ວັນທີ 29 ມັງກອນນີ້, ຜູ້ຮັບຜິດຊອບທີ່ກ່ຽວຂ້ອງທາງຝ່າຍຈີນ ແລະ ຝ່າຍຕ່າງປະເທດຂອງໜ່ວຍງານຜູ້ຊ່ຽວຊານການແພດສຳລັບງານກິລາໂອລິມປິກລະດູໜາວປັກກິ່ງ ໄດ້ແຈ້ງຂ່າວກ່ຽວກັບສະພາບການປ້ອງກັນ ແລະ ຄວບຄຸມພະຍາດໂຄວິດ-19 ໃນໄລຍະມໍ່ໆມານີ້ ທັງໄດ້ຕອບຄຳຖາມຂອງນັກຂ່າວຈີນ ແລະ ຕ່າງປະເທດ.
ທ່ານ ໄບຣອັນ ແມັກຄລອສກີ ຫົວໜ້າຊ່ຽວຊານຂອງໜ່ວຍງານຜູ້ຊ່ຽວຊານການແພດສຳລັບງານກິລາໂອລິມປິກລະດູໜາວປັກກິ່ງ ແນະນຳໃຫ້ຮູ້ວ່າ: ໃນຫຼາຍເດືອນທີ່ຜ່ານມາ, ຕົນເອງໄດ້ຮ່ວມມືກັບເພື່ອນຮ່ວມງານຂອງປັກກິ່ງ ໂດຍໄດ້ອອກມາດຕະການປ້ອງກັນ ແລະ ຄວບຄຸມພະຍາດໂຄວິດ-19, ຫຼັງຈາກມາຮອດພາຍໃນວົງປິດຢູ່ປັກກິ່ງ ກໍໄດ້ເລີ່ມດຳເນີນງານໄລຍະໜຶ່ງໂລດ ແລະເຫັນວ່າ ມາດຕະການປ້ອງກັນ ແລະ ຄວບຄຸມພະຍາດໂຄວິດ-19 ສຳລັບງານກິລາໂອລິມປິກລະດູໜາວປັກກິ່ງ ແມ່ນມີປະສິດທິຜົນ ທັງໄວ້ວາງໃຈໄດ້.
ປັກກິ່ງໄດ້ດຳເນີນການຄຸ້ມຄອງຜູ້ຄົນທີ່ກ່ຽວຂ້ອງກັບງານກິລາໂອລິມປິກລະດູໜາວໃຫ້ຢູ່ພາຍໃນວົງປິດ ເຊິ່ງແຍກຈາກສັງຄົມທັງໝົດ. ທ່ານ ໄບຣອັນ ແມັກຄລອສກີ ໃຫ້ສຳພາດຕໍ່ນັກຂ່າວວ່າ: ມາດຕະການປ້ອງກັນ ແລະ ຄວບຄຸມພະຍາດໂຄວິດ-19 ທີ່ນຳໃຊ້ໃນໄລຍະຈັດງານນັ້ນ ໄດ້ຮັບການປະຕິບັດຢ່າງເຂັ້ມແຂງ ທັງມີປະສິດທິຜົນຫຼາຍ, ການທີ່ຝ່າຍຕ່າງໆທີ່ກ່ຽວຂ້ອງ ເຊັ່ນ ນັກກິລາເປັນຕົ້ນໄດ້ປະຕິບັດຕາມຄູ່ມືປ້ອງກັນພະຍາດຢ່າງເຂັ້ມງວດນັ້ນ ແມ່ນເລື່ອງທີ່ສຳຄັນທີ່ສຸດ.