ວັນທີ 17 ກັນຍານີ້ຕາມເວລາທ້ອງຖິ່ນ, ກອງປະຊຸມລັດຖະມົນຕີກະສິກຳກຸ່ມ 20 ປະເທດໄດ້ຈັດຂຶ້ນຢູ່ນະຄອນຟີເຣັນເຈີປະເທດອີຕາລີເຊິ່ງເປັນປະເທດປະທານໝູນວຽນຂອງກຸ່ມ 20 ປະເທດ. ຜູ້ຕາງໜ້າຂອງກຸ່ມເສດຖະກິດຕົ້ນຕໍຂອງໂລກໄດ້ປຶກສາຫາລືຫຼາຍຫົວຂໍ້ກ່ຽວກັບຂົງເຂດກະສິກຳພາຍໃຕ້ສະພາບການແຜ່ລະບາດຂອງພະຍາດໂຄວິດ-19.
ທ່ານສະເຕຟາໂນ ພັດນທນເນລີ ລັດຖະມົນຕີກະຊວງກະສິກຳອີຕາລີກ່າວວ່າ: ສະພາບການແຜ່ລະບາດຂອງພະຍາດໂຄວິດ-19 ໄດ້ເພີ່ມຄວາມບໍ່ແນ່ນອນໃຫ້ກັບຄວາມໝັ້ນຄົງດ້ານສະບຽງອາຫານຂອງໂລກ, ມີຄວາມຈຳເປັນຕ້ອງເພີ່ມທະວີການຮ່ວມມືສາກົນ, ປະຕິບັດມາດຕະການລະອຽດຢ່າງກ້າຫານ, ເຮັດໃຫ້ນະໂຍບາຍກະສິກຳມີຄວາມທຽງທຳກວ່າເກົ່າແລະສາມາດພັດທະນາແບບຍືນຍົງ.
ທ່ານຊູ່ຕຸ່ງຢວີ້, ຜູ້ອຳນວຍໃຫຍ່ອົງການຟາວ ໄດ້ຍ້ອງຍໍກຸ່ມ 20 ປະເທດວ່າໄດ້ເສີມຂະຫຍາຍບົດບາດສຳຄັນໃນໄລຍະເກີດມີການແຜ່ລະບາດຂອງພະຍາດໂຄວິດ-19, ສາມາດຫຼຸດຜົນກະທົບຂອງພະຍາດໂຄວິດ-19 ທີ່ມີຕໍ່ກະສິກຳ, ແຕ່ວ່າສິ່ງທ້າທາຍຍັງຄົງມີຢູ່. ທ່ານຊູ່ຕຸ່ງຢວີ້ ຊີ້ໃຫ້ເຫັນວ່າ, ອີງຕາມການປະເມີນຂອງອົງການຟາວ, ອັດຕາສ່ວນຂອງປະຊາກອນທີ່ບໍ່ມີຄວາມໝັ້ນຄົງດ້ານສະບຽງອາຫານຢູ່ໃນໂລກໄດ້ເພີ່ມຂຶ້ນຈາກ 8,4% ເປັນປະມານ 9,9%. ສະນັ້ນ, ທ່ານຈຶ່ງຫວັງວ່າຝ່າຍຕ່າງໆຈະໃຫ້ການຊ່ວຍເຫຼືອຊາວກະສິກອນຢູ່ແຫ່ງຕ່າງໆທີ່ເກີດຄວາມວຸ້ນວາຍໃນໂລກ.