ກອງປະຊຸມວຽກງານເສດຖະກິດລັດຖະບານຈີນຈັດຂຶ້ນຢູ່ນະຄອນຫຼວງປັກກິ່ງ
ແຕ່ວັນທີ 8 ຫາວັນທີ 10 ທັນວານີ້, ກອງປະຊຸມວຽກງານເສດຖະກິດຂອງລັດຖະບານຈີນໄດ້ຈັດຂຶ້ນຢູ່ນະຄອນຫຼວງປັກກິ່ງ. ທ່ານສີຈິ້ນຜິງ ປະທານປະເທດຈີນໄດ້ປະກອບຄຳເຫັນທີ່ສຳຄັນໃນກອງປະຊຸມ, ໂດຍສະຫຼຸບວຽກງານເສດຖະກິດໃນປີ 2021, ວິເຄາະສະພາບການເສດຖະກິດໃນປະຈຸບັນ ແລະ ວາງແຜນປະຕິບັດງານດ້ານເສດຖະກິດໃນປີ 2022.
ກອງປະຊຸມເຫັນວ່າ, ປີນີ້ແມ່ນປີໜຶ່ງທີ່ມີຄວາມໝາຍສຳຄັນເປັນຂີດໝາຍ ໃນປະຫວັດສາດຂອງພັກກອມມູນິດຈີນ ແລະ ປະເທດຈີນ. ຈີນໄດ້ຮັບມືກັບການປ່ຽນແປງອັນໃຫຍ່ຫຼວງຮອບຮ້ອຍປີ ແລະ ການແຜ່ລະບາດຂອງພະຍາດໂຄວິດ-19ທີ່ຮ້າຍແຮງດ້ວຍຄວາມທຸ່ນທ່ຽງ, ໄດ້ມີບາດກ້າວໃໝ່ໃນການສ້າງສະພາບການພັດທະນາອັນໃໝ່, ການພັດທະນາດ້ວຍຄຸນນະພາບສູງໄດ້ຮັບປະສິດທິຜົນອັນໃໝ່, ໄດ້ມີການເລີ່ມຕົ້ນທີ່ດີໃນການຈັດຕັ້ງປະຕິບັດ “ແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14”. ການພັດທະນາເສດຖະກິດ ແລະການປ້ອງກັນຄວບຄຸມພະຍາດໂຄວິດ-19 ຂອງຈີນໄດ້ຢູ່ໃນລະດັບນຳໜ້າຂອງໂລກ, ກຳລັງດ້ານວິທະຍາສາດເຕັກນິກລະດັບຍຸດທະສາດແຫ່ງຊາດໄດ້ພັດທະນາເຂັ້ມແຂງໄວຂຶ້ນ, ຄວາມເຂັ້ມແຂງຂອງຕ່ອງໂສ້ອຸດສາຫະກຳໄດ້ຍົກສູງຂຶ້ນ, ການປະຕິຮູບ ແລະ ການເປີດປະຕູສູ່ພາຍນອກໄດ້ກ້າວເຂົ້າສູ່ລວງເລິກ, ການຮັບປະກັນຊີວິດການເປັນຢູ່ຂອງປະຊາຊົນມີຄວາມເຂັ້ມແຂງ ແລະມີປະສິດທິຜົນ, ການສ້າງຄວາມສິວິໄລທາງລະບົບນິເວດໄດ້ພັດທະນາກ້າວໄປໜ້າຢ່າງຕໍ່ເນື່ອງ.
ກອງປະຊຸມຊີ້ໃຫ້ເຫັນວ່າ, ໃນຂະນະດຽວກັນທີ່ຢືນຢັນຜົນງານທີ່ໄດ້ຮັບຢ່າງເຕັມສ່ວນນັ້ນ, ຕ້ອງໄດ້ສັງເກດເຫັນວ່າ ການພັດທະນາເສດຖະກິດຂອງຈີນພວມປະເຊີນກັບຄວາມກົດດັນ 3 ຢ່າງ, ຄື: ຄວາມຕ້ອງການຫຼຸດໜ້ອຍລົງ, ຜົນກະທົບຈາກການສະໜອງ, ແລະ ຄວາມຄາດໝາຍອ່ອນແອລົງ. ພາຍໃຕ້ຜົນກະທົບຈາກການແຜ່ລະບາດຂອງພະຍາດໂຄວິດ-19, ການປ່ຽນແປງຮອບຮ້ອຍປີໄດ້ເລັ່ງລັດຂະບວນການຜັນແປ, ສະພາບແວດລ້ອມພາຍນອກມີຄວາມສັບສົນ ຂ້ຽວຂາດ ແລະ ມີຄວາມບໍ່ແນ່ນອນຫຼາຍກວ່າເກົ່າ. ພວກເຮົາຕ້ອງມີທ່າທີອັນຖືກຕ້ອງຕໍ່ກັບຄວາມຫຍຸ້ງຍາກ, ທັງມີຄວາມໝັ້ນໃຈຢ່າງໜັກແໜ້ນ. ພື້ນຖານເສດຖະກິດຂອງປະເທດຈີນມີຄວາມເຂັ້ມແຂງ, ແລະຈະພັດທະນາໄປໃນທິດທາງທີ່ດີເປັນໄລຍະຍາວເຊິ່ງຈະບໍ່ມີການປ່ຽນແປງແຕ່ຢ່າງໃດ. ບໍ່ວ່າສະຖານະການສາກົນຈະປ່ຽນແປງແນວໃດກໍຕາມ, ພວກເຮົາກໍຕ້ອງປະຕິບັດວຽກງານຂອງຕົນໃຫ້ດີຢ່າງເດັດດ່ຽວໜຽວແໜ້ນ, ສ້າງພື້ນຖານເສດຖະກິດໃຫ້ເຂັ້ມແຂງຂຶ້ນຢ່າງບໍ່ຢຸດຢັ້ງ, ເພີ່ມຄວາມສາມາດໃນການປະດິດສ້າງໃໝ່ດ້ານວິທະຍາສາດ, ຍຶດໝັ້ນລັດທິຫຼາຍຝ່າຍ, ເປັນເຈົ້າການນຳໃຊ້ລະບຽບການເສດຖະກິດການຄ້າສາກົນທີ່ມີມາດຕະຖານສູງ, ຊຸກຍູ້ການປະຕິຮູບໃຫ້ກ້າວສູ່ລວງເລິກ ດ້ວຍການເປີດປະຕູສູ່ພາຍນອກໃນລະດັບສູງ ເພື່ອຊຸກຍູ້ການພັດທະນາຢ່າງມີຄຸນນະພາບສູງ.
ກອງປະຊຸມຍັງຮຽກຮ້ອງວ່າ, ວຽກງານເສດຖະກິດປີໜ້າຂອງຈີນຕ້ອງເນັ້ນຄວາມໜັກແໜ້ນ ແລະ ພັດທະນາກ້າວໜ້າ, ເຂດແຄວ້ນຕ່າງໆ ແລະ ພາກສ່ວນຕ່າງໆຕ້ອງແບກຫາບຄວາມຮັບຜິດຊອບທີ່ຮັກສາຄວາມໝັ້ນທ່ຽງຂອງເສດຖະກິດມະຫາພາກ, ພາກສ່ວນຕ່າງໆຕ້ອງຕັ້ງໜ້າອອກນະໂຍບາຍທີ່ມີຜົນດີຕໍ່ການພັດະທນາເສດຖະກິດຢ່າງໜັກແໜ້ນ.
ໜຶ່ງ, ນະໂຍບາຍມະຫາພາກຕ້ອງມີຄວາມໝັ້ນທ່ຽງ ແລະ ມີປະສິດທິຜົນ, ຕ້ອງສືບຕໍ່ປະຕິບັດນະໂຍບາຍການເງິນທີ່ຕັ້ງໜ້າ ແລະ ນະໂຍບາຍເງິນຕາທີ່ໝັ້ນທ່ຽງ. ສອງ, ນະໂຍບານຈຸນລະພາກຕ້ອງກະຕຸກຊຸກຍູ້ພະລັງຊີວິດຂອງຫົວໜ່ວຍທຸລະກິດທາງຕະຫຼາດຢ່າງຕໍ່ເນື່ອງ. ສາມ, ນະໂຍບາຍດ້ານໂຄງປະກອບຕ້ອງສຸມໃສ່ຊຸກຍູ້ການພັດທະນາໝູນວຽນຂອງເສດຖະກິດແຫ່ງຊາດໃຫ້ລຸລ່ວງ. ສີ່, ນະໂຍບາຍດ້ານວິທະຍາສາດເຕັກນິກຕ້ອງໃຫ້ຈັດຕັ້ງປະຕິບັດຢ່າງໜັກແໜ້ນ. ຫ້າ, ນະໂຍບາຍດ້ານການປະຕິຮູບ ແລະ ເປີດປະຕູສູ່ພາຍນອກຕ້ອງກະຕຸກຊຸກຍູ້ພະລັງຊຸກດັນຂອງການພັດທະນາ. ຫົກ, ນະໂຍບາຍດ້ານການພັດທະນາເຂດຕ່າງໆຕ້ອງເພີ່ມທະວີຄວາມດຸນດ່ຽງ ແລະ ລັກສະນະປະສານສົມທົບກັນໃນການພັດທະນາ. ເຈັດ, ນະໂຍບາຍດ້ານສັງຄົມຕ້ອງຮັບປະກັນເສັ້ນພື້ນຖານດ້ານຊີວິດການເປັນຢູ່ຂອງປະຊາຊົນຢ່າງໜັກແໜ້ນ.