ລັດຖະບານລາວມອບ “ຫຼຽນໄຊພັດທະນາຊັ້ນໜຶ່ງ” ໃຫ້ກຸ່ມລັດວິສາຫະກິດທາງລົດໄຟແຫ່ງຊາດຈີນ ແລະ ມອບ “ຫຼຽນໄຊແຮງງານຊັ້ນໜຶ່ງ” ໃຫ້ແກ່ບໍລິສັດທາງລົດໄຟລາວ-ຈີນ ເພື່ອຍ້ອງຍໍການປະສ່ວນອັນພົ້ນເດັ່ນເຂົ້າໃນການກໍ່ສ້າງທາງລົດໄຟລາວ-ຈີນ
ວັນທີ 1 ທັນວາປີ 2021, ລັດຖະບານລາວໄດ້ຈັດພິທີມອບຫຼຽນໄຊຢ່າງຄຶກຄື້ນຢູ່ຫໍປະຊຸມແຫ່ງຊາດລາວ, ທ່ານສອນໄຊ ສີພັນດອນ ກຳມະການກົມການເມືອງສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີລາວ ທັງເປັນຫົວໜ້າຄະນະຮັບຜິດຊອບໂຄງການທາງລົດໄຟລາວ-ຈີນ, ໄດ້ຕາງໜ້າລັດຖະບານລາວ, ມອບຫຼຽນໄຊພັດທະນາຊັ້ນໜຶ່ງໃຫ້ແກ່ກຸ່ມລັດວິສາຫະກິດທາງລົດໄຟແຫ່ງຊາດຈີນ, ແລະ ມອບ “ຫຼຽນໄຊແຮງງານຊັ້ນໜຶ່ງ” ໃຫ້ແກ່ບໍລິສັດທາງລົດໄຟລາວ-ຈີນ. ໂດຍຜ່ານການອະນຸມັດຈາກຄະນະກຳມະການສູນກາງພັກກອມມູນິດຈີນ, ທ່ານຈູໂກຈ່ຽງ, ຄະນະບໍລິຫານງານບໍລິສັດທາງລົດໄຟສາກົນຈີນ, ປະທານຄະນະບໍລິຫານງານບໍລິສັດທາງລົດໄຟລາວ-ຈີນໄດ້ຕາງໜ້າກຸ່ມລັດວິສາສາຫະກິດທາງລົດໄຟແຫ່ງຊາດຈີນ ແລະ ບໍລິສັດທາງລົດໄຟລາວ-ຈີນເຂົ້າຮ່ວມພິທີ ແລະ ຮັບຫຼຽນໄຊ. ທ່ານຈ່ຽງຈ້າຍຕຸ່ງ ເອກອັກຄະລັດຖະທູດສປຈີນປະຈຳສປປລາວໄດ້ເຂົ້າຮ່ວມພິທີດັ່ງກ່າວ.
ໃນພິທີມອບຫຼຽນໄຊ, ລັດຖະບານລາວໄດ້ສະແດງຄວາມຂອບໃຈຢ່າງສຸດໃຈຕໍ່ຄະນະກຳມະການສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນນຳ, ທັງໄດ້ສະແດງຄວາມຂອບໃຈຕໍ່ລັດຖະບານຈີນທີ່ໄດ້ໃຫ້ການສະໜັບສະໜູນ ແລະການຊ່ວຍເຫຼືອຢ່າງແຂງແຮງໃຫ້ກັບປະເທດລາວໃນການພັດທະນາເສດຖະກິດສັງຄົມ, ຊຸກຍູ້ປະເທດລາວໃຫ້ບັນລຸເປົ້າໝາຍການປ່ຽນແປງຄັ້ງປະຫວັດສາດທີ່ຫັນຈາກ “ປະເທດທີ່ບໍ່ມີທາງອອກສູ່ທະເລ”ມາເປັນ “ປະເທດເຊື່ອມໂຍງເຊື່ອມຈອດ”. ທັງໄດ້ຕີລາຄາສູງຕໍ່ກຸ່ມລັດວິສາຫະກິດທາງລົດໄຟແຫ່ງຊາດຈີນ ແລະ ບໍລິສັດທາງລົດໄຟລາວ-ຈີນທີ່ໄດ້ປະກອບສ່ວນອັນພົ້ນເດັ່ນເຂົ້າໃນການກໍ່ສ້າງທາງລົດໄຟລາວ-ຈີນທີ່ເປັນໂຄງການສັນຍາລັກແຫ່ງມິດຕະພາບລາວ-ຈີນໃນຂອບ “ໜຶ່ງແລວໜຶ່ງເສັ້ນທາງ”.
ທາງລົດໄຟລາວ-ຈີນມີລວງຍາວທັງໝົດ 1035 ກິໂລແມັດ, ເຊື່ອມຕໍ່ນະຄອນຄຸນໝິງປະເທດຈີນ ແລະ ນະຄອນຫຼວງວຽງຈັນປະເທດລາວ, ໃນຕະຫຼອດເສັ້ນທາງລົດໄຟໄດ້ນຳໃຊ້ມາດຕະຖານເຕັກນິກປະເທດຈີນ. ນັບແຕ່ເລີ່ມການກໍ່ສ້າງເມື່ອວັນທີ 25 ທັນວາປີ 2016 ເປັນຕົ້ນມາ, ຜູ້ນຳສູງສຸດຂອງສອງພັກ ແລະ ສອງລັດຖະບານໄດ້ວາງແຜນ ຈັດຕັ້ງປະຕິບັດ ແລະ ຊຸກຍູ້ດ້ວຍຕົນເອງ, ລັດຖະບານ ແລະ ປະຊາຊົນສອງປະເທດໄດ້ໃຫ້ການສະໜັບສະໜູນຢ່າງແຂງແຮງ, ຜູ້ເຮັດວຽກກໍ່ສ້າງທາງລົດໄຟສອງປະເທດລາວ-ຈີນໄດ້ຕັ້ງໜ້າຈັດຕັ້ງປະຕິບັດທັດສະນະທີ່ ປຶກສາຫາລືຮ່ວມກັນ, ສ້າງສາ ແລະ ຊົມໃຊ້ຮ່ວມກັນ, ຍຶດໝັ້ນໃນເປົ້າໝາຍທີ່ມີມາດຕະຖານສູງ ພັດທະນາແບບຍືນຍົງ ແລະ ສ້າງຜົນປະໂຫຍດໃຫ້ກັບປະຊາຊົນ, ເຂົາເຈົ້າໄດ້ບຸກບືນສູ້ຊົນທັງເວັນທັງຄືນ ແລະ ຮ່ວມແຮງຮ່ວມໃຈກັນຜ່ານຜ່າຄວາມຫຍຸ້ງຍາກ, ໄດ້ຜ່ານຜ່າສິ່ງທ້າທາຍຈາກສະພາບທໍລະນີສາດທີ່ສັບສົນ ແລະ ການແຜ່ລະບາດຂອງພະຍາດໂຄວິດ-19, ໄດ້ເຮັດສຳເລັດໜ້າທີ່ກໍ່ສ້າງຢ່າງສຳເລັດຜົນ ແລະ ໄດ້ຜ່ານການກວດຮັບຢ່າງສະດວກ. ການສ້າງທາງລົດໄຟລາວ-ຈີນຢ່າງສຳເລັດຜົນ ແລະ ການເປີດນຳໃຊ້ເສັ້ນທາງລົດໄຟລາວ-ຈີນ, ຈະປ່ຽນແປງສະພາບການຄົມມະນາຄົມ ແລະ ການຂົນສົ່ງຂອງປະເທດລາວຢ່າງເລິກເຊິ່ງ, ຈະອຳນວຍຄວາມສະດວກໃຫ້ແກ່ການເດີນທາງໄປມາຫາສູ່ກັນຂອງປະຊາຊົນ, ຊຸກຍູ້ການພັດທະນາເສດຖະກິດສັງຄົມຢູ່ບໍລິເວນລຽບຕາມເສັ້ນທາງລົດໄຟ, ມີຄວາມໝາຍສຳຄັນຫຼາຍຕໍ່ການຮັດແໜ້ນການແລກປ່ຽນ ແລະ ການຮ່ວມມືດ້ານເສດຖະກິດສັງຄົມ ແລະ ວັດທະນະທຳລະຫວ່າງສອງປະເທດລາວ-ຈີນ, ເປັນການເລັ່ງລັດການສ້າງ ແລວເສດຖະກິດລາວ-ຈີນ, ແລະ ສ້າງຄູ່ຮ່ວມຊາຕາກຳລາວ-ຈີນ.
“ຫຼຽນໄຊພັດທະນາຊັ້ນໜຶ່ງ” ແມ່ນຫຼຽນສູງສຸດທີ່ລັດຖະບານລາວມອບໃຫ້ອົງການຈັດຕັ້ງທັງພາຍໃນ ແລະ ຕ່າງປະເທດທີ່ໄດ້ປະກອບສ່ວນອັນພົ້ນເດັ່ນເຂົ້າໃນການພັດທະນາຊາດລາວ. “ຫຼຽນໄຊແຮງງານຊັ້ນໜຶ່ງ” ແມ່ນຫຼຽນສູງສຸດທີ່ລັດຖະບານລາວມອບໃຫ້ຜູ້ອອກແຮງງານທີ່ໄດ້ປະກອບສ່ວນອັນຕັ້ງໜ້າເຂົ້າໃນການພັດທະນາປະເທດລາວ.