ໃນເວລາຕອບຄຳຖາມຂອງນັກຂ່າວກ່ຽວກັບຄວາມພະຍາຍາມຂອງຈີນແລະອາເມຣິກາໃນການຮັບມືກັບການປ່ຽນແປງຂອງດິນຟ້າອາກາດ ຢູ່ທີ່ກອງປະຊຸມຖະແຫຼງຂ່າວປະຈຳທີ່ຈັດຂຶ້ນໃນວັນທີ 3 ພະຈິກນີ້, ທ່ານວ່າງເວີນປິ່ນ ໂຄສົກກະຊວງການຕ່າງປະເທດຈີນກ່າວວ່າ: ການຮັບມືກັບການປ່ຽນແປງຂອງດິນຟ້າອາກາດ ຕ້ອງມີການເຄື່ອນໄຫວຕົວຈິງແຕ່ບໍ່ແມ່ນຄຳເວົ້າທີ່ໄຮ້ສາລະ.
ທ່ານວ່າງເວີນປິ່ນກ່າວວ່າ: ຈີນໄດ້ມີການເຄື່ອນໄຫວຕົວຈິງໃນການຮັບມືກັບການປ່ຽນແປງຂອງດິນຟ້າອາກາດ. ສະເລ່ຍແລ້ວ,ເນື້ອທີ່ການປູກໄມ້ສ້າງປ່າຢູ່ຈີນໄດ້ເພີ່ມຂຶ້ນປະມານ 12.000 ເຮັກຕາຕໍ່ມື້, ກຳລັງຕິດຕັ້ງການຜະລິດໄຟຟ້າພະລັງງານແສງຕາເວັນໄດ້ເພີ່ມຂຶ້ນປະມານ 90.000 ກິໂລວັດຕໍ່ມື້. ຈີນແລະອາເມຣິກາເຄີຍໄດ້ຮ່ວມມືກັນແລະສຸມຄວາມພະຍາຍາມໃນການຊຸກຍູ້ສັນຍາປາຣີໃຫ້ປາກົດຜົນເປັນຈິງ, ແຕ່ເນື່ອງຈາກອາເມຣິກາໄດ້ປະຖິ້ມສັນຍາດັ່ງກ່າວ, ຈິ່ງໄດ້ສ້າງຜົນກະທົບໃຫ້ແກ່ການປົວແປງດິນຟ້າອາກາດທົ່ວໂລກແລະການຈັດຕັ້ງປະຕິບັດສັນຍາດັ່ງກ່າວຢ່າງຮອບດ້ານແລະມີປະສິດທິຜົນ. ກ່ຽວກັບການທີ່ອາເມຣິກາກັບຄືນສູ່ສັນຍາປາຣີ, ຈີນມີທ່າທີສ້າງສັນຮ່ວມກັນກັບປະຊາຄົມໂລກສະແດງຄວາມຊົມເຊີຍຕໍ່ກັບເລື່ອງນີ້. ພວກຂ້າພະເຈົ້າຫວັງວ່າ ອາເມຣິກາຈະແບກຫາບຄວາມຮັບຜິດຊອບຂອງຕົນຢ່າງແທ້ຈິງ,ວາງນະໂຍບາຍແລະມາດຕະການຕົວຈິງໃນການຫຼຸດການປ່ອຍກາກບອນດີອົກຊິດໂດຍໄວທັງເອົາໃຈໃສ່ຈັດຕັ້ງປະຕິບັດ, ແລະໃຫ້ເງິນຕາມຄຳໝັ້ນສັນຍາຂອງຕົນ, ຢ່າສູ່ເຮັດແບບປ່ຽນໄປປ່ຽນມາອີກຕໍ່ໄປເລີຍ.