ນັກກິລາຄົນພິການເພດຍິງຂອງຈີນສ້າງປະຫວັດສາດຍາດໄດ້ຫຼຽນຄຳ
ວັນທີ 6 ມີນານີ້, ນາງຈ່າງເມີ້ງຊິ່ວ, ນັກກິລາຄົນພິການຈີນໄດ້ເປັນແຊມໃນການແຂ່ງຂັນສະກີເທິງພູປະເພດ Super-G (ທ່າຢືນ)ໃນງານກິລາໂອລິມປິກຄົນພິການລະດູໜາວປັກກິ່ງ ທັງເປັນຫຼຽນຄຳຫຼຽນທຳອິດສຳລັບທີມຊາດຈີນໃນການແຂ່ງຂັນສະກີເທິງພູໃນງານກິລາໂອລິມປິກຄົນພິການລະດູໜາວ.
ນາງຈ່າງເມີ້ງຊິ່ວ ເກີດໃນປີ 2002 ແລະໄດ້ກາຍເປັນນັກກິລາສະກີເທິງພູທີ່ມີອາຍຸນ້ອຍພຽງ 14 ປີ. ຍ້ອນພິການສະໝອງຕອນຍັງນ້ອຍ, ເຮັດໃຫ້ປະຕິກິລິຍາຂອງນາງຈ່າງເມີ້ງຊິ່ວຊ້າກວ່າຄົນອື່ນ. ສະນັ້ນ, ການເໜັງຕິງທາງຮ່າງກາຍຂອງນາງຈຶ່ງບໍ່ຄ່ອງແຄ້ວ. ທ່າກິລາທີ່ຄົນອື່ນສາມາດຮຽນໃຫ້ເປັນໄດ້ພາຍໃນຊົ່ວໂມງໜຶ່ງນັ້ນ, ສຳລັບນາງຈ່າງເມີ້ງຊິ່ວຕ້ອງໃຊ້ເວລາ 2 ຫາ 3 ຊົ່ວໂມງຈຶ່ງຮຽນເປັນ.
ໃນປີ 2020, ນາງຈ່າງເມີ້ງຊິ່ວໄດ້ຮັບຫຼຽນຄຳໃນການແຂ່ງຂັນສະກີຄົນພິການເທິງພູຊີງຂັນໂລກທີ່ຈັດຂຶ້ນຢູ່ປະເທດສະວິສ ເຊິ່ງເປັນຫຼຽນຄຳທຳອິດຂອງຈີນໃນການແຂ່ງຂັນດັ່ງກ່າວ. ຫຼັງຈາກນັ້ນ, ນາງຈ່າງເມີ້ງຊິ່ວຍັງໄດ້ຮັບ 3 ຫຼຽນໃນການແຂ່ງຂັນຊີງຂັນໂລກ. ກ່ອນໄຂງານກິລາໂອລິມປິກຄົນພິການລະດູໜາວປັກກິ່ງ, ນາງຈ່າງເມີ້ງຊິ່ວໄດ້ຖືກເວັບໄຊຂອງຄະນະກຳມະການໂອລິມປິກຄົນພິການສາກົນຂະໜານນາມວ່າເປັນ “ນັກກິລາຄວາມຫວັງຂອງປະເທດເຈົ້າພາບໃນການຍາດເອົາຫຼຽນຄຳ”.