ອຸດສາຫະກໍາຜະລິດໄຟຟ້າດ້ວຍແສງຕາເວັນແຂວງຢຸນນານ ມີມູນຄ່າເຖິງ 100 ຕື້ຢວນ
ພະແນກພະລັງງານແຂວງຢຸນນານແຈ້ງຂ່າວໃຫ້ຮູ້ວ່າ: ຫວ່າງມໍ່ໆມານີ້, ແຂວງຢຸນນານໄດ້ຕິດຕັ້ງອຸປະກອນຜະລິດໄຟຟ້າດ້ວຍແສງຕາເວັນ 100.000 ກິໂລວັດ. ນັບແຕ່ຕົ້ນປີມານີ້, ແຂວງຢຸນນານໄດ້ຕິດຕັ້ງອຸປະກອນຜະລິດໄຟຟ້າດ້ວຍແສງຕາເວັນທັງໝົດ 4.815.000 ກິໂລວັດ, ຍອດຈຳນວນຕິດຕັ້ງອຸປະກອນຜະລິດໄຟຟ້າດ້ວຍແສງຕາເວັນຂອງທົ່ວແຂວງໄດ້ບັນລຸເຖິງ 10.065.000 ກິໂລວັດ ແລະ ໄດ້ລື່ນກາຍ 10 ລ້ານກິໂລວັດເປັນຄັ້ງທຳອິດ.
ໃນຫຼາຍປີມໍ່ໆມານີ້, ບົນພື້ນຖານອຸດສາຫະກຳ ແລະ ທ່າແຮງດ້ານຊັບພະຍາກອນ, ແຂວງຢຸນນານໄດ້ສຸມໃສ່ພັດທະນາອຸດສາຫະກຳຜະລິດໄຟຟ້າດ້ວຍແສງຕາເວັນ ໂດຍຖືເອົານະຄອນຊີຈິ້ນ (Qujing)ເປັນເຂດໃຈກາງ ແລະ ຊຸກຍູ້ການພັດທະນາຂອງເຂດພັດທະນາຈຸດໜັກ 4 ແຫ່ງ ຄື: ນະຄອນປາວຊານ, ນະຄອນຊູຊົງ, ນະຄອນລີ້ຈ່ຽງ ແລະ ນະຄອນຈາວທົງ ຊຶ່ງໄດ້ກໍ່ຕົວຂຶ້ນເປັນສະພາບການພັດທະນາທົ່ວຕ່ອງໂສ້ອຸດສາຫະກຳ. ປີ 2022, ມູນຄ່າອຸດສາຫະກຳໃນຕ່ອງໂສ້ອຸດສາຫະກຳຜະລິດໄຟຟ້າດ້ວຍແສງຕາເວັນຂອງແຂວງຢຸນນານໄດ້ບັນລຸເຖິງ 107,3 ຕື້ຢວນ,ໄດ້ກາຍເປັນອຸດສາຫະກຳທີ່ມີມູນຄ່າລະດັບ 100 ຕື້ຢວນ.
ເດືອນກັນຍາປີ 2017, ບໍລິສັດພະລັງງານແສງຕາເວັນຈິນໂຈ່ວຈຳກັດ ທີ່ເປັນບໍລິສັດຫົວຈັກຫຼັກແຫຼ່ງໃນຂະແໜງການຜະລິດໄຟຟ້າດ້ວຍແສງຕາເວັນໄດ້ເຊັນສັນຍາກັບນະຄອນຊີຈິ້ນ ໂດຍໄດ້ສ້າງຕັ້ງບໍລິສັດພະລັງງານໃໝ່ແສງຕາເວັນຊີຈິ້ນຈຳກັດ, ລົງທຶນສ້າງໂຄງການທ່ອນຊີລີໂຄນ 1 GW ແລະ ໂຄງການແຜ່ນຊີລີໂຄນ 1 GW ທີ່ຕ້ອງການໃນອຸດສາຫະກຳຜະລິດໄຟຟ້າດ້ວຍແສງຕາເວັນ. ທ່ານ Huo Xuewei ຫົວໜ້າຝ່າຍບໍລິຫານຂອງບໍລິສັດພະລັງງານໃໝ່ແສງຕາເວັນຊີຈິ້ນ ເວົ້າວ່າ: “ພວກເຮົາເລືອກມາລົງທຶນຢູ່ແຂວງຢຸນນານ, ສາເຫດຕົ້ນຕໍແມ່ນຍ້ອນວ່າ, ແຂວງຢຸນນານມີຊັບພະຍາກອນໄຟຟ້ານ້ຳຕົກທີ່ອຸດົມສົມບູນ. ໃນຂະນະດຽວກັນ, ແຂວງຢຸນນານກໍໄດ້ປັບປຸງຕ່ອງໂສ້ອຸດສາຫະກຳການຜະລິດໄຟຟ້າດ້ວຍແສງຕາເວັນໃຫ້ດີຂຶ້ນຢ່າງບໍ່ຢຸດຢັ້ງ, ຫຼາຍວິສາຫະກິດຍ່ານເໜືອຕັ້ງຫຼັກປັກຖານຢູ່ນະຄອນຊີຈິ້ນ ຊຶ່ງໄດ້ປະຢັດຕົ້ນທຶນໃຫ້ແກ່ພວກເຮົາຫຼາຍສົມຄວນ.”
ໃນຂະນະດຽວກັນ, ແຂວງຢຸນນານກໍໄດ້ເພີ່ມທະວີການຮ່ວມມືໃນດ້ານອຸດສາຫະກຳການຜະລິດໄຟຟ້າດ້ວຍແສງຕາເວັນຢ່າງບໍ່ຢຸດຢັ້ງ. ເດືອນມີນາປີນີ້, ບໍລິສັດພະລັງງານໃໝ່ຕ້ຽນໂຖຈົ່ງເໜິງ (ປັກກິ່ງ) ຈຳກັດກ່າວວ່າ, ຈະຮ່ວມກັບອົງການຈັດຕັ້ງທີ່ກ່ຽວຂ້ອງ ເພື່ອຮ່ວມກັນສ້າງໂຄງການຮ່ວມມືອຸດສາຫະກຳ “ເມືອງວິທະຍາສາດຢຸນນານ” ແລະ “ເຂດສວນອຸດສາຫະກຳພະລັງງານໃໝ່ຂອງລາວ” ເພື່ອສ້າງລະບົບນິເວດອຸດສາຫະກຳທີ່ມີການພັດທະນາແບບຍືນຍົງ.
ຕາມຂ່າວແຈ້ງໃຫ້ຮູ້ວ່າ: “ເມືອງວິທະຍາສາດຢຸນນານ” ຕັ້ງຢູ່ນະຄອນຄຸນໝິງ, ຈະອີງໃສ່ທ່າແຮງນຳໜ້າໃນຫຼາຍອຸດສາຫະກຳ ເພື່ອຮ່ວມກັນສ້າງ “ເຂດສວນອຸດສາຫະກຳພະລັງງານໃໝ່ຂອງລາວ” ໂດຍເນັ້ນໃສ່ການລົງທຶນເຂົ້າໃນອຸດສາຫະກຳຜະລິດໄຟຟ້າດ້ວຍແສງຕາເວັນ ແລະ ອຸດສາຫະກຳແບດເຕີຣີ ແລະ ເຄື່ອງຈັກໄຟຟ້າ, ຕາມແຜນການ, ຍອດມູນຄ່າການລົງທຶນມີເຖິງ 40 ຕື້
ຢວນໂດຍແບ່ງເປັນ 3 ໄລຍະ.
ນັກຂ່າວ: ຫວາງຕານ