ເພີ່ມພະລັງໃຫ້ແກ່ການຮ່ວມມື ລາວ-ຈີນ
ເດືອນພຶດສະພາປີນີ້, ໃນເວລາໃຫ້ສຳພາດຕໍ່ນັກຂ່າວ, ເຈົ້າໜ້າທີ່ທີ່ກ່ຽວຂ້ອງຂອງມະຫາວິທະຍາໄລສ້າງຄູຢຸນນານໄດ້ເວົ້າດ້ວຍຄວາມຕື່ນເຕັ້ນດີໃຈວ່າ: “ຫ້ອງທົດລອງປະສົມໃນການພັດທະນາ ແລະ ນຳໃຊ້ພະລັງງານໝູນວຽນ ລາວ-ຈີນ ຂອງພວກເຮົາໄດ້ຮັບຄວາມຄືບໜ້າໃໝ່ອີກແລ້ວ!”
ກ່ອນໜ້ານີ້, ໂຄງການຕົວແບບງວດໜຶ່ງໂດຍພາຍໃຕ້ການຊີ້ນຳນຳພາຂອງຫ້ອງທົດລອງປະສົມໃນການພັດທະນາ ແລະນຳໃຊ້ພະລັງງານໝູນວຽນລາວ-ຈີນ (ຕໍ່ໄປເອີ້ນຫຍໍ້ວ່າຫ້ອງທົດລອງປະສົມ),ແລະ ສະຖາບັນຄົ້ນຄວ້າພະລັງງານ ແລະ ຂະແໜງການບໍ່ແຮ່ລາວເຂົ້າຮ່ວມການຄົ້ນຄວ້າພັດທະນາ ໄດ້ຜ່ານການກວດຮັບຜ່ານທາງວິດີໂອຢ່າງສຳເລັດຜົນ.
ໂຄງການທີ່ໄດ້ຜ່ານການກວດຮັບງວດນີ້ລວມມີ: ໂຄງການຕົວແບບລະບົບເຕັກນິກອາຍເມຕານ 1 ແຫ່ງ, ໂຄງການຕົວແບບລະບົບໂຮງຜະລິດໄຟຟ້າດ້ວຍແສງຕາເວັນ 1 ແຫ່ງ, ໂຄງການຕົວແບບລະບົບນ້ຳຮ້ອນແສງຕາເວັນ 2 ແຫ່ງ, ໂຄງການຕົວແບບລະບົບອົບແຫ້ງດ້ວຍພະລັງງານແສງຕາເວັນ 1 ແຫ່ງ, ໂຄງການຕົວແບບລະບົບສ້າງຄວາມເຢັນດ້ວຍພະລັງງານແສງຕາເວັນ 1 ແຫ່ງ ແລະ ອື່ນໆ.
ພາຍຫຼັງສ້າງໂຄງການເຫຼົ່ານີ້ແລ້ວ, ໄດ້ຍົກສູງຄຸນນະພາບດ້ານຊີວິດການເປັນຢູ່ ແລະ ປັບປຸງເງື່ອນໄຂສິ່ງແວດລ້ອມຂອງປະຊາຊົນທ້ອງຖິ່ນໃຫ້ດີຂຶ້ນ, ກໍໄດ້ຊ່ວຍປະຊາຊົນທ້ອງຖິ່ນຍົກທັດສະນະ ແລະ ສະຕິໃນການນຳໃຊ້ພະລັງງານໝູນວຽນໃຫ້ສູງຂຶ້ນ.
ວັນທີ 3 ກັນຍາປີ 2013, ພາຍໃຕ້ການສະໜັບສະໜູນຈາກກະຊວງວິທະຍາສາດເຕັກໂນໂລຊີຈີນ ແລະ ລາວ, ມະຫາວິທະຍາໄລສ້າງຄູຢຸນນານໄດ້ເຊັນສັນຍາກັບສະຖາບັນຄົ້ນຄວ້າພະລັງງານໝູນວຽນ ແລະ ວັດຖຸໃໝ່ຂອງລາວ, ຮ່ວມກັນສ້າງຫ້ອງທົດລອງປະສົມໃນການພັດທະນາ ແລະ ນຳໃຊ້ພະລັງງານໝູນວຽນ ລາວ-ຈີນ. ເດືອນມັງກອນປີ 2018, ຫ້ອງທົດລອງປະສົມໄດ້ສ້າງສຳເລັດແລະ ເປີດນຳໃຊ້ຢູ່ນະຄອນຫຼວງວຽງຈັນ.
10 ປີຜ່ານມາ, ນອກຈາກສ້າງໂຄງການ ແລະ ສ້າງກິດຈະກຳແລ້ວ, ຫ້ອງທົດລອງປະສົມຍັງໄດ້ອົບຮົມບົ່ມສ້າງຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຊີງວດໜຶ່ງໃຫ້ແກ່ປະເທດລາວ. ປັດຈຸບັນນີ້, ມະຫາວິທະຍາໄລສ້າງຄູຢຸນນານໄດ້ອົບຮົມນັກສຶກສາປະລິນຍາເອກ ແລະ ປະລິນຍາໂທໃນຂົງເຂດພັດທະນາ ແລະ ນຳໃຊ້ພະລັງງານໝູນວຽນຂອງລາວ 23 ທ່ານ. ປັດຈຸບັນມີ 13 ທ່ານໄດ້ຮຽນຈົບແລ້ວກັບຄືນປະເທດລາວ ແລະ ໄດ້ກາຍເປັນພະນັກງານຫຼັກແຫຼ່ງໃນຫ້ອງທົດລອງປະສົມດັ່ງກ່າວ.
ແຫຼ່ງຂ່າວ: ເວັບໄຊຢຸນນານ, ພັນທະມິດພະລັງງານແສງຕາເວັນ