ປັດຈຸບັນ, ມີ 112 ປະເທດ ແລະເຂດແຄວ້ນສະມາຊິກອົງການການຄ້າໂລກໄດ້ອອກຖະແຫລງການຮ່ວມກ່ຽວກັບການເຈລະຈາທີ່ເຮັດໃຫ້ການລົງທຶນມີຄວາມສະດວກ, ໂດຍໄດ້ປະກາດວ່າຈະພະຍາຍາມຊຸກຍູ້ໃຫ້ສົນທິສັນຍາຫລາຍຝ່າຍວ່າດ້ວຍການເຮັດໃຫ້ການລົງທຶນມີຄວາມສະດວກບັນລຸຜົນເປັນຈິງກ່ອນທ້າຍປີ 2022.
ສຳລັບເລື່ອງນີ້, ທ່ານຫວ່າງເວີນປິ່ນ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຂ່າວປະຈຳທີ່ຈັດຂຶ້ນໃນວັນທີ 13 ທັນວານີ້ວ່າ: ວັນທີ 10 ທັນວານີ້, ມີ 112 ປະເທດ ແລະເຂດແຄວ້ນສະມາຊິກອົງການການຄ້າໂລກ ເຊັ່ນ: ຈີນ, ສະຫະພາບເອີຣົບ, ຣັດເຊຍ, ຍີ່ປຸ່ນ, ຈີເລ, ບຼາຊີນ, ນີເຊລີ ແລະປະເທດອື່ນໆ ໄດ້ຮ່ວມກັນລົງນາມໃນ “ຖະແຫລງການຮ່ວມວ່າດ້ວຍການເຮັດໃຫ້ການລົງທຶນມີຄວາມສະດວກ”. ປັດຈຸບັນ, ຝ່າຍທີ່ມີສ່ວນຮ່ວມໄດ້ບັນລຸຄວາມຮັບຮູ້ທີ່ເປັນເອກະພາບກັນໃນເບື້ອງຕົ້ນກ່ຽວກັບຂອບສົນທິສັນຍາ ແລະກະຕິກາຕົ້ນຕໍ. ຝ່າຍຕ່າງໆຈະຖືເອົາເອກະສານເຈລະຈາທີ່ມີຢູ່ໃນປັດຈຸບັນເປັນພື້ນຖານເພື່ອຊຸກຍູ້ການເຈລະຈາ, ຕາມເປົ້າໝາຍແມ່ນຈະໃຫ້ການເຈລະຈາກ່ຽວກັບເນື້ອໃນຂອງສົນທິສັນຍາສຳເລັດກ່ອນທ້າຍປີ 2022, ຊຸກຍູ້ໃຫ້ສົນທິສັນຍາຫລາຍຝ່າຍວ່າດ້ວຍການເຮັດໃຫ້ການລົງທຶນມີຄວາມສະດວກບັນລຸຜົນເປັນຈິງ.
ທ່ານຫວ່າງເວີນປິ່ນກ່າວເນັ້ນວ່າ: ຈີນຈະສຸມໃສ່ການເປີດປະຕູສູ່ພາຍນອກທີ່ມີຄຸນນະພາບສູງໃຫ້ກວ້າງກວ່າກົ່າຢ່າງສະເໝີຕົ້ນສະເໝີປາຍ, ຈັດຕັ້ງປະຕິບັດມາດຕະຖານທີ່ໃຫ້ວິສາຫະກິດການລົງທຶນຂອງຕ່າງປະເທດຊົມໃຊ້ນະໂຍບາຍເທົ່າທຽມກັບພົນລະເມືອງຈີນ, ສະໜອງສະພາບແວດລ້ອມດ້ານການດຳເນີນທຸລະກິດທີ່ເປີດປະຕູ, ໂປ່ງໃສ ແລະບໍ່ມີການຈຳແນກໃຫ້ແກ່ການລົງທຶນ ແລະການພັດທະນາຂອງວິສາຫະກິດບັນດາປະເທດ.