ຕອນຄ່ຳຂອງວັນທີ 13 ຕຸລານີ້, ກອງປະຊຸມປະເທດພາຄີໃນ“ສົນທິສັນຍາວ່າດ້ວຍຊີວະນາໆພັນ”ຄັ້ງທີ 15 ຫຼື COP15 ໄດ້ຈັດກອງປະຊຸມຖະແຫຼງຂ່າວຄັ້ງທຳອິດ ໂດຍໄດ້ແນະນຳໝາກຜົນຕ່າງໆຂອງກອງປະຊຸມລະດັບສູງ.
ທ່ານຈ້າວຢີ່ງມີນ ຮອງລັດຖະມົນຕີກະຊວງສິ່ງແວດລ້ອມນິເວດໄດ້ແນະນຳໃຫ້ຮູ້ວ່າ: ກອງປະຊຸມລະດັບສູງຕ່າງໆທີ່ຈັດຂຶ້ນໃນໄລຍະທຳອິດຂອງກອງປະຊຸມ COP15 ໄດ້ຮັບໝາກຜົນສຳຄັນໃນສາມດ້ານດັ່ງນີ້: ອັນທີໜຶ່ງ, ໄດ້ສະໜອງແຮງຂັບເຄື່ອນດ້ານການເມືອງລະດັບສູງໃຫ້ແກ່ການປົວແປງແລະຄຸ້ມຄອງຊີວະນາໆພັນຂອງໂລກ. ອັນທີສອງ, ໄດ້ປະກາດ“ຖະແຫຼງການຄຸນໝີງ”. ອັນທີສາມ, ໄດ້ປະກາດມາດຕະການໃໝ່ຂອງຈີນໃນການອະນຸລັກຊີວະນາໆພັນ.
ຫວ່າງກ່ອນນີ້ບໍ່ດົນ, ຝູງຊ້າງອາຊີໄດ້ເຄື່ອນຍ້າຍເກືອບຂ້າມແຂວງຢຸນນານເປັນເວລາ 17 ເດືອນ, ເລື່ອງນີ້ໄດ້ຮັບຄວາມສົນໃຈຈາກທົ່ວໂລກ. ໃນກອງປະຊຸມຖະແຫຼງຂ່າວດັ່ງກ່າວ, ທ່ານວາງສຽນກ່າງ ຮອງເຈົ້າແຂວງຂອງແຂວງຢຸນນານປະເທດຈີນກ່າວວ່າ: ແຂວງຢຸນນານຈະສ້າງກົນໄກຄຸ້ມຄອງແລະຄວບຄຸມໄລຍະຍາວທີ່ຖືກຕ້ອງຕາມຫຼັກວິທະຍາສາດແລະສອດຄ່ອງກັບກົດເກນດຳລົງຊີວິດແລະການເຕີບໃຫຍ່ຂອງຊ້າງອາຊີ. ຈຳນວນຝູງຊ້າງອາຊີຂອງຈີນໄດ້ເພີ່ມຂຶ້ນຈາກ 100 ກວ່າໂຕໃນຊຸມປີ 1980 ຂອງສະຕະວັດແລ້ວນີ້ເປັນ 300 ກວ່າໂຕໃນປະຈຸບັນນີ້.