ຕອນເຊົ້າຂອງວັນທີ 9 ຕຸລານີ້, ພິທີລະນຶກເຖິງການປະຕິວັດປີ1911ຄົບຮອບ 110 ປີໄດ້ຈັດຂຶ້ນຢ່າງຍິ່ງໃຫຍ່ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ ສປ ຈີນ.
ວັນທີ 10 ຕຸລາ ປີ1911, ຄ້າຍທະຫານຊ່າງກອງພັນນ້ອຍທີ 8 ຂອງກອງທັບໃໝ່ແຂວງຫູເປີຍໄດ້ມີສຽງປືນດັງຂຶ້ນ, ຜ່ານການສູ້ຮົບຢ່າງດຸເດືອດເປັນເວລາໜຶ່ງຄືນ, ກຳລັງປະຕິວັດສາມາດຍຶດຄອງໄດ້ທົ່ວເມືອງອູຊ່າງ, ຫຼັງຈາກນັ້ນ, ແຂວງຕ່າງໆໃນທົ່ວປະເທດຈີນໄດ້ພາກັນສະໜັບສະໜູນແລະລຸກຮືຂຶ້ນ, ມື້ທຳອິດຂອງປີ1912, ສາທາລະນະລັດຈີນໄດ້ສະຖາປະນາຂຶ້ນ, ປະເທດສາທາລະນະລັດປະຊາທິປະໄຕປະເທດທຳອິດຢູ່ພາກພື້ນອາຊີໄດ້ກຳເນີດຂຶ້ນ.
ການປະຕິວັດປີ1911 ທີ່ລະເບີດຂຶ້ນເມື່ອ 110 ປີກ່ອນນັ້ນ ເປັນການສິ້ນສຸດລະບອບລາຊະທິປະໄຕຜະເດັດການທີ່ປົກຄອງປະເທດຈີນມາເປັນເວລາຫຼາຍພັນປີ. ຈິດໃຈປະຕິວັດປີ1911ຄືຈິດໃຈລັດທິຮັກຊາດ. ຍ້ອນຢູ່ພາຍໃຕ້ການກະຕຸກຊຸກຍູ້ຈາກຈິດໃຈລັດທິຮັກຊາດ, ຊາວພັກກອມມູນິດຈີນໄດ້ແບກຫາບພາລະກິດທີ່ນັກຮົບປະຕິວັດລຸ້ນກ່ອນທີ່ຍັງເຮັດບໍ່ທັນສຳເລັດຜົນນັ້ນ ໄດ້ພາກັນສືບຕໍ່ຕໍ່ສູ້ຕໍ່ໄປ. ນັບແຕ່ສົງຄາມປະຕິວັດທີ່ດິນ, ສົງຄາມຕໍ່ຕ້ານຟາຊິດຍີ່ປຸ່ນຈົນຮອດສົງຄາມປົດປ່ອຍປະຊາຊົນ, ໃນຂະນະທີ່ຊາວພັກກອມມູນິດຈີນສືບທອດຈິດໃຈປະຕິວັດປີ1911ນັ້ນຍັງໄດ້ເສີມຂະຫຍາຍແລະຍົກສູງຈິດໃຈດັ່ງກ່າວໂດຍໄດ້ນຳພາປະຊາຊົນອັນໄພສານຍາດເອົາໄຊຊະນະຂອງການປະຕິວັດລັດທິປະຊາທິປະໄຕແບບໃໝ່, ເຊິ່ງໄດ້ບັນລຸເປົ້າໝາຍຄວາມເປັນເອກະລາດແຫ່ງຊາດແລະປົດປ່ອຍປະຊາຊົນຕາມຄວາມໃຝ່ຝັນຂອງນັກຮົບຜູ້ຮັກຊາດຮັກຄວາມເປັນທຳທັງຫຼາຍຈົນນັບບໍ່ຖ້ວນນັບຕັ້ງແຕ່ສົງຄາມຢາຝິ່ນປີ1840ເປັນຕົ້ນມາ. ຈີນສັງຄົມນິຍົມທີ່ເຕັມໄປດ້ວຍພະລັງຊີວິດໄດ້ຢືນຢ່າງສະຫງ່າຜ່າເຜີຍຢູ່ດິນແດນຕາເວັນອອກຂອງໂລກ.
ໃນພິທີລະນຶກເຖິງການປະຕິວັດປີ1911 ຄົບຮອບ 110 ປີ, ທ່ານສີຈິ້ນຜິງ ປະທານປະເທດຈີນໄດ້ກ່າວວ່າ: ປະຫວັດສາດ 110 ປີນັບແຕ່ການປະຕິວັດປີ1911ເປັນຕົ້ນມາໄດ້ສ້າງແຮງບັນດານໃຈໃຫ້ກັບພວກເຮົາວ່າ ການບັນລຸເປົ້າໝາຍຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊາດຈີນຕ້ອງມີກຳລັງເຂັ້ມແຂງເພື່ອນຳພາປະຊາຊົນຈີນກ້າວເດີນໄປໜ້າ, ເຊິ່ງກຳລັງເຂັ້ມແຂງນີ້ກໍແມ່ນພັກກອມມູນິດຈີນ. ເສັ້ນທາງແມ່ນບັນຫາພື້ນຖານທີ່ສຸດ, ຕ້ອງບັນລຸເປົ້າໝາຍດັ່ງກ່າວໂດຍອາໄສປະຊາຊົນຈີນບຸກບືນສູ້ຊົນຢ່າງກ້າຫານດ້ວຍຕົນເອງ, ປະຊາຊົນຈີນແລະປະຊາຊາດຈີນຕ້ອງຮ່ວມກັນຜ່ານຜ່າຄວາມຫຍຸ້ງຍາກ, ອາໄສຄວາມສາມັກຄີກັນເພື່ອເອົາຊະນະຄວາມສ່ຽງແລະສິ່ງທ້າທາຍທຸກຢ່າງບົນເສັ້ນທາງກ້າວເດີນໄປໜ້າ, ບໍ່ພຽງແຕ່ຕ້ອງການສະພາບແວດລ້ອມພາຍໃນປະເທດທີ່ມີຄວາມສະຫງົບ,ມີສະຖຽນລະພາບແລະມີຄວາມສາມັກຄີກັນເທົ່ານັ້ນ, ຍັງຕ້ອງການສະພາບແວດລ້ອມສາກົນທີ່ມີສັນຕິພາບແລະສະຖຽນລະພາບອີກດ້ວຍ.