ທ່ານສີຈິ້ນຜິງເນັ້ນໜັກວ່າ ຈີນຕ້ອງເລັ່ງສ້າງສູນຜູ້ມີຄວາມຮູ້ຄວາມສາມາດທີ່ສຳຄັນແລະຈຸດຍຸດທະສາດດ້ານການປະດິດສ້າງຂອງໂລກ
ກອງປະຊຸມວຽກງານກ່ຽວກັບຜູ້ມີຄວາມຮູ້ຄວາມສາມາດຂັ້ນສູນກາງຈີນໄດ້ຈັດຂຶ້ນຢູ່ນະຄອນຫຼວງປັກກິ່ງແຕ່ວັນທີ 27-28 ກັນຍານີ້. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ກ່າວເນັ້ນວ່າ: ຕ້ອງຍຶດໝັ້ນການທີ່ໃຫ້ພັກຄຸ້ມຄອງຜູ້ມີຄວາມຮູ້ຄວາມສາມາດ, ຍຶດໝັ້ນທິດທາງຫັນໜ້າສູ່ເຕັກນິກວິທະຍາສາດແຖວໜ້າຂອງໂລກ,ຫັນໜ້າສູ່ສະໜາມຮົບຕົ້ນຕໍດ້ານເສດຖະກິດ, ຫັນໜ້າສູ່ຊີວິດແລະສຸຂະພາບຂອງປະຊາຊົນ, ລົງເລິກຈັດຕັ້ງປະຕິບັດຍຸດທະສາດສ້າງປະເທດໃຫ້ເຂັ້ມແຂງດ້ານຊັບພະຍາກອນມະນຸດທີ່ມີຄວາມຮູ້ຄວາມສາມາດໃນຍຸກໃໝ່, ເລັ່ງສ້າງສູນຜູ້ມີຄວາມຮູ້ຄວາມສາມາດທີ່ສຳຄັນແລະຈຸດຍຸດທະສາດດ້ານການປະດິດສ້າງຂອງໂລກ.
ທ່ານສີຈິ້ນຜິງສະເໜີວ່າ: ເປົ້າໝາຍໃນການເລັ່ງສ້າງສູນຜູ້ມີຄວາມຮູ້ຄວາມສາມາດທີ່ສຳຄັນແລະຈຸດຍຸດທະສາດດ້ານການປະດິດສ້າງຂອງໂລກກໍຄື: ເມື່ອຮອດປີ2025, ທົ່ວສັງຄົມຕ້ອງທຸ້ມເທຄ່າໃຊ້ຈ່າຍໃນການຄົ້ນຄວ້າພັດທະນາໃຫ້ເພີ່ມຂຶ້ນຢ່າງຫຼວງຫຼາຍ, ກໍ່ສ້າງຖັນແຖວກຳລັງຫຼັກແຫຼ່ງໃນການປະດິດສ້າງດ້ານເຕັກນິກວິທະຍາສາດໃຫ້ໄດ້ຮັບຄວາມຄືບໜ້າທີ່ສຳຄັນ, ເຕົ້າໂຮມນັກວິທະຍາສາດຂັ້ນສຸດຍອດໃຫ້ເພີ່ມຂຶ້ນຢ່າງພົ້ນເດັ່ນ, ຄວາມສາມາດໃນການສ້າງຜູ້ມີຄວາມຮູ້ຄວາມສາມາດຢ່າງເປັນເຈົ້າຕົນເອງໄດ້ຍົກສູງຂຶ້ນຢ່າງບໍ່ຢຸດຢັ້ງ, ໃນຂົງເຂດເຕັກນິກແກນກາງທີ່ສຳຄັນຕ້ອງມີຜູ້ມີຄວາມຮູ້ຄວາມສາມາດດ້ານເຕັກນິກວິທະຍາສາດທາງຍຸດທະສາດ, ຜູ້ມີຄວາມຮູ້ຄວາມສາມາດແລະທີມງານປະດິດສ້າງທີ່ເປັນຜູ້ນຳໜ້າໃນດ້ານເຕັກນິກວິທະຍາສາດແຖວໜ້າເປັນຈຳນວນຫຼວງຫຼາຍ. ເມື່ອຮອດປີ2030, ລະບົບລະບຽບການກ່ຽວກັບຜູ້ມີຄວາມຮູ້ຄວາມສາມາດທີ່ສອດຄ່ອງກັບການພັດທະນາດ້ວຍຄຸນນະພາບສູງໄດ້ສ້າງຂຶ້ນໂດຍພື້ນຖານ, ຄວາມສາມາດໃນການສ້າງຜູ້ມີຄວາມຮູ້ຄວາມສາມາດຢ່າງເປັນເຈົ້າຕົນເອງໄດ້ຍົກສູງຂຶ້ນຢ່າງພົ້ນເດັ່ນ, ຄວາມສາມາດໃນການດຶງດູດຜູ້ມີຄວາມຮູ້ຄວາມສາມາດທີ່ດີເດັ່ນຂອງໂລກໄດ້ເພີ່ມຂຶ້ນຢ່າງເດັ່ນຊັດ, ໃນຂົງເຂດເຕັກນິກວິທະຍາສາດສຳຄັນມີຜູ້ນຳໜ້າຈຳນວນໜຶ່ງ, ໃນຂົງເຂດເຕັກນິກວິທະຍາສາດທີ່ຈະເລີນໃໝ່, ວິທະຍາສາດທີ່ລ້ຳໜ້າຂ້າມຂອບເຂດ ມີຜູ້ບຸກເບີກຈຳນວນໜຶ່ງ, ເມື່ອຮອດປີ2035, ຈີນຕ້ອງມີທ່າແຮງທຽບຖານໃນການແຂ່ງຂັນດ້ານຜູ້ມີຄວາມຮູ້ຄວາມສາມາດໃນຫຼາຍຂົງເຂດ, ກຳລັງສັງລວມແຫ່ງຊາດດ້ານເຕັກນິກວິທະຍາສາດທາງຍຸດທະສາດແລະຖັນແຖວຜູ້ມີຄວາມຮູ້ຄວາມສາມາດລະດັບສູງຕ້ອງຢືນຢູ່ແຖວໜ້າຂອງໂລກ.