ກອງປະຊຸມລັດຖະມົນຕີການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ7ຈັດຂຶ້ນຢູ່ມຽນມາ

2022-07-05 18:04:21
ມາຈາກ:CRI

ກອງປະຊຸມລັດຖະມົນຕີການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ7ໄດ້ຈັດຂຶ້ນຢູ່ນະຄອນບາການຂອງມຽນມາໃນວັນທີ4ກໍລະກົດນີ້. ທ່ານວາງຢີ້ ທີ່ປຶກສາແຫ່ງລັດ,ທັງເປັນລັດຖະມົນຕີກະຊວງການຕ່າງປະເທດຈີນ ແລະ ທ່ານ ອູນນາ ມອງລວີນ ລັດຖະມົນຕີກະຊວງການຕ່າງປະເທດມຽນມາຮ່ວມກັນເປັນປະທານກອງປະຊຸມ, ມີທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງການຕ່າງປະເທດລາວ, ທ່ານ ປຣາກ ໂຊຄອນ ຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງການຕ່າງປະເທດກຳປູເຈຍ, ທ່ານ ດອນ ປຣະມັດວິໄນ ຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງການຕ່າງປະເທດໄທ ແລະທ່ານບຸຍແທັງເຊິນ ລັດຖະມົນຕີກະຊວງການຕ່າງປະເທດຫວຽດນາມເຂົ້າຮ່ວມກອງປະຊຸມ.

ທ່ານວາງຢີ້ກ່າວວ່າ: ນັບແຕ່ເລີ່ມດຳເນີນຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງເປັນຕົ້ນມາ,ໄດ້ສ້າງຜົນປະໂຫຍດຕົວຈິງໃຫ້ແກ່ປະຊາຊົນ6ປະເທດ. ໃນຂະນະທີ່ທົ່ວໂລກພວມເຂົ້າສູ່ໄລຍະທີ່ມີການປັ່ນປ່ວນແລະປ່ຽນແປງໃໝ່, ຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄວນຍົກລະດັບໃຫ້ສູງຂຶ້ນ,ສະແຫວງຫາການຮ່ວມມືຢ່າງສະເໝີຕົ້ນສະເໝີປາຍ,ຮ່ວມຈິດຮ່ວມໃຈຊຸກຍູ້ການພັດທະນາ, ຮ່ວມກັນພະຍາຍາມສ້າງເຂດແບບຢ່າງທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ແລະເຂດປະຕິບັດຂໍ້ລິເລີ່ມການພັດທະນາກ່ອນໝູ່ຢູ່ໃນທົ່ວໂລກຢ່າງມີຄຸນນະພາບສູງ, ສ້າງປະຊາຄົມຮ່ວມຊາຕາກຳປະເທດລຽບຕາມແມ່ນ້ຳລ້ານຊ້າງ-ແມ່ນ້ຳຂອງທີ່ສະໜິດແໜ້ນກວ່າເກົ່າ.

ທ່ານວາງຢີ້ປະກາດວ່າ: ຈີນຈະປະຕິບັດມາດຕະການໃຫ້ຄວາມສະດວກ6ຂໍ້ໃຫ້ແກ່ການຮ່ວມມືຕາມລ້ອງແມ່ນ້ຳລ້ານຊ້າງແມ່ນ້ຳຂອງ,ຄື: ແຜນການເຄື່ອນໄຫວຮ້ອຍ-ພັນ-ໝື່ນກ່ຽວກັບການຮ່ວມມືດ້ານກະສິກຳ(ດຳເນີນໜຶ່ງຮ້ອຍໂຄງການເຜີຍແຜ່ເຕັກນິກກະສິກຳ,ອົບຮົມໜຶ່ງພັນຄົນທີ່ເປັນຜູ້ນຳໜ້າການສ້າງຄວາມຮັ່ງມີດ້ານກະສິກຳ,ສ້າງນາດີໜຶ່ງໝື່ນເຮັກຕາ),ແຜນການຊົນລະປະທານເພື່ອສ້າງຜົນປະໂຫຍດໃຫ້ປະຊາຊົນ,ແຜນການຮ່ວມມືດ້ານເສດຖະກິດດີຈິຕອນ, ແຜນການຮ່ວມມືດ້ານອະວະກາດ,ແຜນການສ້າງບຸຄະລາກອນຜູ້ມີຄວາມຮູ້ຄວາມສາມາດ ແລະແຜນການຮ່ວມມືດ້ານສາທາລະນະສຸກ,ເພື່ອຊົມໃຊ້ແບ່ງປັນຜົນປະໂຫຍດດ້ານການຮ່ວມມືແລະເພີ່ມກຳລັງແຮງເຂົ້າໃນການພັດທະນາໃຫ້ກັບບັນດາປະເທດລຽບຕາມລ້ອງແມ່ນ້ຳຂອງ.

ລັດຖະມົນຕີການຕ່າງປະເທດບັນດາປະເທດທີ່ເຂົ້າຮ່ວມກອງປະຊຸມດັ່ງກ່າວ ໄດ້ປຶກສາຫາລືກັນໂດຍປິ່ນອ້ອມຫົວຂໍ້“6ປະເທດເພີ່ມທະວີຄວາມສາມັກຄີກັນເພື່ອຊຸກຍູ້ສັນຕິພາບແລະຄວາມຈະເລີນຮຸ່ງເຮືອງ”,ໂດຍມີຄວາມເຫັນເປັນເອກະພາບກັນວ່າ: ການຮ່ວມມືຕາມລ້ອງແມ່ນ້ຳລ້ານຊ້າງ-ແມ່ນ້ຳຂອງບໍ່ພຽງແຕ່ໄດ້ສ້າງຄວາມສຸກໃຫ້ປະຊາຊົນ6ປະເທດເທົ່ານັ້ນ,ຍັງໄດ້ຊຸກຍູ້ການພັດທະນາໂດຍສັນຕິແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້ອີກດ້ວຍ.


 

ກອງປະຊຸມລັດຖະມົນຕີການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ7ຈັດຂຶ້ນຢູ່ມຽນມາ