ຈີນເລັ່ງເປີດປະຕູສູ່ພາຍນອກທີ່ມີລະດັບສູງ
ວັນທີ 3 ທັນວາຜ່ານມານີ້, ຂະບວນລົດໄຟຂົນສົ່ງທັນຍາຫານລາວຕາມທາງລົດໄຟລາວ-ຈີນ ຖ້ຽວທຳອິດທີ່ບັນທຸກເຂົ້າສາລີ ໄດ້ເດີນທາງອອກຈາກສະຖານີລົດໄຟບໍ່ຫານ ແລະ ເດີນທາງມາຮອດສະຖານີເໜືອນະຄອນໝືງຈືແຂວງຢູນນານຫຼັງຈາກນັ້ນ 2 ມື້, ທັນຍາຫານເຫຼົ່ານີ້ຖືກຂົນສົ່ງໄປຍັງເຂດຕ່າງໆຂອງຈີນ, ຊຶ່ງເວລາການຂົນສົ່ງຈະຫຼຸດລົງ 1 ຫາ 2 ມື້ ເມື່ອທຽບໃສ່ການຂົນສົ່ງຕາມທາງຫຼວງ ແລະ ຕົ້ນທຶນການຂົນສົ່ງກໍຫຼຸດລົງ 20% ຊຶ່ງເປັນຂີດໝາຍສະແດງໃຫ້ເຫັນວ່າ, ການຂົນສົ່ງທັນຍາຫານຂອງລາວ ໄດ້ເປີດຊ່ອງທາງການຂົນສົ່ງໃໝ່, ທັງໄດ້ສ້າງໂອກາດໃໝ່ໃຫ້ແກ່ການຂະຫຍາຍການຮ່ວມມືດ້ານການຄ້າທັນຍາຫານລະຫວ່າງປະເທດທີ່ຮ່ວມສ້າງ “ໜຶ່ງແລວ ໜຶ່ງເສັ້ນທາງ” ຕ່າງໆ ກໍຄື ປະເທດຈີນກັບປະເທດລາວ ເປັນຕົ້ນ.
ນີ້ແມ່ນໜຶ່ງໃນມາດຕະການຂອງຈີນໃນການຍຶດໝັ້ນການເປີດປະຕູສູ່ພາຍນອກທີ່ມີລະດັບສູງ. ນັບແຕ່ຕົ້ນປີນມາ,ປະເທດຈີນໄດ້ເຜີຍແຜ່ມາດຕະການ ແລະ ນະໂຍບາຍໃໝ່ຕ່າງໆ ເພື່ອດຶງດູດການລົງທຶນຈາກຕ່າງປະເທດຢ່າງໜັກແໜ້ນ, ໄດ້ເຜີຍແຜ່ແຜນການດຳເນີນງານ 8 ຂໍ້ ໃນການສະໜັບສະໜູນການຮ່ວມກັນສ້າງ“ໜຶ່ງແລວ ໜຶ່ງເສັ້ນທາງ” ຢ່າງມີຄຸນນະພາບສູງ ແລະ ສືບຕໍ່ສະໜອງການບໍລິການ ແລະ ຜະລິດຕະພັນສາທາລະນະສາກົນທີ່ຮັບໃຊ້ແກ່ທົ່ວໂລກ, ເຊັ່ນ: ງານວາງສະແດງສິນຄ້ານຳເຂົ້າສາກົນຈີນ, ງານວາງສະແດງເຄື່ອງອຸປະໂພກ-ບໍລິໂພກສາກົນຈີນ, ງານວາງສະແດງສົ່ງເສີມຕ່ອງໂສ້ການສະໜອງສາກົນຈີນ ແລະ ອື່ນໆ. ນອກຈາກນີ້ແລ້ວ, ຍັງລອງປະຕິບັດມາດຕະການຍົກເວັ້ນວີຊາຝ່າຍດຽວຕໍ່ 6 ປະເທດລວມທັງປະເທດຝຣັ່ງ ແລະ ເຢຍລະມັນ, ການຮັບຮອງ ແລະ ເລີ່ມນຳໃຊ້ບັດປະຈຳຕົວຖາວອນສຳລັບຄົນຕ່າງປະເທດສະບັບໃໝ່, ການເພີ່ມຖ້ຽວບິນລະຫວ່າງຈີນກັບຕ່າງປະເທດໃຫ້ຫຼາຍຂຶ້ນເປັນຕົ້ນ. ການໄປມາຫາສູ່ກັນດ້ານບຸກຄະລາກອນລະຫວ່າງຈີນກັບຕ່າງປະເທດມີຄວາມສະດວກສະບາຍຂຶ້ນຕື່ມອີກ, ການຈໍລະຈອນຂອງສິນຄ້ານັບມື້ນັບໂລ່ງລ່ຽນສະດວກວ່ອງໄວຂຶ້ນ, ການເປີດປະຕູສູ່ພາຍນອກທີ່ມີລະດັບສູງຂອງຈີນມີຄຸນນະພາບສູງຂຶ້ນ ແລະ ຖືກເລັ່ງໄວຂຶ້ນຢ່າງຕໍ່ເນື່ອງ.
ຫວ່າງມໍ່ໆມານີ້, ມີນັກທ່ອງທ່ຽວຈາກມາເລເຊຍຈຳນວນຫຼວງຫຼາຍທີ່ຖືກຕາມເງື່ອນໄຂຍົກເວັ້ນວີຊາໄດ້ເຂົ້າມາທ່ຽວຈີນ ໂດຍຜ່ານນະຄອນເຊີນເຈິ້ນແຂວງກວາງຕຸ້ງ ແລະ ນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີ. ນັກທ່ອງທ່ຽວມາເລເຊຍຄົນໜຶ່ງບອກໃຫ້ຮູ້ວ່າ: “ຄວາມຮູ້ສຶກມາຈີນໃນຄັ້ງທຳອິດແມ່ນພິເສດຫຼາຍ, ຍ້ອນວ່າເທື່ອນີ້ແມ່ນບໍ່ຕ້ອງຂໍວີຊາ ເຮົາບໍ່ຕ້ອງເສຍເວລາໄປລຽນແຖວເພື່ອຂໍວີຊາ, ຮູ້ສຶກວ່າດີຫຼາຍ.”
ຢູ່ສະໜາມບິນແຟຣງເຝີດປະເທດເຢຍລະມັນ, ມີຜູ້ໂດຍສານລຽນແຖວຍາວຢູ່ຕໍ່ໜ້າເຄົາເຕີເຊັກອິນສຳລັບຖ້ຽວບິນໄປຈີນ. ທ່ານ ມໍ ນັກທ່ອງທ່ຽວເຢຍລະມັນກ່າວວ່າ: “ຂ້າພະເຈົ້າຄິດວ່າການຍົກເວັ້ນວີຊາຝ່າຍດຽວແມ່ນທ່າທາງທີ່ຕັ້ງໜ້າໂດຍສະແດງໃຫ້ເຫັນວ່າ, ຈີນເປີດປະຕູສູ່ພາຍນອກ, ມັນສະດວກຫຼາຍສໍາລັບນັກທ່ອງທ່ຽວທີ່ຈະໄປທ່ຽວຈີນ, ການຜ່ານຈີນເດີນທາງໄປປະເທດທີສາມກໍບໍ່ສັບສົນ.
ເມື່ອບໍ່ດົນມານີ້, ໂຮງງານແຫ່ງໃໝ່ທີ່ມີເນື້ອທີ່ 6.500 ຕາແມັດທີ່ນະຄອນຊຽງໄຮ້ໄດ້ເລີ່ມດຳເນີນງານ, ນີ້ແມ່ນສູນການຜະລິດເຄື່ອງຕັດວົງຈອນທາງອາກາດທີ່ໃຫຍ່ທີ່ສຸດໃນໂລກທີ່ສ້າງຂຶ້ນໃໝ່ຂອງກຸ່ມບໍລິສັດ Schneider Electric SA.
“ສິ່ງທີ່ເກີດຂື້ນຢູ່ປະເທດຈີນໄດ້ມີຜົນປະໂຫຍດຕໍ່ທຸກໆປະເທດ.” ໃນທັດສະນະຂອງ ທ່ານ ຈິມ ຣົກເກີສ ນັກລົງທຶນທີ່ມີຊື່ສຽງໃນໂລກ, ການເປີດກວ້າງການເປີດປະຕູສູ່ພາຍນອກທີ່ມີລະດັບສູງຂອງຈີນ ແມ່ນ “ມີຜົນປະໂຫຍດອັນໃຫຍ່ຫຼວງຕໍ່ໂລກ ກໍຄືຕໍ່ຈີນ.”
ນັບແຕ່ເດືອນ ມັງກອນ ຫາເດືອນ ຕຸລາ ປີນີ້, ມີວິສາຫະກິດລົງທຶນຕ່າງປະເທດໃໝ່ 41.947 ແຫ່ງໄດ້ສ້າງຕັ້ງຂຶ້ນຢູ່ຈີນ, ຊຶ່ງໄດ້ເພີ່ມຂຶ້ນ 32,1% ເມື່ອທຽບໃສ່ໄລຍະດຽວກັນຂອງປີຜ່ານມາ. ໃນ 3 ໄຕມາດທຳອິດຂອງປີນີ້, ອຸດສາຫະກຳການຜະລິດຂອງຈີນໄດ້ນຳໃຊ້ທຶນຕ່າງປະເທດເພີ່ມຂຶ້ນຢ່າງຕໍ່ເນື່ອງ, ການນຳໃຊ້ທຶນຕ່າງປະເທດໃນຕົວຈິງມີເຖິງ 262,41 ຕື້ຢວນ, ເພີ່ມຂຶ້ນ 2,4% ເມື່ອທຽບໃສ່ໄລຍະດຽວກັນຂອງປີຜ່ານມາ.
ໃນວັນທີ 11 ຫາ 12 ທັນວານີ້, ກອງປະຊຸມວຽກງານເສດຖະກິດສູນກາງພັກກອມມູນິດຈີນ ໄດ້ຈັດຂຶ້ນຢູ່ນະຄອນຫຼວງປັກກິ່ງ. ກອງປະຊຸມໄດ້ຊີ້ອອກວ່າ, ໃນປີ 2024, ຈີນຈະສືບຕໍ່ສ້າງສະພາບແວດລ້ອມດຳເນີນທຸລະກິດທີ່ສອດຄ່ອງກັບຕະຫຼາດ, ຖືກຕ້ອງຕາມກົດໝາຍ ແລະ ເປັນແບບສາກົນ, ປະດິດສ້າງຍີ່ຫໍ້ “ການລົງທຶນຢູ່ຈີນ”. ຈີນຈະລົບ ລ້າງອຸປະສັກສໍາລັບຄົນຕ່່າງປະ ເທດມາດຳເນີນທຸລະກິດ, ມາຮຽນ ແລະ ມາທ່ຽວຢູ່ຈີນ. ຈີນຍຶດໝັ້ນການເປີດປະຕູສູ່ພາຍນອກທີ່ມີລະດັບສູງ, ເລັ່ງສ້າງສະພາບການພັດທະນາອັນໃໝ່ ແລະ ຈະອຳນວຍໂອກາດໃໝ່ໃຫ້ແກ່ໂລກ ໂດຍຜ່ານການພັດທະນາໃໝ່ຂອງຕົນຢ່າງບໍ່ຢຸດຢັ້ງ.
ແຫຼ່ງຂ່າວ: ຂ່າວສານ CCTV , ເວັບໄຊຕ່າງປະເທດ, CGTN , ສຳນັກຂ່າວສານຊິນຮວາ