊຽງຊານ ຫລື ພູຫອມ ແລະ ໂຮງຮຽນ 81 ເຊິ່ງໃຫ້ກຽດນຳພາທາງໂດຍ ທ່ານເຊີ່ງໄຫໂປ ຮອງຫົວໜ້າກົມອາຊີຕາເວັນອອກຂອງສະມາຄົມມິດຕະພາບປະຊາຊົນຈີນກັບນາໆ ຊາດ ເຊິ່ງເປັນຝ່າຍເຈົ້າພາບຈັດງານທັດສະນະສຶກສາໃນຄັ້ງນີ້.
ຢູ່ຖານທີ່ໝັ້ນຂອງການປະຕິວັດພູຊຽງຊານ, ພະນັກງານສະຖານທູດລາວໄດ້ຢ້ຽມຊົມເຮືອນພັກ ແລະ ບ່ອນເຮັດວຽກຂອງທ່ານ ປະທານເໝົາເຈີ່ຕຸ່ງ ຜູ້ນຳພາສ້າງຕັ້ງສາທາລະນະລັດປະຊາຊົນຈີນ, ເຮືອນພັກ ແລະ ບ່ອນເຮັດວຽກຂອງທ່ານນາຍົກ ໂຈເອີນໄຫລ, ເຮືອນພັກ ແລະ ບອ່ນເຮັດວຽກຂອງທ່ານ ນາຍພົນ ຈູເຕີ. ຜູ້ນຳການປະຕິວັດຈີນໄດ້ເລືອກເອົາພູຊຽງຊານເປັນເຂດທີ່ໝັ້ນເພື່ອປົດປ່ອຍປັກກິ່ງກໍ່ຍ້ອນວ່າ ສະຖານທີ່ແຫ່ງນີ້ເປັນຈຸດຍຸດທະສາດທີ່ສຳຄັນ, ມີຄວາມປອດໄພຈາກການໂຈມຕີທາງອາກາດທາງບົກ ແລະ ສະຖານທີ່ແຫ່ງ ນີ້ກໍໄດ້ມີສິ່ງປຸກສ້າງຂອງລາຊະວົງຊີງທີ່ເອື້ອອຳນວຍຕໍ່ການເຄື່ອນໄຫວປະຕິວັດ.
ຫລັງຈາກນັ້ນ ທ່ານນາງ ຄຳເພົາ ເອີນທະວັນ ພ້ອມພະນັກງານສະຖານທູດລາວ ໄດ້ສືບຕໍ່ເດີນທາງຢ້ຽມຊົມໂຮງຮຽນ 81 ຂອງປັກກິ່ງ. ເຊິ່ງໂຮງຮຽນ ແຫ່ງນີ້ແມ່ນສະຖານທີ່ທີ່ທ່ານ ສີຈິ້ນຜິງ ເລຂາ ທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ແລະຄອບຄົວຕະກຸນ ພົນເສນາຂອງລາວເຄີຍໄດ້ສຶກສາຮ່ຳຮຽນຢູ່ທີ່ນີ້ໃນຊຸມປີ 1960 ແລະ ພວກເພິ່ນກໍເຄີຍກັບຄືນມາຢ້ຽມຄູ ອາຈານ ແລະ ໂຮງຮຽນດັ່ງກ່າວ. ປະຈຸບັນນີ້ ໂຮງຮຽນໄດ້ພັດທະນາຂຶ້ນໂດຍເນັ້ນໃສ່ຫລັກສູດດ້ານ ວິທະຍາສາດ ກິລາ ແລະສິລະປະ.
ຫລັງຈາກສຳເລັດການທັດສະນະສຶກສາຢ້ຽມຊົມສະຖານທີ່ສຳຄັນສອງແຫ່ງດັ່ງກ່າວແລ້ວ, ທ່ານ ນາງ ຄຳເພົາ ເອີນທະວັນ ໄດ້ໃຫ້ສຳພາດຕໍ່ນັກຂ່າວວ່າ: ຜ່ານຈາກການທັດສະນະຢ້ຽມຊົມຄັ້ງນີ້, ຂ້າພະເຈົ້າເຫັນໄດ້ວ່າການປະຕິວັດຈີນໄດ້ກະກຽມ ແລະ ເຮັດທຸກສິ່ງຢ່າງ ເພື່ອປົດປ່ອຍປະເທດຈີນໃນປີ 1949, ເຊິ່ງໄດ້ສ່ອງແສງໃຫ້ເຫັນວ່າເວລາໃດ ພັກກອມມູນິດຈີນກໍ່ໄດ້ຖືເອົາຜົນປະໂຫຍດຂອງປະຊາຊົນ ເປັນກົກ, ຮັບໃຊ້ຜົນປະໂຫຍດຂອງປະຊາຊົນຢ່າງແທ້ຈິງ. ນີ້ກໍ່ເປັນສະຖານທີ່ໜຶ່ງທີ່ພວກເຮົາຄວນສືບຕໍ່ ອະນຸລັກຮັກສາ, ຂ້າພະເຈົ້າຂໍສະແດງຄວາມຍ້ອງຍໍຊົມເຊີຍທີ່ສຸດຕໍ່ອຳນາດການປົກຄອງທີ່ກ່ຽວຂ້ອງທີ່ ໄດ້ບູລະນະຮັກສາ ແລະ ພັດທະນາເຂດດັ່ງກ່າວນັ້ນໃຫ້ເປັນສະຖານທີ່ທ່ອງທ່ຽວເພື່ອໃຫ້ຄົນລຸ້ນໃໝ່ ໄດ້ສຶກສາຮຽນຮູ້ປະຫວັດສາດການປະຕິວັດຂອງພັກກອມມູນິດຈີນ. ແລະເຮັດໃຫ້ພວກຂ້າພະເຈົ້າໄດ້ເຫັນວ່າ, ພັກກອມມູນິຈີນແລະລັດຖະບານຈີນແມ່ນໃຫ້ຄວາມສຳຄັນທີ່ສຸດຕໍ່ວຽກງານການສຶກສາ, ແລະສຸມໃສ່ການສ້າງຜູ້ມີຄວາມຮູ້ຄວາມສາມາດຢ່າງຮອບດ້ານ. ຫວັງວ່າ ໃນອະນາຄົດນີ້ ລາວຈີນຈະສາມາດຮ່ວມມືກັນໃນວຽກງານການສຶກສາຫຼາຍກວ່າເກົ່າ.