ສວນສາທາລະນະແຫ່ງຊາດ 5 ແຫ່ງຊຸດທໍາອິດໄດ້ສ້າງຂຶ້ນຢ່າງເປັນທາງການ
ຕາມຂ່າວຈາກກອງປະຊຸມປະເທດພາຄີສົນທິສັນຍາວ່າດ້ວຍຊີວະນາໆພັນ ຄັ້ງທີ 15 ຫຼື COP15 ທີ່ຈັດຂຶ້ນໃນວັນທີ 12 ຕຸລານີ້, ປະເທດຈີນຈະສ້າງສວນສາທາລະນະແຫ່ງຊາດ 5 ແຫ່ງເປັນຊຸດທໍາອິດຢ່າງເປັນທາງການ, ເຊັ່ນ ສວນສາທາລະນະແຫ່ງຊາດຊ່ານຈ່ຽງຢວນ(Sanjiangyuan), ສວນສາທາລະນະແຫ່ງຊາດໝີແພນດາໃຫຍ່, ສວນສາທາລະນະແຫ່ງຊາດເສືອ ແລະ ເສຶອດາວພາກຕາເວັນອອກສຽງເໜືອ, ສວນສາທາລະນະແຫ່ງຊາດປ່າໄມ້ເຂດຮ້ອນໄຫຫນານ ແລະ ສວນສາທາລະນະແຫ່ງຊາດພູອູຢີຊ່ານ(Wuyi Mountain) ເຊິ່ງມີເຂດອະນຸລັກເຖິງ 230.000 ກິໂລຕາແມັດ, ກວມເອົາ 30% ຂອງພັນພືດ ແລະສັດສະຫງວນພິເສດລະດັບຊາດຊະນິດຕ່າງໆໃນຜືນແຜ່ນດິນຂອງຈີນ.
ສວນສາທາລະນະແຫ່ງຊາດຊ່ານຈ່ຽງຢວນຕັ້ງຢູ່ເຂດພາກກາງຂອງພູພຽງຊິງໄຫ-ທິເບດ(Qinghai-Tibet Plateau) ເປັນແຫຼ່ງກຳເນີດຂອງແມ່ນໍ້າຢາງຈື ແມ່ນໍ້າເຫຼືອງ ແລະ ແມ່ນໍ້າລ້ານຊ້າງ. ພາຍໃນສວນມີລະບົບນິເວດຂອງພູສູງ ແລະ ເຂດອາກາດໜາວ(Alpine ecosystem) ຫຼາຍຊະນິດທີ່ກະຈາຍຢູ່ຢ່າງກວ້າງຂວາງເຊັ່ນ ພູຫິມະນໍ້າກ້ອນ, ດິນທາມທີ່ມີຄວາມສູງຈາກລະດັບໜ້ານ້ຳທະເລ, ທະເລຊາຍ ແລະ ອື່ນໆ ເຊິ່ງເປັນແບບຢ່າງຂອງການອະນຸລັກທີ່ເປັນມາດຕະຖານອັນດີຕໍ່ລະບົບນິເວດຂອງພູສູງ ແລະ ເຂດອາກາດໜາວຂອງພູພຽງຊິງໄຫ-ທິເບດ.
ສວນສາທາລະນະແຫ່ງຊາດໝີແພນດາໃຫຍ່ ມີເນື້ອທີ່ດິນຂ້າມສາມແຂວງຄື ແຂວງເສສວນ ແຂວງສານຊີ ແລະ ແຂວງກັນຊູ, ເຊິ່ງເປັນເຂດແຈກຢາຍ ແລະ ເຂດດໍາລົງຊີວິດຕົ້ນຕໍຂອງໝີແພນດາໃຫຍ່, ເຊິ່ງໄດ້ອະນຸລັກໝີແພນດາໃຫຍ່ໃນປ່າຂອງຈີນຫຼາຍກວ່າ 70%.
ສວນສາທາລະນະແຫ່ງຊາດເສືອ ແລະ ເສຶອດາວພາກຕາເວັນອອກສຽງເໜືອມີເນື້ອທີ່ດິນຂ້າມແຂວງຈີຫຼິນ ແລະ ເເຂວງເຮີຍຫຼົງຈຽງ, ມີຊາຍແດນຕິດກັບລັດເຊຍ ແລະ ເກົາຫຼີເໜືອ, ໃນສວນນີ້ມີການແຈກຢາຍຂອງຝູງເສືອພາກຕາເວັນອອກສຽງເໜືອ ແລະ ເສຶອດາວພາກຕາເວັນອອກສຽງເໜືອທີ່ມີຂະໜາດໃຫຍ່ທີ່ສຸດໃນຈີນ ແລະ ເປັນຝູງດຽວຂອງຈີນທີ່ມີການອອກແມ່ແຜ່ລູກ. ເຊິ່ງເປັນແບບຢ່າງຂອງລະບົບນິເວດປ່າໄມ້ແຖບອຸ່ນ ກໍຄືແບບຢ່າງຂອງການອະນຸລັກການຮ່ວມມືຂ້າມແດນ.
ສວນສາທາລະນະແຫ່ງຊາດປ່າໄມ້ເຂດຮ້ອນໄຫຫນານ ຕັ້ງຢູ່ເຂດກາງຂອງເກາະໄຫຫນານ, ໄດ້ອະນຸລັກຮັກສາປ່າໄມ້ເຂດຮ້ອນຮູບແບບເກາະ ແລະ ມີລັກສະນະເທິງບົກທີ່ສົມບູນ ແລະ ມີຄວາມຫຼາກຫຼາຍທີ່ສຸດ. ບ່ອນນີ້ເປັນເຂດແຈກຢາຍດຽວຂອງທະນີແຂນຍາວໄຫໜານ--ສັດລ້ຽງລູກດ້ວຍນ້ຳນົມທີ່ໃກ້ຈະສູນພັນທີ່ສຸດໃນໂລກ, ເປັນຄັງລໍ້າຄ່າຂອງຊີວະນາໆພັນເຂດຮ້ອນ ແລະ ຊັບພະຍາກອນພັນທຸກໍາ, ກາຍເປັນແບບຢ່າງຂອງການປົກປັກຮັກສາຊີວະນາໆພັນ ແລະ ການສືບທອດຊັບພະຍາກອນທໍາມະຊາດປ່າໄມ້ເຂດຮ້ອນຮູບແບບເກາະ ແລະ ລັກສະນະເທິງບົກ.
ສວນສາທາລະນະແຫ່ງຊາດພູອູຢີຊ່ານ ມີເນື້ອທີ່ດິນຂ້າມແຂວງຟູຈ້ຽນ ແລະ ແຂວງຈຽງຊີ, ມີລະບົບນິເວດປ່າໄມ້ໃບຂຽວຕະຫຼອດປີແບບດັ້ງເດີມຂອງເຂດກາງແຖບຮ້ອນທີ່ສົມບູນທີ່ສຸດ ແລະ ມີເນື້ອທີ່ໃຫຍ່ທີ່ສຸດໃນເຂດເສັ້ນຂະໜານດຽວກັນ, ເປັນຄັງສັດ ແລະ ພືດຂອງພາກຕາເວັນອອກສຽງໃຕ້ຂອງຈີນ. ພູອູຢີຊ່ານມີທັງມໍລະດົກທາງວັດທະນະທໍາໂລກ ແລະ ທໍາມະຊາດໂລກ, ເປັນແບບຢ່າງການສຶບທອດຂອງວັດທະນະທໍາ ແລະ ທໍາມະຊາດ, ກໍເປັນແບບຢ່າງຂອງການຢູ່ຮ່ວມກັນຢ່າງກົມກຽວຂອງມະນຸດ ແລະ ທໍາມະຊາດ.