ຂ້າພະເຈົ້າຮູ້ສຶກພູມໃຈທີ່ໄດ້ເຂົ້າເປັນສະມາຊິກ "ຄອບຄົວໃຫຍ່"
ຊ່ວງລະດູຮ້ອນປີ 2008, ທ້າວ ວັນທອງ ອາຍຸ 21 ປີໄດ້ເດີນທາງເຂົ້າສູ່ພູຜາປ່າດົງອັນຕຶບໜາທາງພາກເໜືອຂອງລາວ ແລະ ກາຍເປັນສະມາຊິກໃໝ່ຂອງທີມງານກຸ່ມບໍລິສັດຢູນນານໜົງເຂີນ. ໃນປັດຈຸບັນ, ລາວມີຊື່ຈີນວ່າ ຊ້ຽງຊົນຮວາ ແລະ ມີຕຳແໜ່ງໃໝ່ ກໍຄື ຜູ້ຮັບຜິດຊອບເຂດຫຼວງນໍ້າທາຂອງບໍລິສັດຢາງພາລາຢູນນານຂອງກຸ່ມບໍລິສັດຢູນນານໜົງເຂີນ, ໃນ 15 ປີຜ່ານມາ, ລາວໄດ້ປະສົບການເກືອບທຸກຂັ້ນຕອນໃນການປູກຢາງພາລາ, ການບຳລຸງ ແລະ ການຄຸ້ມຄອງເບ້ຍໄມ້ອ່ອນ, ການຄຸ້ມຄອງການປາດຢາງພາລາເປັນຕົ້ນ.
“ມີຄອບຄົວໃຫຍ່ແລ້ວຈຶ່ງມີຄອບຄົວນ້ອຍ.” ນີ້ແມ່ນຄໍາເວົ້າຕິດປາກຂອງທ້າວ ວັນທອງ.ລາວກ່າວວ່າ, ຢູ່ກຸ່ມບໍລິສັດຢູນນານໜົງເຂີນ, ຂໍພຽງແຕ່ເຈົ້າມີຄວາມສາມາດຕົວຈິງ, ເຈົ້າກໍຈະມີພື້ນທີ່ພັດທະນາທີ່ກວ້າງຂວາງກວ່າເກົ່າ, ລາວຮູ້ສຶກພາກພູມໃຈຫຼາຍທີ່ໄດ້ເຂົ້າເປັນສະມາຊິກ “ຄອບຄົວໃຫຍ່” ຂອງກຸ່ມບໍລິສັດຢູນນານໜົງເຂີນ.
ໃນເດືອນ ເມສາ 2017, ທ້າວ ວັນທອງ ຍ້າຍໄປເຮັດວຽກຢູ່ສູນສາທິດແຫ່ງໜຶ່ງຂອງບໍລິສັດຢາງພາລາຢູນນານ. ເພື່ອໃຫ້ພວກຊາວປູກຢາງສາມາດຮຽນຮູ້ເຕັກນິກການປາດຢາງພາລາໃຫ້ໄວ, ຕອນເຊົ້າມືດ 4 ໂມງຂອງທຸກມື້, ທ້າວວັນທອງໄດ້ໄປເຖິງສວນຢາງພາລາ ເພື່ອອະທິບາຍເຕັກນິກ ແລະ ສອນປາດຢາງພາລາໃຫ້ແກ່ຊາວປູກຢາງທັງຫຼາຍ, ທັງຊີ້ນຳຊາວປູກຢາງທີ່ມາໃໝ່ໃນທຸກຂັ້ນຕອນ. ສູນສາທິດ ທີ່ທ້າວ ວັນທອງຊີ້ນຳວຽກງານ ຖືກຈັດຢູ່ໃນອັນດັບແຖວໜ້າໃນການປະເມີນຜົນທ້າຍປີເປັນ 3 ປີລຽນຕິດ, ຄະແນນສະເລ່ຍຂອງເຕັກນິກປາດຢາງໄດ້ເພີ່ມຂຶ້ນທຸກປີ ແລະ ໄດ້ເປັນ “ໜ່ວຍງານກ້າວໜ້າ” “ທີມງານດີເດັ່ນ” ແລະ ໄດ້ນາມມະຍົນທີ່ມີກຽດສັກສີອື່ນໆຫຼາຍຄັ້ງ.
ໃນເດືອນມິຖຸນາ 2020, ທ້າວ ວັນທອງ ມີຜົນງານໂດດເດັ່ນໃນການແຂ່ງຂັນເລື່ອນຊັ້ນຂອງກຸ່ມບໍລິສັດຢູນນານໜົງເຂີນ ແລະ ຖືກຄັດເລືອກເປັນເຈົ້າໜ້າທີ່ບໍລິຫານຂັ້ນກາງ, ຮັບຜິດຊອບວຽກງານການຄຸ້ມຄອງສູນສາທິດຢ່າງສົມບູນ. ໃນການຄຸ້ມຄອງການຜະລິດຢາງພາລາ, ລາວໄດ້ສອນບົດຮຽນ ແລະ ວິທີການຄຸ້ມຄອງທີ່ກ້າວໜ້າໃຫ້ແກ່ຊາວປູກຢາງ ທີ່ຢູ່ທາງຂ້າງສູນສາທິດ.
ເມື່ອ ທ້າວ ວັນທອງ ໄດ້ຮູ້ວ່າ ທ້າວ ຄຳ ທີ່ເປັນພະນັກງານລາວທີ່ຫາກໍມາໃໝ່ຢູ່ໄກບ້ານ ແລະ ຢ້ານຄວາມລຳບາກໃນການເຮັດວຽກ, ລາວກໍໄປລົມກັບທ້າວ ຄຳ ຢູ່ຫໍພັກ,ແລະ ສັນຍາວ່າຈະໃຫ້ການຊ່ວຍເຫຼືອແກ່ລາວ ໃນຮູບແບບສອງຕໍ່ສອງ. ຄວາມຈິງໃຈຂອງ ທ້າວ ວັນທອງໄດ້ເຊີດຊູກຳລັງໃຈຂອງທ້າວຄຳ, ລາວໄດ້ຕັ້ງໃຈພະຍາຍາມຮຽນວິຊາການຄຸ້ມຄອງສວນຢາງກັບທ້າວ ວັນທອງ,ແລະ ກາຍເປັນຫົວໜ້າໜ່ວຍງານ ພາຍໃນເວລາສອງປີ.
ໃນຊຸມປີຜ່ານມານີ້, ກຸ່ມບໍລິສັດຢູນນານໜົງເຂີນ ໄດ້ປະດິດສ້າງໃໝ່ ແລະ ເພີ່ມທະວີວຽກງານການເລືອກເຟັ້ນບຸກຄະລາກອນຝ່າຍລາວທີ່ໜຸ່ມແໜ້ນ, ໄດ້ສ້າງຕັ້ງສາຍພົວພັນການຮ່ວມມືໄລຍະຍາວກັບມະຫາວິທະຍາໄລຕ່າງໆ, ເຊັ່ນ: ມະຫາວິທະຍາໄລແຫ່ງຊາດລາວ, ສະຖາບັນຂົງຈືໃນມະຫາວິທະຍາໄລສຸພານຸວົງ, ມະຫາວິທະຍາໄລຊູໂຈ່ວລາວທີ່ຮ່ວມມືສ້າງຂຶ້ນກັບປະເທດຈີນ ເປັນຕົ້ນ, ເພື່ອອົບຮົມບົ່ມສ້າງບຸກຄະລາກອນແບບ “ຈຸດຕໍ່ຈຸດ” ລະຫວ່າງໂຮງຮຽນກັບວິສາຫະກິດ, ການບໍາລຸງສ້າງ ແລະ ການເລືອກເຟັ້ນບຸກຄະລາກອນຝ່າຍລາວ ໄດ້ຊຸກຍູ້ສົ່ງເສີມໃຫ້ວິສາຫະກິດກ້າວເຂົ້າສູ່ໄລຍະການພັດທະນາທີ່ວ່ອງໄວ.
ປັດຈຸບັນ, ກຸ່ມບໍລິສັດຢູນນານໜົງເຂີນ ໄດ້ສ້າງຕັ້ງບໍລິສັດສາຂາຢູ່ໃນ 6 ແຂວງຂອງລາວ ເຊັ່ນ: ແຂວງຫຼວງນ້ຳທາ, ແຂວງຫຼວງພະບາງ, ແຂວງວຽງຈັນ ແລະ ແຂວງຜົ້ງສາລີເປັນຕົ້ນ, ມີພະນັກງານຈີນ 180 ກວ່າຄົນ ແລະ ພະນັກງານລາວ 6.000 ກວ່າຄົນ, ໄດ້ສ້າງລາຍໄດ້ໃຫ້ແກ່ປະຊາຊົນທ້ອງຖິ່ນຫຼາຍກວ່າ 300 ລ້ານຢວນຕໍ່ປີ.
ແຫຼ່ງຂ່າວ: ເວັບໄຊຢູນນານ, ບັນຊີວິແຊັດທາງການ“ຢາງພາລາຢູນນານໜົງເຂີນ”