ເວລາ 15 ໂມງຂອງວັນທີ 27 ຕຸລານີ້, ຫ້ອງການຖະແຫຼງຂ່າວຂອງລັດຖະບານຈີນໄດ້ຈັດກອງປະຊຸມຖະແຫຼງຂ່າວ, ໂດຍໄດ້ເຜີຍແຜ່ປຶ້ມປົກຂາວວ່າດ້ວຍ “ນະໂຍບາຍແລະການປະຕິບັດງານຂອງຈີນກ່ຽວກັບການຮັບມືກັບການປ່ຽນແປງຂອງດິນຟ້າອາກາດ”.
ປຶ້ມປົກຂາວລະບຸວ່າ: ການປ່ຽນແປງຂອງດິນຟ້າອາກາດແມ່ນສິ່ງທ້າທາຍຮ່ວມກັນຂອງມວນມະນຸດ. ໃນຖານະເປັນປະເທດພວມພັດທະນາໃຫຍ່ທີ່ສຸດໃນໂລກ, ຈີນໄດ້ຜ່ານຜ່າຄວາມຫຍຸ້ງຍາກດ້ານເສດຖະກິດ, ສັງຄົມແລະດ້ານອື່ນໆ, ໄດ້ປະຕິບັດຍຸດທະສາດ, ມາດຕະການແລະການເຄື່ອນໄຫວຕ່າງໆເພື່ອຮັບມືກັບການປ່ຽນແປງຂອງດິນຟ້າອາກາດ, ເຊິ່ງໄດ້ມີຜົນງານທີ່ຕັ້ງໜ້າໃນດ້ານການຮັບມືກັບການປ່ຽນແປງຂອງດິນຟ້າອາກາດ.
ປຶ້ມປົກຂາວຂຽນວ່າ: ການຮັບມືກັບການປ່ຽນແປງຂອງດິນຟ້າອາກາດຂອງຈີນໄດ້ເກີດມີການປ່ຽນແປງຄັ້ງປະຫວັດສາດ. ການພັດທະນາເສດຖະກິດແລະການຫຼຸດການປ່ອຍມົນລະພິດກໍຄືການຫຼຸດການປ່ອຍກາກບອນດິອົກຊິດໄດ້ສະແດງໃຫ້ເຫັນປະສິດທິຜົນໃນການປະສົມປະສານກັນ, ການພັດທະນາຕາມທິດສີຂຽວໄດ້ກາຍເປັນຈຸດເດັ່ນແຫ່ງການພັດທະນາເສດຖະກິດທີ່ມີຄຸນນະພາບສູງ, ໃນເວລາທີ່ເສດຖະກິດສັງຄົມພັດທະນາຢ່າງປອດໃສແລະຕໍ່ເນື່ອງ, ການປ່ອຍກາກບອນດິອົກຊິດໄດ້ຫຼຸດລົງຢ່າງຈະແຈ້ງ. ພະລັງງານທີ່ບໍ່ແມ່ນພະລັງງານປອດຊິດໄດ້ພັດທະນາຢ່າງວ່ອງໄວ, ການສິ້ນເປືອງພະລັງງານກໍໄດ້ຫຼຸດລົງຢ່າງຈະແຈ້ງ, ໂຄງປະກອບຂອງການນຳໃຊ້ພະລັງງານກໍໄດ້ເລັ່ງລັດຫັນເປັນການໃຊ້ພະລັງງານສະອາດແລະກາກບອນຕ່ຳ, ການດຳລົງຊີວິດຕາມທິດສີຂຽວແລະກາກບອນຕ່ຳກໍໄດ້ກາຍເປັນແຟຊັນໃໝ່ແລ້ວ.
ປຶ້ມປົກຂາວຍັງກ່າວຕື່ມວ່າ: ຈີນຈະຈັດຕັ້ງປະຕິບັດເປົ້າໝາຍການປະກອບສ່ວນທີ່ເປັນເຈົ້າການຢ່າງແທ້ຈິງ, ເພີ່ມທະວີການຄວບຄຸມການປ່ອຍອາຍພິດເຮືອນແກ້ວ, ຍົກສູງຄວາມສາມາດໃນການປັບຕົວໃຫ້ເຂົ້າກັບການປ່ຽນແປງຂອງດິນຟ້າອາກາດ, ສຸມຄວາມພະຍາຍາມແລະປະກອບສ່ວນຫຼາຍກວ່າເກົ່າເພື່ອຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ແລະເຮັດໃຫ້ໜ່ວຍໂລກທີ່ເປັນບ້ານເມືອງຮ່ວມສວຍງາມກວ່າເກົ່າ.