ແຕ່ວັນທີ 2 ຫາວັນທີ 4 ມີນານີ້, ການແລ່ນຕໍ່ທວນໄຟງານກິລາໂອລິມປິກຄົນພິການລະດູໜາວປັກກິ່ງຈະຈັດຂຶ້ນຢູ່ 3 ເຂດແຂ່ງຂັນຄື：ນະຄອນຫຼວງປັກກິ່ງ, ເມືອງຢຽນຊິ້ງ ແລະນະຄອນຈ່າງເຈ່ຍໂຂ ໂດຍແບ່ງອອກເປັນ 3 ຂັ້ນຕອນ ຄື: ການເກັບໄຟ, ການເຕົ້າໂຮມໄຟ ແລະການແລ່ນ ຕໍ່ທວນໄຟ. ສິ່ງທີ່ເຮັດໃຫ້ຄົນທັງຫຼາຍສົນໃຈຫຼາຍທີ່ສຸດນັ້ນກໍຄື: ເປັນຫຍັງໄຟງານກິລາໂອລິມປິກຄົນພິການລະດູໜາວປັກກິ່ງ ຕ້ອງເຮັດພິທີເກັບໄຟຢູ່ 9 ບ່ອນ?
ທຳອິດໄຟງານກິລາໂອລິມປິກລະດູໜາວປັກກິ່ງ ແມ່ນເຮັດພິທີເກັບໄຟຢູ່ສະໜາມກິລາໂອລິມປິກບູຮານທີ່ປະເທດເກຼັກ ເຊິ່ງເປັນແຫຼ່ງກຳເນີດຂອງງານກິລາໂອລິມປິກ. ແຕ່ອີງຕາມຄວາມຮຽກຮ້ອງຂອງຄະນະກຳມະການໂອລິມປິກຄົນພິການສາກົນ ແລະແນວຄິດພື້ນຖານກ່ຽວກັບໄຟຂອງງານກິລາໂອລິມປິກຄົນພິການ, ບຸກຄົນ, ອົງການຈັດຕັ້ງ ແລະຕົວເມືອງໃດໆ ຕ່າງກໍສາມາດປະກອບສ່ວນເຂົ້າໃນການເຮັດພິທີເກັບໄຟງານກິລາໂອລິມປິກຄົນພິການ. ສະນັ້ນ, ໄຟງານກິລາໂອລິມປິກຄົນພິການຈຶ່ງເຮັດພິທີເກັບໄຟຢູ່ຕົວເມືອງ ແລະເຂດຊຸມຊົນຕ່າງໆ.
ນອກຈາກຢູ່ສະໂຕກ ແມນເດວີວ ທີ່ປະເທດອັງກິດ ທີ່ເປັນບ່ອນກຳເນີດງານກິລາໂອລິມປິກຄົນພິການແລ້ວ, ພິທີເກັບໄຟອີກ 8 ບ່ອນສຳລັບງານກິລາໂອລິມປິກຄົນພິການລະດູໜາວປັກກິ່ງ ແມ່ນຈະຈັດພິທີຢູ່ 3 ເຂດແຂ່ງຂັນຄື：ນະຄອນຫຼວງປັກກິ່ງ, ເມືອງຢຽນຊິ້ງ ແລະນະຄອນຈ່າງເຈ່ຍໂຂ ເຊິ່ງລວມທັງສະຖານທີ່ຊ່ວຍເຫຼືອຄົນພິການ ເຊັ່ນ: ໂຮງຮຽນ, ເຂດຊຸມຊົນ, ຫໍສະໝຸດ ເປັນຕົ້ນ, ສະຖານທີ່ວັດທະນະທຳປະຫວັດສາດ, ເຂດນິຄົມເຕັກນິກວິທະຍາສາດທັນສະໄໝ ແລະບ່ອນເຄີຍເຮັດພິທີເກັບໄຟງານກິລາໂອລິມປິກຄົນພິການປັກກິ່ງ 2008.
ຕາມຂ່າວລາຍງານວ່າ: ຕອນບ່າຍຂອງວັນທີ 2 ມີນານີ້, ໄຟທີ່ຖືກເກັບຢູ່ 9 ບ່ອນ ຈະນຳມາລວມກັນຢູ່ສວນສາທາລະນະທ່ຽນຖານ ແລ້ວກາຍເປັນໄຟງານກິລາໂອລິມປິກຄົນພິການລະດູໜາວປັກກິ່ງ.