ຕອນຄ່ຳວັນທີ 29 ກັນຍານີ້,ເຄື່ອງຊ່ວຍເຫຼືອມະນຸດສະທຳແບບສຸກເສີນຊຸດທຳອິດທີ່ລັດຖະບານຈີນມອບໃຫ້ອັຟການີສະຖານໄດ້ຂົນສົ່ງໄປຮອດສະໜາມບິນສາກົນຢູ່ນະຄອນຫຼວງກາບຸນປະເທດອັຟການິດສະຖານຢ່າງສະດວກ.
ສອງຝ່າຍຈີນ--ອັຟການິດສະຖານໄດ້ຈັດພິທີມອບຮັບຢູ່ເດີ່ນບິນຢ່າງຄຶກຄື້ນ. ທ່ານຫວາງອີ ເອກອັກຄະລັດຖະທູດຈີນປະຈຳອັຟການິດສະຖານ ແລະ ຮັກສາການລັດຖະມົນຕີກະຊວງວຽກງານຊາວອົບພະຍົບຂອງລັດຖະບານຊົ່ວຄາວອັຟການິດສະຖານໄດ້ເປັນປະທານຈັດພິທີດັ່ງກ່າວ.
ທ່ານຫວາງອີກ່າວວ່າ, ແຕ່ຕົ້ນປີນີ້ມາ, ຍ້ອນປະສົບຜົນກະທົບຈາກໄພແຫ້ງແລ້ງ, ການແຜ່ລະບາດຂອງພະຍາດໂຄວິດ-19 ຮອບທີ 3 ແລະ ສະຖານະການຄວາມວຸ້ນວາຍ, ໂດຍສະເພາະແມ່ນໃນຫວ່າງມໍ່ໆມານີ້ ສະຖານະການຢູ່ອັຟການິດສະຖານໄດ້ເກີດມີການປ່ຽນແປງໂດຍພື້ນຖານ, ລັດຖະບານຊົ່ວຄາວໄດ້ຮັບການສ້າງຕັ້ງຂຶ້ນໃນເບື້ອງຕົ້ນ, ລະບຽບການພວມໄດ້ຮັບການຟື້ນຟູໃຫ້ເປັນປົກກະຕິເທື່ອລະກ້າວ, ອັຟການິດສະຖານຍັງຕ້ອງການການສະໜັບສະໜູນ ແລະ ການຊ່ວຍເຫຼືອດ້ານຕ່າງໆຈາກປະຊາຄົມໂລກຢ່າງຮີບດ່ວນ. ຈີນເປັນປະເທດບ້ານໃກ້ເຮືອນຄຽງຂອງອັຟການິດສະຖານ, ໄດ້ເອົາໃຈໃສ່ຕິດຕາມຄວາມຕ້ອງການຂອງປະຊາຊົນອັຟການິດສະຖານຢ່າງສະເໝີຕົ້ນສະເໝີປາຍ. ຈີນໄດ້ຜ່ານຜ່າຄວາມຫຍຸ້ງຍາກນານາປະການ, ໄດ້ສົ່ງເຄື່ອງກັນໜາວທີ່ປະຊາຊົນອັຟການິດສະຖານຕ້ອງການຢ່າງຮີບດ່ວນນັ້ນໄປຮອດນະຄອນຫຼວງກາບຸນໂດຍໄວ. ນີ້ໄດ້ພິສູດໃຫ້ເຫັນວ່າຈີນໄດ້ປະຕິບັດຕາມຄຳໝັ້ນສັນຍາທີ່ຈະໃຫ້ການຊ່ວຍເຫຼືອອັຟການິດສະຖານຢ່າງແທ້ຈິງ ແລະ ໄດ້ຊ່ວຍເຫຼືອປະຊາຊົນອັຟການິດສະຖານໃຫ້ພົ້ນອອກຈາກຄວາມຫຍຸ້ງຍາກຈົນສຸດຄວາມສາມາດຂອງຕົນ.
ທ່ານຫວາງອີກ່າວຕື່ມວ່າ, ປະຈຸບັນ, ອັຟການິດສະຖານຍັງປະເຊີນໜ້າກັບສິ່ງທ້າທາຍທີ່ຂ້ຽວຂາດໃນດ້ານຕ່າງໆ, ເຊັ່ນ: ດ້ານມະນຸດສະທຳ, ຊີວິດການເປັນຢູ່ຂອງປະຊາຊົນ, ການແຜ່ລະບາດຂອງພະຍາດໂຄວິດ-19 ແລະອື່ນໆ, ປະຊາຄົມໂລກຄວນຮ່ວມແຮ່ງຮ່ວມໃຈກັນຊ່ວຍເຫຼືອປະຊາຊົນອັຟການິດສະຖານໃຫ້ສາມາດຫຼຸດພົ້ນອອກຈາກຄວາມຫຍຸ້ງຍາກ. ໂດຍສະເພາະແມ່ນບາງປະເທດທີ່ເປັນຜູ້ສ້າງສະພາບຄວາມຫຍຸ້ງຍາກໃຫ້ຢູ່ອັຟການິດສະຖານ, ຍິ່ງຄວນປະຕິບັດຕາມຄຳໝັ້ນສັນຍາທີ່ໃຫ້ໄວ້ກັບອັຟການິດສະຖານຢ່າງແທ້ຈິງ, ແບກຫາບຄວາມຮັບຜິດຊອບ ແລະ ພັນທະເທົ່າທີ່ຄວນ, ເຮັດແທ້ທຳຈິງເພື່ອຫຼຸດຜ່ອນຄວາມຫຍຸ້ງຍາກຂອງປະຊາຊົນອັຟການິດສະຖານໂດຍໄວ.