ວັນທີ 26 ຕຸລານີ້ຕາມເວລາທ້ອງຖິ່ນ, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ທີ່ພວມຢ້ຽມຢາມກາຕາ ໄດ້ພົບປະກັບທ່ານອາເມຍ ຄານ ມູຕາຈີ ຮັກສາການລັດຖະມົນຕີກະຊວງການຕ່າງປະເທດຂອງລັດຖະບານຊົ່າວຄາວຕາລີບັນຂອງອັຟການິສະຖານ ຢູ່ນະຄອນຫຼວງໂດຮາ.
ທ່ານຫວາງຢີ້ກ່າວວ່າ: ຈີນເຄົາລົບການຕັດສິນໃຈຂອງອັຟການິສະຖານໃນການຄົ້ນຄວ້າເສັ້ນທາງການພັດທະນາ ແລະ ຮູບແບບການປົກຄອງ ທີ່ສອດຄ່ອງກັບສະພາບຄວາມເປັນຈິງຂອງປະເທດຕົນ, ເຄົາລົບອະທິປະໄຕ, ເອກະລາດ ແລະ ຜືນແຜ່ນດິນອັນຄົບຖ້ວນຂອງອັຟການິສະຖານ. ຈີນເອົາໃຈໃສ່ສະພາບຄວາມຫຍຸ້ງຍາກໃນປັດຈຸບັນຂອງອັຟການິສະຖານ, ຈີນຍິນດີສືບຕໍ່ໃຫ້ການຊ່ວຍເຫຼືອອັຟການິສະຖານຕາມຄວາມສາມາດຂອງຕົນ. ຈີນຍິນດີຄົ້ນຄວ້າແຜນການດຳເນີນການຮ່ວມມືໃນຂົງເຂດການສ້າງສາປະເທດຄືນໃໝ່ດ້ານເສດຖະກິດໃຫ້ກັບອັຟການິສະຖານ ພາຍຫຼັງອັຟການິສະຖານໄດ້ຟື້ນຟູສະຖຽນລະພາບ ແລະ ມີເງື່ອນໄຂດ້ານຄວາມປອດໄພແລ້ວ.
ທ່ານອາເມຍ ມູຕາຈີ ໄດ້ສະແດງຄວາມຂອບໃຈການສະໜັບສະໜູນ ແລະ ການຊ່ວຍເຫຼືອຂອງຈີນ ແລະ ກ່າວວ່າ: ຈະນຳໃຊ້ການຊ່ວຍເຫຼືອຈາກຈີນເຂົ້າໃນການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ໃນຂະນະດຽວກັນ, ກໍຈະພະຍາຍາມບັນລຸການພັດທະນາດ້ວຍຕົນເອງ. ອັຟການິສະຖານຈະສຸມກຳລັງເຂົ້າໃນການບັນລຸຄວາມມີສະຖຽນລະພາບຂອງຕົນ, ໃນຂະນະດຽວກັນ, ກໍຈະຊຸກຍູ້ການສ້າງສັນຕິພາບ ແລະ ຄວາມໝັ້ນຄົງຂອງພາກພື້ນ. ທ່ານກ່າວເນັ້ນຕື່ມວ່າ: ອົງການຕາລີບັນຂອງອັຟການິສະຖານຈະເດັດດ່ຽວຫ້າມບໍ່ໃຫ້ບຸກຄົນໃດໆ ຫຼື ອິດທິກຳລັງໃດໆ ໃຊ້ດິນແດນຂອງອັຟການິສະຖານເປັນບ່ອນດຳເນີນການເຄື່ອນໄຫວ ເພື່ອທຳລາຍຜົນປະໂຫຍດຂອງຈີນ.
ສອງຝ່າຍເຫັນດີຈະສ້າງກົນໄກປະສານງານວຽກງານ ເພື່ອປຶກສາຫາລືກັນຕື່ມອີກ.