ວິສາຫະກິດ 2.000 ກວ່າແຫ່ງໄດ້ມາຄົ້ນຫາໂອກາດ ທຸລະກິດຢູ່ແຂວງຢຸນນານ
ການພັດທະນາອຸດສາຫະກຳຢູ່ແຂວງຢຸນນານມີທ່າແຮງດ້ານຊັບພະຍາກອນແນວໃດ? ສະພາບແວດລ້ອມການລົງທຶນແລະ ການດຳເນີນທຸລະກິດເປັນຄືແນວໃດ? ການເປີດປະຕູສູ່ອາຊີໃຕ້ ແລະ ອາຊີຕາເວັນອອກສ່ຽງໃຕ້ມີໂອກາດຫຍັງແດ່? ຫວ່າງມໍ່ໆມານີ້, ມີວິສາຫະກິດ 2.066 ແຫ່ງໄດ້ເຕົ້າໂຮມກັນຢູ່ແຂວງຢຸນນານ ເພື່ອດຳເນີນການເຊື່ອມຕໍ່ດ້ານອຸດສາຫະກຳ ແລະ ຮ່ວມມືກັນ. ໃນນັ້ນ, ມີວິສາຫະກິດໃນບັນຊີລາຍຊື່ວິສາຫະກິດທີ່ມີຄວາມເຂັ້ມແຂງ 500 ແຫ່ງລະດັບໂລກ, ວິສາຫະກິດທີ່ມີຄວາມເຂັ້ມແຂງ 500 ແຫ່ງຂອງຈີນ, ວິສາຫະກິດທີ່ມີຄວາມເຂັ້ມແຂງ 500 ແຫ່ງໃນອຸດສາຫະກຳການຜະລິດ ແລະ ວິສາຫະກິດເອກະຊົນທີ່ມີຄວາມເຂັ້ມແຂງ 500 ແຫ່ງລວມທັງໝົດ 161 ແຫ່ງໄດ້ມາເຂົ້າຮ່ວມ.
ໃນໄລຍະນີ້, ຜູ້ແທນວົງການການເມືອງ, ວົງການການຄ້າ ແລະ ວົງການວິຊາການ ໄດ້ເດີນທາງມາທັດສະນະສຶກສາຢູ່ກິ່ງແຂວງ ແລະ ນະຄອນຕ່າງໆຂອງແຂວງຢຸນນານ, ຄົ້ນຫາໂອກາດການຄ້າ, ປຶກສາຫາລືການຮ່ວມມືກັນ ແລະ ສະແຫວງຫາການພັດທະນາ ໂດຍປິ່ນອ້ອມອຸດສາຫະກຳຕ່າງໆ ແລະ ຕ່ອງໂສ້ດ້ານອຸດສາຫະກຳທີ່ສຳຄັນ ເຊັ່ນ: ພະລັງງານໃໝ່, ອຸດສາຫະກຳອາລູມີນຽມ ແລະ ຊີລີຄອນສີຂຽວ, ຜະລິດຕະພັນຊີວະຊາດ, ການຜະລິດອຸປະກອນທັນສະໄໝ ແລະ ອື່ນໆ. ຫຼັງຈາກນັ້ນ, ຝ່າຍຕ່າງໆໄດ້ເຊັນສັນຍາໃນ 382 ໂຄງການກັບແຂວງຢຸນນານ ແລະ ກຽມຈະລົງທຶນ 396,6 ຕື້ຢວນ.
ແຂວງຢຸນນານໄດ້ສ້າງກົນໄກການຮ່ວມມືຫຼາຍຝ່າຍ ແລະ ສອງຝ່າຍ 12 ສະບັບກັບ 9 ປະເທດ, ທາງດ່ວນຈີນ-ຫວຽດນາມ, ຈີນ-ລາວ ແລະ ຈີນ-ມຽນມາ ໄດ້ເດີນຜ່ານທົ່ວແຂວງຢຸນນານ, ທາງລົດໄຟ ຈີນ-ລາວ ກໍໄດ້ເປີດການນຳໃຊ້ຢ່າງຮອບດ້ານ. ທ່າແຮງດ້ານທີ່ຕັ້ງພູມສາດ ແລະ ການບໍລິການດ້ານນະໂຍບາຍທີ່ດີ ໄດ້ກາຍເປັນປັດໄຈສຳຄັນ ທີ່ວິສາຫະກິດທັງຫຼາຍມາລົງທຶນຢູ່ແຂວງຢຸນນານ.
ຢູ່ສະຖານີໃຈກາງນະຄອນຄຸນໝິງຂອງກຸ່ມບໍລິສັດຕູ້ຄອນເທນເນີສາກົນທາງລົດໄຟຈີນຈຳກັດ, ນັກທຸລະກິດທັງຫຼາຍໄດ້ມີຄວາມສົນໃຈເປັນຢ່າງຍິ່ງຕໍ່ການຂົນສົ່ງສິນຄ້າດ້ວຍຕູ້ຄອນເທນເນີຕາມທາງລົດໄຟ ລາວ-ຈີນ. ທ່ານ Wang Hui ຜູ້ອຳນວຍການໃຫຍ່ບໍລິສັດວິທະຍາສາດເຕັກໂນໂລຊີລຸ້ຍເສິງຈຳກັດກ່າວວ່າ: “RCEP ໄດ້ສ້າງໂອກາດຍຸດທະສາດທີ່ສຳຄັນ, ແຂວງຢຸນນານມີທ່າແຮງທີ່ຕັ້ງພູມສາດ ທີ່ອວ່າຍໜ້າໄປສູ່ອາຊີໃຕ້ ແລະ ອາຊີຕາເວັນອອກສ່ຽງໃຕ້. ນະຄອນຄຸນໝິງມີພື້ນຖານໂຄງລ່າງ, ການຮັບປະກັນດ້ານປັດໄຈທີ່ສຳຄັນ ແລະ ສະພາບແວດລ້ອມການດຳເນີນທຸລະກິດທີ່ຂ້ອນຂ້າງດີ, ພວກເຮົາຈະພິຈາລະນາຍ້າຍອຸດສາຫະກຳມາສູ່ນະຄອນຄຸນໝິງຢ່າງເປັນລະບຽບເທື່ອລະກ້າວຕາມເວລາອັນເໝາະສົມ ແລະ ຈະແນະນຳໃຫ້ວິສາຫະກິດທີ່ກ່ຽວຂ້ອງມາພັດທະນາຢູ່ນະຄອນຄຸນໝິງ.”
ທ່ານ Chen Chang ຮອງຫົວໜ້າສູນຄົ້ນຄວ້າການພັດທະນາຄະນະລັດຖະບານຈີນກ່າວວ່າ: “ຄຽງຄູ່ກັບແຂວງຢຸນນານໄດ້ເລັ່ງການສ້າງສາສູນອວ່າຍໜ້າໄປສູ່ອາຊີໃຕ້ ແລະ ອາຊີຕາເວັນອອກສ່ຽງໃຕ້, ແຂວງຢຸນນານຈະມີກຳລັງແຂ່ງຂັນດ້ານອຸດສາຫະກຳເພີ່ມຂຶ້ນຕື່ມອີກ.” ປັດຈຸບັນນີ້, ມູນຄ່າການຄ້າລະຫວ່າງຈີນ ແລະ ອາຊຽນໄດ້ກວມປະມານ 16% ຂອງຍອດມູນຄ່າການຄ້າທົ່ວປະເທດຈີນ, ມູນຄ່າການສົ່ງອອກຕໍ່ອາຊຽນຂອງແຂວງຢຸນນານ ໄດ້ກວມປະມານ 50% ຂອງຍອດມູນຄ່າການສົ່ງອອກຂອງທົ່ວແຂວງມູນຄ່າການນຳເຂົ້າກໍ່ຫຼາຍສົມຄວນ, ການນຳພາການເປີດປະຕູສູ່ພາຍນອກຕາມຊາຍແດນແລະ ບົດບາດຂອງແຂວງຢຸນນານ ຈະນັບມື້ນັບພົ້ນເດັ່ນຂຶ້ນ.
ແຫຼ່ງຂ່າວ: ໜັງສືພິມລາຍວັນຢຸນນານ, ເວັບໄຊຂ່າວສານຈີນ