ກິດຈະກໍາ “ນັ່ງລົດໄຟໄປທ່ຽວໂລກ” ຈັດຂຶ້ນໃນປະເທດລາວ

ໃນວັນທີ 20 ມິຖຸນາທີ່ຜ່ານມາ, ບໍລິສັດ China Railway Rolling Stock Corporation (CRRC) ແລະ ບໍລິສັດທາງລົດໄຟ ລາວ – ຈີນ ໄດ້ເປີດສູນວາງສະແດງວັດທະນະທໍາລົດໄຟ ຢູ່ສະຖານີນະຄອນຫຼວງວຽງຈັນ ຂອງທາງລົດໄຟ ລາວ – ຈີນ.

ບໍລິສັດ CRRC ເປັນຜູ້ຜະລິດ EMU “ຂະບວນລ້ານຊ້າງ”, ສູນວາງສະແດງວັດທະນະທໍາລົດໄຟ ແມ່ນເປັນໜຶ່ງໃນງານຂອງກິດຈະກໍາ “ນັ່ງລົດໄຟໄປທ່ຽວທົ່ວໂລກ”, ຈະມີລົດໄຟລົດລາງຈໍາລອງທີ່ທັນສະໄໝຫຼາຍກວ່າ 20 ປະເພດ ທີ່ຜະລິດໂດຍປະເທດຈີນ, ເປັນການສະແດງແບບລວມສູນຄັ້ງທໍາອິດຢູ່ລາວ ແລະ ຈະວາງສະແດງເປັນເວລາ 30 ວັນ.

ໃນສະຖານທີ່ວາງສະແດງ, ລົດໄຟລົດລາງຈໍາລອງທີ່ຫຼາກຫຼາຍຮູບແບບ ເປັນສິ່ງດຶງດູດຜູ້ຄົນຈໍານວນຫຼວງຫຼາຍມາຊົມເບິ່ງ ແລະ ຖ່າຍຮູບເປັນທີ່ລະລຶກ. ທ້າວ ລາຊີ ນັກສຶກສາຂອງມະຫາວິທະຍາໄລແຫ່ງຊາດລາວ ປີທີ 4 ກ່າວວ່າ: ຮູ້ສຶກຕື່ນເຕັ້ນ ແລະ ປະທັບໃຈຫຼາຍ, ລົດໄຟລົດລາງຂອງຈີນທັນສະໄໝຫຼາຍ, ມີຫຼາກຫຼາຍປະເພດ ເຊິ່ງເປັນສິ່ງທີ່ເປີດຫູເປີດຕາ.

ວັນທີ 21, “ບົດຮຽນທໍາອິດຂອງລົດໄຟຄວາມໄວສູງ EMU” ເຊິ່ງເປັນການເຄື່ອນໄຫວໜຶ່ງໃນ ກິດຈະກໍາ “ນັ່ງລົດໄຟໄປທ່ຽວໂລກ” ໄດ້ເປີດຮຽນຢູ່ລົດໄຟຂະບວນລ້ານຊ້າງ. ນີ້ເປັນຄັ້ງທໍາອິດທີ່ປະເທດລາວໄດ້ເຜີຍແພ່ຄວາມຮູ້ກ່ຽວກັບການຈະລາຈອນລາງລົດຢູ່ໃນຂະບວນລົດໄຟ. “ທາງລົດໄຟລາວ-ຈີນເປີດການໍາໃຊ້ໃນມື້ໃດ?” “ລົດຄວບຄຸມແມ່ນຫຍັງ?” “5 ລະບົບຫຼັກຂອງລົດໃຊ້ພະລັງງານແມ່ນຫຍັງ?” ໃນຊ່ວງຖາມ-ຕອບແບບມີປະຕິສໍາພັນ, ນັກຮຽນ ແລະ ຜູ້ມັກຮັກລົດໄຟໄດ້ຍາດຊີງກັນຕອບຄໍາຖາມຢ່າງກະຕືລືລົ້ນ, ເຮັດໃຫ້ບັນຍາກາດໃນຕູ້ລົດຄຶກຄັກຂຶ້ນມາທັນທີ.

ນາງ ວົງດາລາ ແມ່ນນັກສຶກສາທີ່ຮຽນຢູ່ມະຫາວິທະຍາໄລແພດສາດ ຕ້າຫຼຽນ ຂອງປະເທດຈີນ. ໃນແຕ່ກ່ອນ ນາງໄດ້ຂີ່ຍົນໄປ ແລະ ກັບ ຈາກຈີນທຸກຄັ້ງ, ເທື່ອນີ້ນາງໄດ້ຕອບຮັບການເຊື້ອເຊີນຂອງບໍລິສັດທາງລົດໄຟລາວ-ຈີນ ແບບບໍ່ລັງເລໃຈ. ນາງກ່າວວ່າ: ການບໍລິການຂອງທາງລົດໄຟລາວ-ຈີນ ເຮັດໃຫ້ນາງມີຄວາມປະທັບໃຈຫຼາຍ, “ລົດໄຟຮອດສະຖານີຕົງເວລາ, ການບໍລິການຢູ່ໃນລົດທົ່ວເຖິງ ແລະ ສິ່ງອໍານວຍຄວາມສະດວກໃນລົດຄົບຖ້ວນ”.

ທ້າວຊະລຸນໄຊ ອາຍຸ 15​ ປີ ເລົ່າໃຫ້ນັກຂ່າວຟັງວ່າ, ແຕ່ກ່ອນລາວກັບຄອບຄົວ ເຄີຍນັ່ງລົດໂດຍສານໄປ-ກັບນະຄອນຫຼວງວຽງຈັນ ແລະ ຫຼວງພະບາງເລື່ອຍໆ, ການເດີນທາງໃຊ້ເວລາດົນນານ ແລະ ເມື່ອຍຫຼາຍ. “ນີ້ແມ່ນການຂຶ້ນລົດໄຟເທື່ອທໍາອິດຂອງຂ້ອຍ, ລົດໄຟແລ່ນໄວຫຼາຍ ແລະ ບ່ອນນັ່ງກໍສະບາຍ, ຫວັງວ່າມື້ໜ້າຈະມີໂອກາດນັ່ງລົດໄຟໄປຢ້ຽມຊົມປະເທດຈີນ.”
ແຫຼ່ງຂ່າວ: ສໍານັກຂ່າວຊິນຮວາ